រដ្ឋាភិបាលជប៉ុនអនុញ្ញាតឱ្យកម្មសិក្សាការី-ពលករជំនាញកម្ពុជា អាចទៅធ្វើកម្មសិក្សានិងធ្វើការនៅប្រទេសជប៉ុនរយៈពេលយូរបានឡើងវិញ ប៉ុន្តែត្រូវអនុវត្តនូវនីតិវិធីមួយចំនួនតាមវិធានសុខាភិបាល ដើម្បីទប់ស្កាត់ការរាលដាលនៃជំងឺកូវីដ១៩។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈកម្ពុជា កាលពីថ្ងៃម្សិលមិញ បានលើកឡើងថា តាមការជូនដំណឹងរបស់ស្ថានទូតជប៉ុនប្រចាំនៅកម្ពុជា រដ្ឋាភិបាលជប៉ុនបានសម្រេចអនុញ្ញាតបើក «វិធានការជាជំហានសម្រាប់ការស្នាក់នៅ» រយៈពេលយូរសម្រាប់ប្រទេសកម្ពុជា ដែលរួមបញ្ចូលទាំងកម្មសិក្សាការី-ពលករជំនាញ ចាប់ពីថ្ងៃទី០៨ ខែកញ្ញានេះតទៅ។
តែយ៉ាងណា ក្រសួងថា រដ្ឋាភិបាលជប៉ុនបានណែនាំនូវគោលការណ៍មួយចំនួនឱ្យកម្មសិក្សាការី-ពលករជំនាញកម្ពុជា អនុវត្តនៅមុនពេលចេញដំណើរ អំឡុងពេលធ្វើដំណើរ និងពេលទៅដល់ប្រទេសជប៉ុនផងដែរ។
បើតាមការឱ្យដឹងពីក្រសួងការងារ មុនពេលធ្វើដំណើរ កម្មសិក្សាការី-ពលករជំនាញ ត្រូវបំពេញពាក្យស្នើសុំទិដ្ឋាការថ្មីនៅស្ថានទូតជប៉ុនប្រចាំនៅកម្ពុជា ដោយភ្ជាប់នូវឯកសារលិខិតឆ្លងដែន វិញ្ញាបនបត្របញ្ជាក់ពីសិទ្ធិរស់នៅ កិច្ចសន្យាអនុវត្តវិធានការចត្តាឡីស័កចំនួន១៤ថ្ងៃដែលផ្តល់ឱ្យដោយក្រុមហ៊ុនឬសមាគមនៅប្រទេសជប៉ុន និងត្រូវបំពេញកម្រងសំណួរជុំវិញប្រវត្តិ និងគម្រោងធ្វើដំណើរក្នុងអំឡុងពេលកូវីដ១៩។
ក្នុងអំឡុងពេលធ្វើដំណើរទៅប្រទេសជប៉ុន កម្មសិក្សាការី-ពលករជំនាញ ចាំបាច់ត្រូវបំពេញចម្លើយទៅក្នុងកម្រងសំណួរស្តីពីស្ថានភាពសុខភាពបច្ចុប្បន្ន ដែលបានចែកជូននៅលើយន្តហោះ ដោយភ្ជាប់ជាមួយនូវកិច្ចសន្យាអនុវត្តន៍វិធានការចត្តាឡីស័កដែលផ្តល់ឱ្យដោយក្រុមហ៊ុនឬសមាគមនៅប្រទេសជប៉ុន ដាក់ទៅការិយាល័យទទួលបន្ទុកអនុវត្តន៍ចត្តាឡីស័កនៅព្រលានយន្តហោះ។
ដោយឡែក ពេលទៅដល់ប្រទេសជប៉ុន កម្មសិក្សាការី-ពលករជំនាញ មិនត្រូវបានអនុញ្ញាតឱ្យប្រើប្រាស់មធ្យោបាយធ្វើដំណើរសាធារណៈទេ និងត្រូវអនុវត្តគោលការណ៍ចត្តាឡីស័កចំនួន១៤ថ្ងៃ ដែលរៀបចំដោយក្រុមហ៊ុនឬសមាគមនៃប្រទេសជប៉ុន។
ក្រសួងបញ្ជាក់ថា ក្នុងករណីកម្មសិក្សាការី-ពលករជំនាញកម្ពុជា មិនគោរពតាមគោលការណ៍ណែនាំនៅប្រទេសជប៉ុនទេ អជ្ញាធរជប៉ុននឹងចាត់វិធានការតាមផ្លូវច្បាប់៕
