សមត្ថកិច្ចខេត្តបន្ទាយមានជ័យ បានឃាត់ខ្លួនបុរសម្នាក់រយៈពេលខ្លី ខណៈដែលរូបគាត់បានថតសកម្មភាពនិងចូូលរួមប្រមូលផ្តុំតវ៉ាជាមួយអាជីវករប្រមាណ៣០នាក់ ទាមទារឱ្យមានការបើកច្រកទ្វារអន្តរជាតិប៉ោយប៉ែតឡើងវិញ នៅព្រឹកថ្ងៃព្រហស្បតិ៍នេះ។
អាជីវករទាំងនោះបានប្រមូលផ្តុំគ្នាតវ៉ានៅម្តុំផ្សារត្រី ក្រុងប៉ោយប៉ែត ទាមទារឱ្យអាជ្ញាធរបើកច្រកអន្តរជាតិកម្ពុជា-ថៃ (ប៉ោយប៉ែត) ឡើងវិញ ដើម្បីឱ្យពួកគាត់បានប្រកបរបរចិញ្ចឹមជីវិត ក្រោយពីច្រកទ្វារនេះបានបិទជាច្រើនខែអំឡុងពេលមានវិបត្តិជំងឺកូវីដ១៩។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី ប្រាប់វីអូឌីថា នៅព្រឹកមិញនេះ គាត់ចូលទៅថតយករូបភាពនិងឡាយតាមហ្វេសប៊ុកពីសកម្មភាពតវ៉ានោះ ដើម្បីបង្ហាញទៅរដ្ឋាភិបាលឱ្យយកចិត្តទុកដាក់ដល់ប្រជាពលរដ្ឋ ខណៈដែលពួកគេជួបបញ្ហាប្រឈមច្រើនក្នុងជីវភាព។
លោកបន្តថា នៅពេលធ្វើសកម្មភាពឡាយផ្ទាល់ (Facebook Live) នោះ សមត្ថកិច្ចបានដកយកទូរសព្ទដៃរបស់គាត់ចំនួនពីរគ្រឿង និងឃាត់ខ្លួនមនុស្សម្នាក់ឈ្មោះ ស៊ីម វណ្ណៈ អាយុ២៦ឆ្នាំ។ លោកចាត់ទុកទង្វើរបស់អាជ្ញាធរថា ធ្វើឡើងដោយបំពានសិទ្ធិសេរីភាពបញ្ចេញមតិនិងច្បាប់។
លោកមានប្រសាសន៍ថា៖ «ច្បាប់ឯណាចែងមកថា ថតនៅទីសាធារណៈខុសច្បាប់ វាអត់មាន! វាអយុត្តិធម៌ហួសហេតុហើយ ធ្វើអញ្ចឹងដូចជាផ្តាច់ការជ្រុលហើយ ផ្តាច់ការមែនទែនតែម្តង»។
តែយ៉ាងណា លោក ពុទ្ធី និយាយថា នៅរសៀលថ្ងៃនេះ សមត្ថកិច្ចបានដោះលែងលោក ស៊ីម វណ្ណៈ ឱ្យមានសេរីភាពវិញ ក្រោយពីបានធ្វើកិច្ចសន្យាបញ្ឈប់សកម្មភាពថតរូបភាពតវ៉ានិងចូលរួមការតវ៉ានោះ។
លោក ពុទ្ធី បញ្ជាក់ដែរថា សមត្ថកិច្ចមិនទាន់ប្រគល់ទូរសព្ទដៃពីរគ្រឿងឱ្យគាត់វិញនៅឡើយ ដោយសមត្ថកិច្ចតម្រូវឱ្យលោកធ្វើកិច្ចសន្យាដូចលោក ស៊ីម វណ្ណៈ ដែរ។ លោកថា លោកមិនទាន់សម្រេចចិត្តថាទៅយកទូរសព្ទដៃនោះនៅឡើយ ដោយសារកំពុងគិតពិចារណាពីការប្តឹងលើករណីនេះ ខណៈដែលលោកពុំមិនបានធ្វើខុសដូចការចោទប្រកាន់។
