ក្រសួងសុខាភិបាលកម្ពុជា បដិសេធទាំងស្រុងចំពោះការចុះផ្សាយរបស់សារព័ត៌មានវៀតណាមដែលថា ជនជាតិវៀតណាមចំនួន៣នាក់ត្រឡប់ពីប្រទេសកម្ពុជា មានផ្ទុកជំងឺកូវីដ១៩។
អ្នកនាំពាក្យក្រសួងសុខាភិបាលកម្ពុជា លោកស្រី ឱ វណ្ណឌីន បានប្រាប់វីអូឌីតាមតេឡេក្រាមនៅថ្ងៃសុក្រនេះថា ការផ្សាយព័ត៌មានរបស់សារព័ត៌មានវៀតណាម ដែលថា មានជនជាតិវៀតណាមឆ្លងជំងឺកូវីដ១៩ពីកម្ពុជា ជារឿងមិនពិតទេ។ លោកស្រីបន្តថា ករណីនេះ ពួកគេអាចឆ្លងនៅប្រទេសវៀតណាម។
លោកស្រីបញ្ជាក់ថា៖ «ក្រសួងមិនទទួលស្គាល់នូវព័ត៌មានដែលសារព័ត៌មាននោះចុះផ្សាយទេ»។
ការច្រានចោលព័ត៌មាននេះ បានធ្វើឡើងក្រោយពីសារព័ត៌មានក្នុងស្រុកវៀតណាម VN Express បានចុះផ្សាយកាលពីថ្ងៃទី០៨ ខែកញ្ញាថា ជនជាតិវៀតណាមចំនួន៣នាក់ដែលត្រឡប់មកពីប្រទេសកម្ពុជា នៅថ្ងៃទី២៥ និងទី២៦ ខែសីហា តាមច្រកម៉ុកបៃ ខេត្តតៃនិញ បានរកឃើញថាមានផ្ទុកវីរុសកូវី១៩។
សារព័ត៌មានដដែលបានចុះផ្សាយបន្តថា ជនជាតិវៀតណាមទាំង៣នាក់នោះ រួមមាន បុរស អាយុ៣៥ឆ្នាំ និងកូនប្រុសរបស់គាត់អាយុ២ឆ្នាំ និងស្ត្រីម្នាក់ទៀត អាយុ២៦ឆ្នាំ បានធ្វើតេស្តចំនួន២លើក ក្នុងនោះការធ្វើតេស្តលើកចុងក្រោយកាលពីថ្ងៃចន្ទ ត្រូវបានរកឃើញថា វិជ្ជមានជំងឺកូវីដ១៩។
នៅថ្ងៃនេះដែរ ក្រសួងសុខាភិបាលកម្ពុជា ក៏បានអំពាវនាវឱ្យប្រជាពលរដ្ឋបន្តការប្រុងប្រយ័ត្នចំពោះការឆ្លងជំងឺកូវីដ១៩ បើទោះជាកម្ពុជាបានព្យាបាលអ្នកជំងឺកូវីដ១៩ជាសះស្បើយ ១០០ភាគរយក៏ដោយ។
អ្នកស្រី ឱ វណ្ណឌីន មានប្រសាសន៍ថា ក្រសួងនៅតែបន្តការតាមដាននិងស្រាវជ្រាវបន្ថែមទៀត ទៅលើអ្នកដែលមានទំនាក់ទំនងជាមួយអ្នកជំងឺកូវីដ១៩ ដើម្បីការពារការឆ្លងរីករាលដាលជំងឺនេះនៅក្នុងសហគមន៍។ លោកស្រី ឱ វណ្ណឌីន បន្តថា បើក្នុងករណីណាដែលរកឃើញអ្នកផ្ទុកកូវីដ១៩ភ្លាម នោះក្រសួងត្រូវបញ្ជូនពួកគេទៅដាក់ក្នុងមណ្ឌលដាច់ដោយឡែក ដោយមិនទុកពេលយូរនោះទេ។
លោកស្រីថ្លែងថា៖ «យើងត្រូវអនុវត្តឱ្យលឿនបំផុតនូវការអនុវត្តវិធានការ ការពារប្រសើរជាងព្យាបាល នេះគឺថាឱ្យលឿនមុននូវបុគ្គលណាមួយនោះមានការចម្លងវីរុសកូវីដ១៩។ ការការពារនូវវីរុសកូវីដ១៩គឺពិតជាសំខាន់ ព្រោះបច្ចុប្បន្ននេះយើងនៅតែអនុវត្តវិធានការនេះដដែល ហើយសូមឱ្យមានការការពារជានិច្ចតាមគោលការណ៍ណែនាំរបស់ក្រសួងសុខាភិបាល»។
បើតាមសេចក្តីប្រកាសរបស់ក្រសួងសុខាភិបាល គិតត្រឹមថ្ងៃទី១១ ខែកញ្ញានេះ អ្នកជំងឺកូវីដ១៩ចំនួន២៧៤នាក់ដែលបានរកឃើញនៅកម្ពុជា បានជាសះស្បើយទាំងអស់ហើយ និងមិនមានករណីវិជ្ជមានណាមួយរកឃើញទៀតឡើយ៕