នាយករដ្ឋមន្ត្រីនិងអតីតមេដឹកនាំបក្សប្រឆាំង ផ្ញើសារបែបក្រើនរំឭកផ្សេងៗគ្នាសម្រាប់ប្រជាពលរដ្ឋខ្មែរ ក្នុងអំឡុងពេលកាន់បិណ្ឌនិងភ្ជុំបិណ្ឌនេះ។
លោកនាយករដ្ឋមន្ត្រី ហ៊ុន សែន បានលើកឡើងនៅក្នុងទំព័រហ្វេសប៊ុក នៅថ្ងៃទី១០ ខែកញ្ញា ដែលជាថ្ងៃកាន់បិណ្ឌទី៨ថា ពិធីបុណ្យកាន់បិណ្ឌនិងភ្ជុំបិណ្ឌ ជាពេលវេលាមួយដែលប្រជាពលរដ្ឋមានឱកាសក្នុងការធ្វើបុណ្យទាន សន្សំកុសល និងការជួបជុំសាច់ញាតិបងប្អូននៅតាមទីកន្លែងជិតឆ្ងាយ ជាពិសេសតាមទីអារាមនានា។ លោកបានក្រើនរំឭកដល់ប្រជាពលរដ្ឋ ចូលរួមទប់ស្កាត់និងការពារខ្លួនពីការឆ្លងរីករាលដាលជំងឺកូវីដ១៩។
លោកនាយករដ្ឋមន្ត្រី ហ៊ុន សែន ក៏បានណែនាំដល់អាជ្ញាធរគ្រប់លំដាប់ថ្នាក់ បង្កើនកិច្ចការពារសុវត្ថិភាព សន្តិសុខ សណ្តាប់ធ្នាប់សាធារណៈ និងសម្រួលចរាចរណ៍ ដើម្បីបង្កភាពងាយស្រួលដល់ប្រជាពលរដ្ឋនិងទេសចរក្នុងអំឡុងពេលបុណ្យភ្ជុំបិណ្ឌនេះ។
ចំណែកលោក កឹម សុខា អតីតប្រធានគណបក្សសង្គ្រោះជាតិ បានលើកឡើងក្នុងទំព័រហ្វេសហ៊ុកកាលពីថ្ងៃពុធម្សិលមិញ ក្នុងអំឡុងពេលកាន់បិណ្ឌទី៧ដែរថា ប្រជាពលរដ្ឋខ្មែរគួរតាំងចិត្តនិងបង្កើនការធ្វើអំពើល្អជាមួយគ្នា ដូចដែលបាននិងកំពុងធ្វើបុណ្យកុសលជាមួយគ្នានៅតាមវត្តអារាមក្នុងរដូវភ្ជុំបិណ្ឌនេះ។
លោកថា៖ «បេីយើងងាកមកធ្វើអំពើល្អ អំពើជាកុសលជាមួយគ្នានៅទីកន្លែងផ្សេងៗ នៅពេលខាងមុខជាបន្តបន្ទាប់ទៀត ខ្ញុំជឿជាក់ថា ប្រទេសជាតិនិងប្រជាពលរដ្ឋខ្មែរយើងនឹងទទួលបាននូវសេចក្តីសុខ សន្តិភាពពិត និងភាពរុងរឿងសម្រាប់ទាំងអស់គ្នា»។
ពិធីបុណ្យកាន់បិណ្ឌនិងភ្ជុំបិណ្ឌឆ្នាំនេះ ប្រព្រឹត្តទៅចាប់ពីថ្ងៃទី៣ ដល់ថ្ងៃទី១៨ ខែកញ្ញា។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន យល់ថា សាររបស់លោក កឹម សុខា ហាក់មិនមានប្រយោជន៍ផ្នែកនយោបាយទេ ខណៈដែលសំណុំរឿងរបស់លោកកំពុងស្ថិតនៅក្នុងដៃតុលាការនៅឡើយ។
លោកថា៖ «ពេលនេះ លោក[កឹម សុខា ]មិនមែនជាអ្នកនយោបាយទេ របៀបយ៉ាងម៉េចក៏យើងពិបាកថា ក៏ប៉ុន្តែដល់ចប់ដំណើរការតុលាការ លោកអាចប្រើសារនយោបាយដើម្បីជាប្រយោជន៍របស់លោក តែឥលូវនេះ ផលប្រយោជន៍របស់លោកមិនមែនជាសារនយោបាយទេ»។
អ្នកវិភាគបញ្ហាសង្គម លោកបណ្ឌិត មាស នី និយាយថា ការផ្ញើសាររបស់លោក កឹម សុខា អាចជាសញ្ញាពញ្ញាក់អារម្មណ៍ថា គាត់មិននៅស្ងៀមក្នុងការទាមទារសិទ្ធិធ្វើនយោបាយឡើងវិញ ទោះស្ថិតក្រោមគំនាបតុលាការក៏ដោយ។
លោកថា៖ «សន្តិភាពពិត វាលុះត្រាតែសុខទាំងអស់គ្នា បើសន្តិភាពមានតែមួយក្រុម ហើយមួយក្រុមទៀតនៅតែរងការចាប់ រងការគំរាម អាហ្នុងមិនមែនសន្តិភាពពិតទេ»។
លោក កឹម សុខា ត្រូវសមត្ថកិច្ចចាប់ខ្លួននៅយប់រំលងអធ្រាត្រឈានចូលថ្ងៃទី២ ខែកញ្ញា ឆ្នាំ២០១៧ ក្រោមបទចោទថា ឃុបឃិតជាមួយសហរដ្ឋអាមេរិកចង់ផ្តួលរំលំរដ្ឋាភិបាល ដោយកាលណោះ សមត្ថកិច្ចបានបញ្ជូនរូបលោកទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ អស់រយៈពេលជាង១ឆ្នាំ និងក្រោយមកត្រូវបានតុលាការសម្រេចដាក់ឱ្យឃុំខ្លួនក្នុងផ្ទះ ក្នុងរាជធានីភ្នំពេញវិញ។
រហូតមកដល់ពេលនេះ លោក កឹម សុខា នៅមិនទាន់ត្រូវបានអនុញ្ញាតឱ្យធ្វើនយោបាយឡើងវិញនៅឡើយទេ ដោយតុលាការដាក់ឱ្យស្ថិតក្រោមការត្រួតពិនិត្យនៅឡើយ៕