អ្នករត់ម៉ូតូឌុបនៅក្រុងប៉ោយប៉ែត សុំមិនបញ្ចេញឈ្មោះ ដែលចូលរួមជាមួយអ្នកតវ៉ាទាមទារនោះ បានអំពាវនាវទៅរដ្ឋាភិបាលបើកច្រកទ្វារអន្តរជាតិប៉ោយប៉ែតឡើងវិញ ខណៈអាជីវករកំពុងជួបប្រទះវិបត្តិសេដ្ឋកិច្ចក្នុងគ្រួសារ។
លោកអំពាវនាវថា៖ «សំណូមពរដល់រាជរដ្ឋាភិបាល គាត់ជួយសម្រួលបើកច្រក ពួកខ្ញុំស្ទះលុយរកមិនបាន ទិញម្ហូបហូបខ្វះព្រឹកខ្វះល្ងាច មិនបានហូបគ្រប់គ្រាន់ ថ្លៃភ្លើង ថ្លៃទឹក ថ្លៃផ្ទះអត់មាន មកដល់ខែ ខ្វះលិច ខ្វះកើត បើអត់បើកទេ នៅអញ្ចឹងទៀត ពួកខ្ញុំដាច់បាយហើយ ខ្ញុំរកអ្វីមិនបានផង»។
ក្នុងការប្រមូលផ្តុំតវ៉ានោះ អាជីវករបានពាក់អាវដែលមានសរសេរសារថា «អរគុណសន្តិភាព ខ្ញុំសុំរស់ផង»។
អធិការនគរបាលក្រុងប៉ោយប៉ែត លោក ធិន ស៊ិនដេត ឆ្លើយយ៉ាងខ្លីថា សមត្ថកិច្ចមិនបានឃាត់ខ្លួនបុរសម្នាក់ឈ្មោះ ស៊ីម វណ្ណៈ នោះទេ។
មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបន្ទាយមានជ័យ លោក ស៊ុំ ចាន់គា ដែលតាមដានការតវ៉ានេះ មានប្រសាសន៍ថា បើអាជ្ញាធរមិនបើកច្រកប៉ោយប៉ែតឡើងវិញទេ នឹងធ្វើឱ្យអាជីវករមួយចំនួនជួបបញ្ហាប្រឈមច្រើន ហើយអ្នកដែលរងគ្រោះគឺប្រជាពលរដ្ឋក្រីក្រ។
ចំណែក ករណីសមត្ថកិច្ចឃាត់ខ្លួនមនុស្សម្នាក់រយៈពេលខ្លីនិងដកហូតទូរសព្ទពីបាតុករនោះ លោកថា បង្ហាញពីសេរីភាពបញ្ចេញមតិនិងសេរីភាពចែករំលែកព័ត៌មាន មានការរឹតត្បិត។
លោកមានប្រសាសន៍ថា៖ «កុំឱ្យរឹតត្បិតពេកសេរីភាពសារព័ត៌មាន សេរីភាពនៃការបញ្ចេញមតិ ឱ្យឃើញមិនសូវល្អក្នុងសង្គមលទ្ធិប្រជាធិបតេយ្យនោះទេ។ សង្គមលទ្ធិប្រជាធិបតេយ្យនិយាយទាក់ទងសេរីភាពនៃការបញ្ចេញព័ត៌មាននិងការទទួលព័ត៌មាន ឱ្យគេឃើញច្បាស់ទៅ ដើម្បីជាដំណឹងមួយ ជាសារមួយដល់អាជ្ញាធរចុះធ្វើការដោះស្រាយដែលជាអ្នកបម្រើរាស្ត្រ ចុះធ្វើការដោះស្រាយជូនពួកគាត់»។
សេចក្តីជូនដំណឹងរបស់ស្ថានអគ្គកុងស៊ុលកម្ពុជាប្រចាំខេត្តស្រះកែវ កាលពីចុងខែមីនា ឆ្នាំ២០២០នេះ បានឱ្យដឹងថា កម្ពុជា-ថៃ សម្រេចបិទច្រកព្រំដែនអន្តរជាតិនិងច្រកទ្វារទាំងអស់នៃប្រទេសទាំងពីរជាបណ្តោះអាសន្ន ដើម្បីទប់ស្កាត់ការរីករាលដាលនៃជំងឺកូវីដ-១៩។ ច្រកទ្វារអន្តរជាតិនិងច្រកទ្វារតំបន់រវាងកម្ពុជា-ថៃ មានចំនួន២៤ច្រក៕