មេធាវីការពារ បានឱ្យដឹងថា សាលក្រមនៃសំណុំរឿង«រួមគំនិតក្បត់»ចោទទៅលើមនុស្ស៧នាក់ដែលជាសកម្មជនបក្សប្រឆាំងនៅខេត្តត្បូងឃ្មុំ ត្រូវបានតុលាការខេត្តនេះសម្រេចលើកពេលទៅប្រកាសសេចក្ដីសម្រេចនៅក្រោយពិធីបុណ្យភ្ជុំបិណ្ឌវិញ បន្ទាប់ពីបញ្ចប់សវនាការនៅព្រឹកថ្ងៃនេះ។
បើតាមដីកាកោះកាលពីថ្ងៃទី៣ ខែកញ្ញា សាលាដំបូងខេត្តត្បូងឃ្មុំ ត្រូវបើកសវនាការនៅថ្ងៃនេះ ដើម្បីជម្រះក្ដីសំណុំរឿង«រួមគំនិតក្បត់»ដែលត្រូវបានចោទទៅលើអតីតសកម្មជនបក្សប្រឆាំង ៧នាក់នៅខេត្តនេះ ក្នុងនោះមានម្នាក់បានចូលរួមជាមួយគណបក្សប្រជាជនកម្ពុជាហើយ។
លោក សំ សុគង់ មេធាវីការពារក្ដីឱ្យសកម្មជន៦រូបក្នុងចំណោមជនត្រូវចោទ៧នាក់ បានប្រាប់ថា តុលាការបានសម្រេចលើកពេលប្រកាសសាលក្រមទៅថ្ងៃទី២២ ខែកញ្ញា បន្ទាប់ពីសវនាការពេញមួយព្រឹកនៅថ្ងៃនេះ។
ទោះជាយ៉ាងណា មេធាវីរូបនេះអះអាងថា កូនក្តីទាំង៦រូបជាសកម្មជន មិនបានបង្ហាញខ្លួនក្នុងសវនាការនៅព្រឹកនេះទេ ប៉ុន្តែមានវត្តមានជនត្រូវចោទតែមួយរូបប៉ុណ្ណោះ។
លោក សំ សុគង់ ប្រាប់ថា៖ «អង្គហេតុរបស់គាត់ពាក់ព័ន្ធពួកគាត់ថតជុំគ្នាគាំទ្រលោក សម រង្ស៊ី ខណៈបានតែងតាំងជាប្រធានស្តីទីនៅសហរដ្ឋអាមេរិកក្នុងឆ្នាំ២០១៨ ហើយនិងអាយុទ្ធនាការម្រាមដៃស្អាតមិនទៅបោះឆ្នោត ហូបនំបញ្ចុក និងអា៩វិច្ឆិកាហ្នឹង ហូរហែអ៊ីចឹងមក»។
មេធាវីរូបនេះ អះអាងថា កូនក្តីរបស់លោកមិនបានប្រព្រឹត្តដូចការចោទប្រកាន់ទេ ហើយលោកថា ការចោទប្រកាន់នេះ អាចជារឿងនយោបាយ។
អ្នកនាំពាក្យសាលាដំបូងខេត្តត្បូងឃ្មុំ លោក ថេង ជាង មិនអាចបញ្ជាក់ពីមូលហេតុនៃការលើកពេលប្រកាសសាលក្រមសំណុំរឿងនេះបានទេ។
លោក ថេង ជាង ប្រាប់ថា៖ «ខ្ញុំអត់បានព័ត៌មានដែរ គ្រាន់តែដឹងថា សវនាការចប់សព្វគ្រប់រួចរាល់ អង្គសវនាការបានប្រកាសយកថ្ងៃ២២ កញ្ញាវិញ»។
សកម្មជនទាំង៧នាក់ដែលត្រូវបានចោទប្រកាន់ពីបទ«រួមគំនិតក្បត់»ពាក់ព័ន្ធនឹងគណបក្សសង្គ្រោះជាតិដែលត្រូវបានរំលាយចោលទៅហើយនោះ មានទាំងប្រធានគណៈកម្មការប្រតិបត្តិគណបក្សសង្គ្រោះជាតិស្រុកពញាក្រែក លោក ចក់ ហួរ ផងដែរ។
VOD មិនអាចសុំការបញ្ជាក់ពីលោក ចក់ ហួរ ឬសកម្មជនដទៃទៀតដែលរងការចោទប្រកាន់បានទេរហូតមកដល់រសៀលថ្ងៃនេះ ដោយទូរសព្ទរបស់លោកហៅចូលច្រើនដង តែគ្មានអ្នកទទួល។
