អាជ្ញាធររាជធានីភ្នំពេញ នៅថ្ងៃព្រហស្បតិ៍នេះ បាននិងកំពុងស្វែងរកជនជាតិចិន២នាក់ដែលបានរត់គេចចេញពីការធ្វើចត្តាឡីស័ក នៅសណ្ឋាគារមួយក្នុងរាជធានីភ្នំពេញ ខណៈមានតម្រុយខ្លះៗពីករណីនេះ។
ជនជាតិចិនទាំង២នាក់ ត្រូវបានដាក់ឱ្យធ្វើចត្តាឡីស័កនៅសណ្ឋាគារមួយ កាលពីថ្ងៃទី៨ ខែកញ្ញា ដើម្បីរង់ចាំលទ្ធផលតេស្តរកវីរុសកូវីដ១៩ ប៉ុន្តែដោយសារមានទំនាស់ក្នុងក្រុម ពួកគេក៏បានរត់ចេញពីសណ្ឋាគារនោះតែម្តង នៅរសៀលថ្ងៃទី៩ ខែកញ្ញា។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា គិតមកដល់រសៀលថ្ងៃព្រហស្បតិ៍ សមត្ថកិច្ចបានរកឃើញតម្រុយខ្លះៗហើយពាក់ព័ន្ធនឹងករណីជនជាតិចិនទាំងពីរនាក់ដែលរត់ចេញពីការធ្វើចត្តាឡីស័ក។
លោកថា៖ «យើងប្រើគ្រប់មធ្យោបាយដើម្បីរក យើងបានឃាត់ខ្លួនបក្ខពួករបស់គាត់ [ជនជាតិចិនទាំងពីរនាក់] ដែលទៅយក passport [លិខិតឆ្លងដែន] ហើយឥលូវនេះ យើងកំពុងធ្វើការងារជាមួយពួកគាត់ ដើម្បីឱ្យពួកគាត់បង្ហាញទីតាំងរបស់ជនជាតិចិនទាំងពីរនាក់នោះ»។
អភិបាលរាជធានីភ្នំពេញរូបនេះ បានទទួលស្គាល់ពីភាពខ្វះចន្លោះរបស់សមត្ថកិច្ចក្នុងការការពារទីតាំងធ្វើចត្តាឡីស័ក ដែលនាំឱ្យអ្នកធ្វើចត្តាឡីស័ករត់ចេញបាន។ តែយ៉ាងណា លោកថា សមត្ថកិច្ចនឹងបង្កើនការយាមកាមនិងអនុវត្តនូវវិធានការនានារបស់គណៈកម្មការកូវីដ១៩ឱ្យបានម៉ត់ចត់បន្ថែមទៀត។
លោកបញ្ជាក់ថា៖ «សណ្ឋាគារគាត់ប្រឹងប្រែងណាស់ ក្នុងនាមគាត់ជាអ្នករកស៊ី។ ប៉ុន្តែដោយសារ មានចេតនាពីជនមួយចំនួនដែលមិនយល់ច្បាប់កូវីដ [ការធ្វើចត្តាឡីស័ក] គាត់ធ្វើការងារតាមទំនើងចិត្តរបស់គាត់ ដែលធ្វើឱ្យមានការភ្លាំងភ្លាត់។ យើងត្រូវខិតខំប្រឹងប្រែងដាក់វិធានការទៅលើបញ្ហានេះឱ្យបានម៉ត់ចត់វិញ»។
បើតាមលោក ឃួង ស្រេង សាលារាជធានីភ្នំពេញ បានចុះកិច្ចព្រមព្រៀងជាមួយសណ្ឋាគារចំនួន១០ ដែលតម្រូវឱ្យសណ្ឋាគារទាំងនោះទទួលខុសត្រូវផ្នែកខាងក្នុង ហើយអាជ្ញាធររាជធានីភ្នំពេញយាមកាមនៅខាងក្រៅ ដើម្បីការពារក្រែងលោជនដែលត្រូវធ្វើចត្តាឡីស័កមានបញ្ហាសុខភាពឬក៏បង្កការអុកឡុកណាមួយនៅក្នុងសណ្ឋាគារ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បញ្ជាក់ដែរថា កម្លាំងនគរបាលបានព្យាយាមស្វែងរកបុគ្គលទាំងពីរនាក់នេះ តាំងពីពួកគេបានរត់គេចចេញពីការធ្វើចត្តាឡីស័កភ្លាមៗ។
