បុរសដែលរងអំពើហិង្សាពីសំណាក់នគរបាលខេត្តព្រៃវែងកាលពីចុងខែកក្កដាកន្លងមកនោះ បានបង្ហាញក្ដីបារម្ភពីសុវត្ថិភាពផ្ទាល់ខ្លួន ខណៈដែលវិធានការច្បាប់ជាក់លាក់ទៅលើមន្ត្រីនគរបាលរូបនោះ មិនទាន់កើតឡើងនៅឡើយ។
យុវជន ហឿន រ័ត្ន អាយុ២៨ឆ្នាំ ជាពលរដ្ឋនៅភូមិស្វាសុខោ ឃុំជើងទឹក ស្ថិតក្នុងក្រុងព្រៃវែង ដែលអះអាងថា ជាជនរងគ្រោះ បាននិយាយថា កាលពីថ្ងៃទី២០ ខែកក្កដា គាត់និងមិត្តភក្តិម្នាក់ទៀតឈ្មោះ ថៃ សាមាឌ អាយុ២៦ឆ្នាំ បាននាំគ្នាទៅផឹកស៊ីនៅភោជនីយដ្ឋានមួយកន្លែងក្នុងក្រុងព្រៃវែង ប៉ុន្តែលោកថា នៅពេលកំពុងផឹក ពួកគេទទួលព័ត៌មានថា ក្រុមប៉ូលិសខេត្តត្រៀមចាប់ខ្លួនពួកគេទាំងពីរនាក់។
ក្រោយពីទទួលបានព័ត៌មាននេះ លោក ហឿន រ័ត្ន បញ្ជាក់ថា ពួកគេបាននាំគ្នាត្រឡប់មកផ្ទះវិញនៅម៉ោងប្រហែល៩និង៤៥នាទីយប់។ ប៉ុន្តែនៅពេលធ្វើដំណើរត្រឡប់មកផ្ទះវិញនោះ នាយរងការិយាល័យប្រឆាំងគ្រឿងញៀនខេត្ត លោក ទូច ធារ៉ា និងគូកន បាននាំគ្នាស្ទាក់ រួចចាប់ខ្លួន ប្រើហិង្សាលើពួកគេ រួចបញ្ជូនទៅស្នងការបន្តធ្វើទារុណកម្មមួយយប់ ទារប្រាក់ម្នាក់២លានរៀល ហើយថែមទាំងចោទថា ពួកគេប្រើប្រាស់គ្រឿងញៀនផងដែរ។
ករណីនេះ លោក ហឿន រ័ត្ន ឱ្យដឹងថា ក្រោយពីកើតហេតុនោះ គាត់បានដាក់ពាក្យប្តឹងទៅតុលាការឱ្យចាត់វិធានការច្បាប់លើជនល្មើសដែរ ប៉ុន្តែរហូតមកដល់ថ្ងៃទី១១ ខែកញ្ញានេះ តុលាការមិនទាន់មានចំណាត់ការអ្វីលើជនល្មើសនៅឡើយ ដែលធ្វើឱ្យគាត់បារម្ភពីសុវត្ថិភាព បើសិនជនល្មើសស្ថិតនៅក្រៅសំណាញ់ច្បាប់។
លោក ហឿន រ័ត្ន ប្រាប់ថា៖ «ចង់ឱ្យគេធ្វើតាមច្បាប់ [តុលាការកាត់ទោស] ណាមួយ ប្អូនខ្លាចថា ថ្ងៃមុខថ្ងៃក្រោយទៅ ខ្លាចគេនៅមានអំណាច គេមកធ្វើ [បាប] ពួកខ្ញុំ ឬក៏ប្អូនៗខ្ញុំបន្តទៀត»។
ជនរងគ្រោះម្នាក់ទៀត លោក ថៃ សាមាឌ និយាយថា លោក ទូច ធារ៉ា និងកូនចៅ៦នាក់ផ្សេងទៀត បានព្រួតគ្នាបង្កហិង្សាលើពួកគេទាំងពីរនាក់ បណ្តាលឱ្យរងរបួសក្បាល ជំាំមុខ និងដងខ្លួន។ ករណីនេះ លោកអំពាវនាវទៅតុលាការពន្លឿនចាត់វិធានការច្បាប់លើជនល្មើស ដើម្បីផ្តល់យុត្តិធម៌ដល់ពួកគាត់។
