មន្ត្រីឧទ្យានុរក្សតំបន់ការពារក្បាលឆាយខេត្តព្រះសីហនុ បញ្ជូនខ្លួនជនសង្ស័យម្នាក់ទៅស្នងការដ្ឋាននគរបាលខេត្ត ក្រោយសង្ស័យពាក់ព័ន្ធនឹងករណីទន្ទ្រានដីព្រៃក្នុងតំបន់ការពារធម្មជាតិក្បាលឆាយ។
សេចក្ដីប្រកាសព័ត៌មានរបស់មន្ទីរបរិស្ថានខេត្តព្រះសីហនុ កាលពីថ្ងៃម្សិលមិញ បានឱ្យដឹងថា ក្រុមមន្រ្តីឧទ្យានុរក្សតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ កាលពីថ្ងៃទី៩ខែកញ្ញា បានចុះត្រួតល្បាតត្រួតពិនិត្យបទល្មើសទន្ទ្រានកាន់កាប់ដីរដ្ឋខុសច្បាប់ ក្នុងភូមិសាស្ត្រឃុំបិតត្រាង ស្រុកព្រៃនប់។
មន្ទីរបរិស្ថានខេត្ត បានបន្តថា ក្នុងពេលចុះល្បាតនោះ មន្ត្រីឧទ្យានុរក្សបានប្រទះឃើញមានរោងប្រក់តង់មួយចំនួន២កន្លែង និងវត្ថុតាងបទល្មើសមួយចំនួន រួមមាន រណាយន្ត១គ្រឿង ម៉ាស៊ីនកាត់ស្មៅ២គ្រឿង កាំបិតផ្គាក់២ និងពូថៅ១។
មន្ទីរបរិស្ថានខេត្ត បានបន្ថែមថា ពេលនោះ ក្រុមល្បាតក៏បានឃើញមនុស្ស៣នាក់ ពួននៅក្បែរតង់នោះ និងបានព្យាយាមរត់គេចចេញ ប៉ុន្តែក្រុមការងារបានឃាត់ខ្លួនមនុស្សប្រុសបានម្នាក់។
មន្ទីរបរិស្ថាន បានបញ្ជាក់ថា ដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត ក្រុមការងារល្បាតបានបញ្ជូនបុរសរូបនោះទៅស្នងការនគរបាលខេត្ត ដើម្បីធ្វើការសាកសួរតាមនីតិវិធីច្បាប់។
ទោះយ៉ាងណា វីអូឌី ពុំអាចសុំការអត្ថាធិប្បាយបន្ថែមជុំវិញករណីនេះ ពីប្រធានមន្ទីរបរិស្ថានខេត្តព្រះសីហនុ លោក សាមុត សុធារិទ្ធ បានទេ នៅថ្ងៃព្រហស្បតិ៍នេះ ដោយលោកប្រាប់ថាជាប់រវល់។
រាជរដ្ឋាភិបាល បានចេញអនុក្រឹត្យ បង្កើតតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ កាលពីថ្ងៃទី០៩ ខែឧសភា ឆ្នាំ២០១៦។
កន្លងមក សមត្ថកិច្ច ក៏ធ្លាប់បានបង្ក្រាបជាបន្តបន្ទាប់នូវសកម្មភាពបទល្មើសកាប់ឆ្ការព្រៃ ទន្ទ្រានយកដីនៅតំបន់ការពារនេះជាបន្តបន្ទាប់ផងដែរ៕