ប្រទេសចិនបានដាក់ពង្រាយយន្តហោះចម្បាំងដែលមានលទ្ធភាពបាញ់មីស៊ីលបានចម្ងាយ២៥០០គីឡូម៉ែត្រ ដាក់នៅជិតព្រំដែនរបស់ខ្លួនជាប់ជាមួយប្រទេសឥណ្ឌា ចំពេលដែលកម្លាំងប្រដាប់អាវុធនៃប្រទេសទាំងពីរមានការប៉ះទង្គិចគ្នាទ្រង់ទ្រាយធំជាថ្មីទៀត។
នៅក្នុងរូបថតដែលត្រូវបានចេញផ្សាយកាលពីថ្ងៃអង្គារ នៅលើគណនីប្រព័ន្ធផ្សព្វផ្សាយសង្គមផ្លូវការនៃបញ្ជាការដ្ឋានភាគកណ្ដាលរបស់កងទ័ពរំដោះប្រជាជនចិន បានឱ្យដឹងថា យន្តហោះទម្លាក់គ្រាប់បែកប្រភេទ Xian H-6 ចំនួន៣គ្រឿង និងយន្តហោះដឹកកងទ័ពប្រភេទ Xian Y-20 ចំនួន១គ្រឿងទៀត ត្រូវបានដាក់បង្ហាញនៅអាកាសយានដ្ឋានមួយ ដែលត្រូវបានគេគិតថា ស្ថិតនៅក្នុងតំបន់ស្វយ័តទីបេ។
ខ្លឹមសារដែលអមជាមួយរូបភាពនៅលើបណ្តាញសង្គម វ័យប៊ូ (Weibo) របស់ប្រទេសចិនបានឱ្យដឹងថា កងទ័ពរបស់ខ្លួនបាននិងកំពុងឈរជើងនៅទីខ្ពស់ជាងគេលើតំបន់ខ្ពង់រាប។
ក្នុងចំណោមយន្តហោះដែលអាចកំណត់អត្តសញ្ញាណបានពីរូបភាព គឺយន្តហោះទម្លាក់គ្រាប់បែកប្រភេទ H-6H ដែលអាចវាយប្រហារបានចម្ងាយ២៥០០គីឡូម៉ែត្រ និងអាចផ្ទុកមីស៊ីលធុនធ្ងន់សម្រាប់បាញ់លើដីឬមីស៊ីលសម្រាប់បាញ់នាវា។
ការដាក់ពង្រាយយន្តហោះចម្បាំងរបស់ចិនទាំងនេះ ធ្វើឡើងបន្ទាប់ពីការប៉ះទង្គិចគ្នាជាទ្រង់ទ្រាយធំនៅតាមព្រំដែនរវាងចិននិងឥណ្ឌា បានកើតឡើងជាថ្មីទៀត កាលពីថ្ងៃចន្ទដើមសប្តាហ៍នេះ។ ភាគីទាំងពីរក៏បានចោទប្រកាន់គ្នាទៅវិញទៅមកអំពីការបើកការបាញ់ប្រហារនៅជិតបឹងផែងកុងខាងត្បូង(Pangong) ក្នុងការរំលោភលើកិច្ចព្រមព្រៀងគ្មានសង្គ្រាមដែលបានចុះហត្ថលេខានៅឆ្នាំ១៩៩៦។
ជម្លោះនៅតាមព្រំដែនរវាងចិននិងឥណ្ឌា បានបង្កជាភាពតានតឹងខ្លាំងឡើងពីមួយថ្ងៃទៅមួយថ្ងៃ ចាប់តាំងពីខែឧសភាមក។ យ៉ាងហោចណាស់ ទាហានឥណ្ឌា២០នាក់ត្រូវបានសម្លាប់នៅក្នុងការប៉ះទង្គិចគ្នារវាងភាគីទាំងពីរនៅក្នុងខែមិថុនា។ ចំណែកប្រទេសចិនមិនបានទទួលស្គាល់ការបាត់បង់កងទ័ពរបស់ខ្លួននៅក្នុងការប្រយុទ្ធនោះទេ។
ប្រទេសទាំងពីរនៅតែបញ្ជូនកងកម្លាំងបន្ថែមទៅតាមតំបន់ដែលកំពុងតែមានការប្រឈមខ្លាំងនេះ បើទោះជាមានកិច្ចព្រមព្រៀងមិនដាក់បន្ថែមកម្លាំងនៅជួរមុខ ដើម្បីបន្ថយភាពតានតឹងក៏ដោយ។
រយៈពេលប៉ុន្មានខែថ្មីៗនេះ កងទ័ពរំដោះប្រជាជនចិន បានបង្កើនការធ្វើសមយុទ្ធបាញ់គ្រាប់ពិតនៅតំបន់ទីបេនិងតំបន់ស៊ីនជាំង ព្រមទាំងបានផ្សព្វផ្សាយជាសាធារណៈពីការហាត់សមនេះ។
យន្តហោះទម្លាក់គ្រាប់បែកជាហ្វូងប្រភេទ H-6 របស់ចិន គឺបច្ចេកវិទ្យាផលិតយកតាមយុទ្ធសាស្ត្ររបស់សហភាពសូវៀតក្នុងអំឡុងទសវត្សឆ្នាំ១៩៥០។ ចំណែកបច្ចេកវិទ្យាចុងក្រោយនោះគឺ H6-N ដែលផលិតនិងដាក់បង្ហាញលើកដំបូងក្នុងទិវាកងទ័ពជាតិកាលពីខែតុលាឆ្នាំមុន៕