ធនាគារអភិវឌ្ឍន៍អាស៊ី (ADB) ផ្តល់ប្រាក់កម្ចី១២៧,៨លានដុល្លារ សម្រាប់កសាងបណ្តាញបញ្ជូននិងអនុស្ថានីយអគ្គិសនី នៅរាជធានីភ្នំពេញនិងខេត្តចំនួន៣ទៀតនៅកម្ពុជា ឱ្យទទួលបានការផ្គត់ផ្គង់អគ្គិសនីប្រកបដោយស្ថិរភាពនិងអាចទុកចិត្តបាន។
សេចក្តីប្រកាសព័ត៌មានរបស់ ADB ផ្សព្វផ្សាយនៅថ្ងៃទី១០ ខែកញ្ញា បានលើកឡើងថា គម្រោងកម្ចីនេះ នឹងសាកល្បងប្រព័ន្ធផ្ទុកថាមពលដើរដោយអាគុយខ្នាតធំដំបូងបង្អស់នៅកម្ពុជា ដោយប្រើថវិកាចំនួន៦,៧លានដុល្លារ។
ADB បន្តថា ក្នុងនោះរាប់បញ្ចូលទាំង៤,៧លានដុល្លារ ពីមូលនិធិអាកាសធាតុជាយុទ្ធសាស្ត្រនៃការពង្រីកការអនុវត្ត កម្មវិធីថាមពលកកើតឡើងវិញនៅក្នុងប្រទេសដែលមានចំណូលទាប និង ២លានដុល្លារ ពីមូលនិធិថាមពលស្អាតនៃគម្រោងដៃគូហិរញ្ញប្បទានសម្រាប់ថាមពលស្អាត។
សេចក្តីប្រកាសព័ត៌មានរបស់ ADB បន្តទៀតថា គម្រោងនេះនឹងជួយដល់អគ្គិសនីកម្ពុជា (EDC) ដែលជាស្ថាប័នអគ្គិសនីជាតិរបស់ប្រទេសកម្ពុជា ដើម្បីពង្រឹងហេដ្ឋារចនាសម្ព័ន្ធបញ្ជូនចរន្ត តាមរយៈការផ្តល់ហិរញ្ញប្បទានដល់ការសាងសង់បណ្តាញបញ្ជូន១១៥-២៣០គីឡូវ៉ាត់ ចំនួន៤ និងអនុស្ថានីយអគ្គិសនីចំនួន១០ នៅរាជធានីភ្នំពេញ ខេត្តកំពង់ឆ្នាំង កំពង់ចាម និងតាកែវ។
លោកស្រី Sunniya Durrani-Jamal នាយិកាប្រចាំប្រទេសកម្ពុជា របស់ធនាគារអភិវឌ្ឍន៍អាស៊ី បានលើកឡើងថា ការផ្តល់ជំនួយបន្ត ADB ក្នុងការរៀបចំផែនការបណ្តាញថាមពលនេះ នឹងជួយដល់កម្ពុជាឱ្យទទួលបានការផ្គត់ផ្គង់ថាមពលបានគ្រប់គ្រាន់ មានតម្លៃសមរម្យ និងមាននិរន្តរភាពបរិស្ថាន ដើម្បីគាំទ្រដល់ការអភិវឌ្ឍប្រកបដោយសមធម៌។
លោកស្រីបានបន្តថា៖ «ប្រព័ន្ធផ្ទុកថាមពលដោយអាគុយ នឹងបង្ហាញពីរបៀបដែលការអភិវឌ្ឍ ខ្នាតធំនៃការអនុវត្តបច្ចេកវិទ្យាច្នៃប្រឌិតថ្មី អាចត្រូវបានប្រើដើម្បីដំណើរការបណ្តាញអគ្គិសនីក្នុង ប្រទេសកម្ពុជានាពេលអនាគត និងដើម្បីបង្កើតថាមពលកកើតឡើងវិញបន្ថែមទៀត»។