អតីតមេដឹកនាំគណបក្សសង្គ្រោះជាតិ លោក សម រង្ស៊ី ធ្លាប់ប្រកាសពីដំណើរវិលត្រឡប់ចូលកម្ពុជាវិញនៅថ្ងៃទី៩ ខែវិច្ឆិកាកាលពីឆ្នាំមុន ចំខួប៦៦ឆ្នាំនៃទិវាបុណ្យឯករាជ្យជាតិ ប៉ុន្តែគម្រោងវិលត្រឡប់នោះពុំបានកើតឡើងនោះឡើយ។
កាលពីឆ្នាំ២០១៨កន្លងមក លោក សម រង្ស៊ី ក៏បានអំពាវនាវទៅដល់សកម្មជននិងអ្នកគាំទ្របក្សប្រឆាំង ឱ្យចូលរួមពិសារនំបញ្ចុករួមគ្នាផងដែរ ជាយុទ្ធនាការមួយដែលត្រូវបានរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន បានអំពាវនាវទៅអ្នកគាំទ្របក្សកាន់អំណាចឱ្យរៀបចំធ្វើឡើងនៅទូទាំងប្រទេស នៅថ្ងៃទី៩ ខែមិថុនាក្នុងឆ្នាំនោះ។
ប្រធានផ្នែកសិទ្ធិមនុស្សនៃសមាគមអាដហុក លោក នី សុខា និយាយថា រឿងនេះជារឿងចាស់ដែលបានកើតឡើងនៅឆ្នាំ២០១៨ និងខ្លះនៅឆ្នាំ២០១៩ ដែលត្រូវបានគេមើលឃើញថា ជារឿងនយោបាយ។ លោកចង់ឃើញស្ថាប័នច្បាប់ស្តារស្ថានភាពសិទ្ធិមនុស្សឡើងវិញ ក្នុងនាមប្រទេសដែលប្រកាន់លទ្ធិប្រជាធិបតេយ្យ ដើម្បីឆ្លើយតបទៅនឹងកង្វល់របស់សហគមន៍អន្តរជាតិ។
លោក នី សុខា ប្រាប់ថា៖ «អ៊ីចឹងហើយបានជាយើងស្នើរដ្ឋាភិបាលម្តងហើយម្តងទៀតថា ឱ្យរដ្ឋាភិបាលពិចារណាដោះស្រាយបញ្ហាវិបត្តិនយោបាយហ្នឹងឱ្យបានស្រួលបួលទៅ ដើម្បីឈានទៅអភិវឌ្ឍប្រទេសយើង មានការទុកចិត្តពីអន្តរជាតិ អានេះវាជាសេចក្តីសុខសាន្តមួយរបស់ប្រជាពលរដ្ឋទៅថ្ងៃអនាគត»។
ជម្លោះនយោបាយនៅកម្ពុជា ជំរុញឱ្យសហភាពអឺរ៉ុប សម្រេចដកប្រព័ន្ធអនុគ្រោះពន្ធ (អ្វីៗគ្រប់យ៉ាងលើកលែងតែអាវុធ) ឬ EBA ២០ភាគរយពីកម្ពុជា។ សហភាពអឺរ៉ុបនិយាយក្នុងសេចក្តីថ្លែងការណ៍ចុះថ្ងៃទី១២ ខែសីហាថា៖
«អាជ្ញាធរកម្ពុជាគួរចាត់វិធានការណ៍ ដើម្បីស្តារសេរីភាពនយោបាយនៅក្នុងប្រទេសនេះ បង្កើតឡើងវិញនូវលក្ខខណ្ឌចាំបាច់សម្រាប់បក្សប្រឆាំងដែលអាចជឿទុកចិត្តបានតាមបែបប្រជាធិបតេយ្យ និងដើម្បីចាប់ផ្តើមដំណើរការផ្សះផ្សារជាតិតាមរយៈការសន្ទនារួមនិងពិតប្រាកដ»។
បើតាមលោក សំ សុគង់ ក្រោយគណបក្សសង្គ្រោះជាតិត្រូវបានរំលាយ មានសំណុំរឿងជិត៣០០ រងការចោទប្រកាន់ពីបទ «រួមគំនិតក្បត់» ហើយបច្ចុប្បន្ននៅមានសកម្មជនបក្សប្រឆាំង២៤នាក់ទៀតកំពុងជាប់ឃុំ៕