លោកថា៖ «សមត្ថកិច្ចគេកំពុងតែស្វែងរក ពេលបានលទ្ធផល យើងនឹងប្រាប់»។
ចំណែកអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានបដិសេធអត្ថាធិប្បាយ ដោយថា ទុកលទ្ធភាពឱ្យអាជ្ញាធរមានសមត្ថកិច្ចធ្វើការលើរឿងនេះសិន។
តែយ៉ាងណា លោកស្រីបានប្រាប់ក្រុមអ្នកសារព័ត៌មានតាមតេឡេក្រាម (Telegram) កាលពីយប់ថ្ងៃម្សិលមិញថា ជនជាតិចិនទាំងពីរនាក់នោះបានធ្វើដំណើរពីប្រទេសចិនមកដល់កម្ពុជា នៅម៉ោងប្រហែល១១ថ្ងៃត្រង់ ថ្ងៃទី៨ ខែកញ្ញា។
លោកស្រីបន្តថា៖ «លទ្ធផលតេស្តរបស់ពួកគាត់ទាំងពីរនាក់ គឺអវិជ្ជមានវីរុសកូវីដ-១៩ ដែលតម្រូវឱ្យបន្តធ្វើចត្តាឡីស័កបន្តទៀត»។
ក្រសួងសុខាភិបាល កាលពីថ្ងៃទី២៨ ខែសីហា ឆ្នាំ២០២០ ធ្លាប់បានចេញលិខិតណែនាំដល់អភិបាលរាជធានី-ខេត្តទាំងអស់ ត្រូវដាក់កម្លាំងសមត្ថកិច្ចយាមកាមឱ្យបានម៉ត់ចត់ ដើម្បីពង្រឹងសន្តិសុខនិងសណ្ដាប់ធ្នាប់នៅតាមមណ្ឌលចត្តាឡីស័កទាំងអស់នៅទូទាំងប្រទេស ជាពិសេសកុំឱ្យអ្នកកំពុងធ្វើចត្តាឡីស័ករត់ចេញពីមណ្ឌលចត្តាឡីស័កមុនកាលកំណត់។
លិខិតរបស់ក្រសួងបានបញ្ជាក់ដែរថា ប្រសិនបើមានបុគ្គលណាមិនអនុវត្តតាមវិធានការចត្តាឡីស័ករបស់ក្រសួងសុខាភិបាល សមត្ថកិច្ចគ្រប់ជាន់ថ្នាក់ត្រូវអនុវត្តច្បាប់និងបទដ្ឋានគតិយុត្តិដែលមានជាធរមាន។
កាលពីខែសីហា មានជនជាតិវៀតណាម២នាក់និងបុរសជនជាតិខ្មែរ២នាក់ ក៏បានលួចចេញពីការធ្វើចត្តាឡីស័កនៅក្នុងមន្ទីរពេទ្យបង្អែកព្រះស្តេច និងមណ្ឌលចត្តាឡីស័កនៅវិទ្យាល័យ ហ៊ុន សែន កំពង់លាវ ខេត្តព្រៃវែង។
តែយ៉ាងណា អាជ្ញាធរខេត្តបានរកឃើញពួកគេភ្លាមៗនៅថ្ងៃដដែលផងដែរ ដោយក្រុមការងារក្រសួងបានតម្រូវឱ្យពួកគេធ្វើចត្តាឡីស័ក១៤ថ្ងៃឡើងវិញ និងពុំមានការពិន័យជាប្រាក់នោះទេ ដោយសារពួកគេមានជីវភាពក្រីក្រ។
ដោយឡែក កាលពីថ្ងៃទី១៧ ខែកក្កដា ក៏មានស្ត្រីខ្មែរសញ្ជាតិអាមេរិកម្នាក់បានរត់ចេញពីមណ្ឌលចត្តាឡីស័កនៅសណ្ឋាគារមួយក្នុងរាជធានីភ្នំពេញដែរ និងត្រូវបានមន្ត្រីសុខាភិបាលរកឃើញវិញនៅខេត្តកំពង់ចាម។ ស្ត្រីរូបនោះត្រូវបានមន្ត្រីសុខាភិបាលខេត្តសម្រេចផាកពិន័យអន្តរការណ៍ចំនួន១លានរៀល៕