អ្នកឯកទេសផ្នែកថាមពលអគ្គិសនីរបស់ ADB លោកស្រី Daniela Schmidt បានលើកឡើងដែរថា គម្រោងនេះ ក៏នឹងជំរុញផលិតភាពសេដ្ឋកិច្ចកម្ពុជា តាមរយៈការបង្កើនសមត្ថភាព ភាពប្រកួតប្រជែង បង្កើតការងារ និងការធ្វើពិពិធកម្មនានា ព្រមទាំងជួយគាំទ្រដល់ការងើបឡើងវិញរបស់ប្រទេសពីវិបត្តិជំងឺកូវីដ១៩ផងដែរ។
លោកស្រីថា៖ «គម្រោងនេះ នឹងបង្កើតការងារដោយផ្ទាល់ចំនួន១៣០០ នៅក្នុងវិស័យសំណង់ ជាមួយនឹងការផ្តល់ជាប្រយោជន៍ក្នុងការបង្កើនប្រាក់ចំណូលក្នុងគ្រួសារ។ វាក៏នឹងគាំទ្រដល់កិច្ចខិតខំប្រឹងប្រែងរបស់អគ្គិសនីកម្ពុជា [EDC] ក្នុងការលើកកម្ពស់បរិយាប័ន្ន និងសមភាពយេនឌ័រ នៅកន្លែងធ្វើការនិងលើកទឹកចិត្តឱ្យមានការចូលរួមរបស់ស្ត្រីនៅក្នុងវិស័យថាមពល»។
បើតាម ADB រាជរដ្ឋាភិបាលកម្ពុជាគ្រោងនឹងបង្កើនសមត្ថភាពផលិតចរន្តអគ្គិសនីថាមពលព្រះអាទិត្យ ដល់៤១៥មេហ្គាវ៉ាត់នៅឆ្នាំ២០២២ ពោលគឺកើនឡើងពី១៥៥មេហ្គាវ៉ាត់ក្នុងឆ្នាំ២០១៩។ ប្រព័ន្ធផ្ទុកថាមពលដោយអាគុយដែលគាំទ្រដោយគម្រោងនេះ មានសមត្ថភាពសន្សំថាមពលអគ្គិសនី១៦មេហ្គាវ៉ាត់ម៉ោង និងផ្តល់លទ្ធភាពដើម្បីជួយរួមបញ្ចូលថាមពលកកើតឡើងវិញ ការបន្ថយការកកស្ទះ ការបញ្ជូនចរន្ត និងធ្វើតុល្យការនៃការផ្គត់ផ្គង់និងតម្រូវការផងដែរ។
ចាប់តាំងពីឆ្នាំ១៩៩៤មក ធនាគារអភិវឌ្ឍន៍អាស៊ី បានផ្តល់ប្រាក់កម្ចីនិងជំនួយឥតសំណងជិត២០០លានដុល្លារដល់វិស័យថាមពលរបស់ប្រទេសកម្ពុជា និងផ្តល់ជំនួយបច្ចេកទេសប្រមាណ៦លានដុល្លារ។
ថវិការបស់ធនាគារអភិវឌ្ឍន៍អាស៊ី បានផ្តោតលើការពង្រីកបណ្តាញបញ្ជូននិងចែកចាយចរន្ត និង គាំទ្រដល់កំណែទម្រង់វិស័យអគ្គិសនី ព្រមទាំងការកសាងសមត្ថភាពស្ថាប័ន។
កាលពីឆ្នាំមុន ធនាគារអភិវឌ្ឍន៍អាស៊ីបានផ្តល់ថវិកាចំនួន៧,៦៤លានដុល្លារ ដើម្បីគាំទ្រដល់ការសាងសង់ឧទ្យានពន្លឺព្រះអាទិត្យតាមរយៈភាពជាដៃគូរវាងវិស័យសាធារណៈនិងឯកជន រួមជាមួយការបង្កើតផែនទីបង្ហាញផ្លូវសម្រាប់ការអភិវឌ្ឍថាមពលពន្លឺព្រះអាទិត្យផងដែរ៕