លោក ថៃ សាមាឌ និយាយថា៖ «ទាមទារសំណង ហើយនិងឱ្យគេ [តុលាការ] បើថាគេធ្វើល្មើសនឹងច្បាប់ ឱ្យគេផ្តន្ទាទោសតាមច្បាប់ ហើយឱ្យគេចុះកិច្ចសន្យាជាមួយខ្ញុំ ថ្ងៃក្រោយអត់មានគំនុំគុំកួនមកលើពួកខ្ញុំទៀតទេ»។
អ្នកនាំពាក្យតុលាការ លោក ចាន់ វណ្ណៈ ប្រាប់ថា តុលាការកំពុងស៊ើបអង្កេតរឿងនេះ។ នៅពេលសួរថា តើតុលាការនឹងបិទបញ្ចប់ការសាកសួរនៅពេលណា? លោក ចាន់ វណ្ណៈ សុំមិនធ្វើការបកស្រាយទេ ដោយថា បើចង់បានព័ត៌មានលម្អិត ត្រូវចុះទៅជួបលោកនៅតុលាការវិញ។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព និយាយថា ការដាក់ពិន័យផ្នែករដ្ឋបាលលើមន្ត្រីនគរបាលដែលបង្កហិង្សាលើជនរងគ្រោះ មិនទាន់គ្រប់គ្រាន់ទេ។ លោកស្រីថា តុលាការត្រូវធ្វើការស្រាវជ្រាវនិងកាត់សេចក្តីដោយឯករាជ្យ ដើម្បីកុំឱ្យរងការរិះគន់ពីមហាជន។
លោកស្រី ចក់ សុភាព ប្រាប់ថា៖ «ចំណុចសំខាន់នៃផលជះនៃការពន្យារឬក៏ការមិនយកចិត្តទុកដាក់នីតិវិធីធ្វើយ៉ាងណាដើម្បីផ្តល់យុត្តិធម៌ដល់ភាគីពាក់ព័ន្ធ វានឹងបង្កនូវបរិយាកាសដែលសង្គមយើងនូវអំពើអយុត្តិធម៌ចេះតែបន្ត ហើយយើងបន្តនូវវប្បធម៌ដែលជនល្មើសនៅតែប្រព្រឹត្តបទល្មើស [ហិង្សា]។ ដូច្នេះហើយ ជនរងគ្រោះនៅតែជនរងគ្រោះ ហើយវាបង្កនូវអសន្តិសុខសម្រាប់ប្រទេសកម្ពុជាយើង»។
អគ្គស្នងការនគរបាលជាតិ លោក នេត សាវឿន កាលពីថ្ងៃទី២៧ ខែកក្កដា ឆ្នាំ២០២០ បានចេញសេចក្តីសម្រេចផ្អាកការងារបណ្តោះអាសន្នមន្ត្រីនគរបាលជាតិទាំងនោះរួមមាន ស្នងការរងទទួលផ្ទុកផែនការងារប្រឆាំងគ្រឿងញៀន លោក ថោង វណ្ឌី, នាយការិយាល័យប្រឆាំងគ្រឿងញៀន ពៅ ជីវ័ន, នាយរងការិយាល័យប្រឆាំងគ្រឿងញៀន លោក ទូច ធារ៉ា, នាយផ្នែកនៃការិយាល័យប្រឆាំងគ្រឿងញៀន លោក ស៊ី បូ, មន្ត្រីនៃការិយាល័យប្រឆាំងគ្រឿងញៀន ហេង ចាន់រតនា, មន្ត្រីនៃការិយាល័យប្រឆាំងគ្រឿងញៀន លោក សៀក ចាន់ធឿន និងលោក យុន តារាស័ក្ត មន្ត្រីនៃការិយាល័យប្រឆាំងគ្រឿងញៀនខេត្តព្រៃវែង។ ប៉ុន្តែក្នុងសេចក្តីសម្រេចនោះ មិនបានបញ្ជាក់ពីការដាក់ទោសទណ្ឌរឿងព្រហ្មទណ្ឌនោះទេ៕