កូនប្រុសច្បងរបស់លោកនាយករដ្ឋមន្ត្រី ហ៊ុន សែន បានក្រើនរំឭកទៅកងអង្គរក្សផ្ទាល់ខ្លួនលោកនាយករដ្ឋមន្ត្រី ឱ្យប្រកាន់ខ្ជាប់តាមគោលការណ៍របស់បញ្ជាការដ្ឋាន ដើម្បីការពារសន្តិភាពនិងស្ថិរភាពនយោបាយរបស់ប្រទេស។
កូនប្រុសច្បងលោក ហ៊ុន សែន គឺលោក ហ៊ុន ម៉ាណែត ដែលជាអគ្គមេបញ្ជាការរងនិងជាមេបញ្ជាការកងទ័ពជើងគោក បានថ្លែងបែបនេះកាលពីម្សិលមិញ ក្នុងពិធីខួបគម្រប់៣០ឆ្នាំនៃថ្ងៃកំណើតកងវរសេនាតូចលេខ២៤៦។
លោក ហ៊ុន ម៉ាណែត ថ្លែងថា៖ «ការសាមគ្គីផ្ទៃក្នុងជាកត្តាកំណត់ជោគជ័យផ្ទៃក្នុង ជាកត្តាកំណត់សម្រាប់ប្រទេសជាតិយើង សម្រាប់ខ្មែរយើង។ ការដើរទៅមុខ ការពង្រឹងសមត្ថភាព ម្ចាស់ការឯករាជ្យភាពលើគ្រប់វិស័យដូចនៅក្នុងរបាយការណ៍ដែលបានដាក់ គឺជាភារកិច្ចនិងគោលដៅរបស់កងទ័ព»។
លោក ហ៊ុន ម៉ាណែត ក៏បានក្រើនរំឭកឱ្យកងកម្លាំងប្រដាប់អាវុធគ្រប់ប្រភេទពង្រឹងផ្ទៃក្នុង ហើយត្រូវទប់ស្កាត់ការបែកបាក់ផ្ទៃក្នុងជួរកងទ័ពផងដែរ។
ក្នុងសារលិខិតអបអរខួប៣០ឆ្នាំនេះដែរ លោក ហ៊ុន សែន បានរំឭកឡើងវិញថា លោកបានចុះទៅបង្កើតដោយផ្ទាល់នូវកងវរសេនាតូចលេខ២៤៦កាលពីឆ្នាំ១៩៩០ នៅពេលលោកកាន់តំណែងជាប្រធានក្រុមប្រឹក្សារដ្ឋមន្ត្រីនៃសម័យរដ្ឋកម្ពុជា។
លោក ហ៊ុន សែន រៀបរាប់ទៀតថា កងវរសេនាតូចមួយនេះត្រូវបានកែប្រែទៅជាបញ្ជាការដ្ឋានកងអង្គរក្សកាលពីខែមិថុនា ឆ្នាំ២០០៩ ដែលស្ថិតក្រោមចំណុះអគ្គបញ្ជាការដ្ឋាន ហើយស្ថិតក្រោមបញ្ជាការលោក ហ៊ីង ប៊ុនហៀង ដែលជាអគ្គមេបញ្ជាការរងកងយោធពលខេមរភូមិន្ទផងដែរ។
មេបញ្ជាការអង្គរក្សលោកនាយករដ្ឋមន្ត្រីរូបនេះ ត្រូវបានអាមេរិកដាក់ចូលក្នុងបញ្ជីខ្មៅនិងការបង្កកទ្រព្យសម្បត្តិចាប់តាំងពីខែមិថុនា ឆ្នាំ២០១៨ ក្រោយពីអាមេរិករកឃើញថា លោក ហ៊ីង ប៊ុនហៀង ជាប់ពាក់ព័ន្ធនឹងការរំលោភសិទ្ធិមនុស្ស ក្នុងនោះមានទាំងអំពើហិង្សាលើតំណាងរាស្ត្រ ២រូបរបស់គណបក្សសង្គ្រោះជាតិ នៅមុខវិមានរដ្ឋសភា កាលពីឆ្នាំ២០១៥។
អ្នកវិភាគនយោបាយដែលមានមូលដ្ឋាននៅក្រៅប្រទេស លោក គឹម សុខ និយាយថា ការដំឡើងសំឡេងខ្លាំងៗរបស់លោក ហ៊ុន ម៉ាណែត បង្ហាញថា លោកជាមនុស្សតែម្នាក់គត់ដែលមានសិទ្ធិចាត់ចែងកងកម្លាំងបច្ចុប្បន្ន។
លោក គឹម សុខ និយាយថា៖ «លោក ហ៊ុន ម៉ាណែត ចង់សង្កត់ធ្ងន់ថា គាត់ជាអ្នកបន្តមរតកអំណាចផ្ដាច់ការពីឪពុករបស់គាត់ ហើយរៀបចំពេលណាក៏ស្រេចតែលើឪពុករបស់គាត់ដែរ។ រីឯបេក្ខជនផ្សេងនៅក្នុងផ្ទៃក្នុងគណបក្សប្រជាជនកម្ពុជា កុំស្រមៃចង់ប្រជែងឱ្យសោះ។ រឿងទី២ នៅពេលនេះ លោក ហ៊ុន ម៉ាណែត ជាអ្នកចាត់ចែងនិងបញ្ជាការការងារទាំងអស់របស់កងទ័ពបន្ទាប់ពីឪពុករបស់គាត់ មិនមែនរដ្ឋមន្ត្រីក្រសួងការពារជាតិ ហើយក៏មិនមែនមេទ័ពប្រមុខដែរ»។
លោក គឹម សុខ បន្តថា ការក្រើនរំឭកឱ្យកងកម្លាំងប្រដាប់អាវុធគ្រប់ប្រភេទពង្រឹងផ្ទៃក្នុងជួរកងទ័ពនោះ ដោយសារលោក ហ៊ុន ម៉ាណែត បារម្ភចំពោះកងទ័ពដែលមិនគាំទ្រលោកនៅពេលដែលលោកស្នងតំណែងពីលោកនាយករដ្ឋមន្ត្រី។
បច្ចុប្បន្ន លោក ហ៊ុន ម៉ាណែត ក្រៅពីកាន់តំណែងជាអគ្គមេបញ្ជាការរងនិងជាមេបញ្ជាការកងទ័ពជើងគោក លោកក៏ជាសមាជិកគណៈអចិន្ត្រៃយ៍នៃគណៈកម្មាធិការកណ្ដាលគណបក្សប្រជាជនកម្ពុជានិងជាប្រធានចលនាយុវជនគណបក្សប្រជាជនកម្ពុជាថ្នាក់កណ្ដាលផងដែរ៕
