កម្ពុជាបានប្រកាសពីការព្យាបាលជាសះស្បើយអ្នកជំងឺកូវីដ១៩ទាំងអស់នៅថ្ងៃនេះ ខណៈដែលប្រទេសនេះពុំបានរកឃើញករណីឆ្លងថ្មីអស់រយៈពេលជិតកន្លះខែមកហើយ។
ក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ ក្រសួងសុខាភិបាលបានប្រកាសថា អ្នកជំងឺកូវីដ១៩ដែលស្ថិតក្រោមការព្យាបាលចុងក្រោយគេ ត្រូវបានព្យាបាលជាសះស្បើយហើយ ដែលនាំឱ្យប្រទេសនេះព្យាបាលអ្នកជំងឺជាសះស្បើយទាំងស្រុង១០០ភាគរយ។
បើតាមក្រសួងសុខាភិបាល អ្នកជំងឺកូវីដ១៩ដែលត្រូវបានព្យាបាលជាសះស្បើយចុងក្រោយគេកាលពីថ្ងៃម្សិលមិញនេះ គឺជាបុរសជនជាតិឥណ្ឌូនេស៊ី អាយុ១៨ឆ្នាំ ដែលបានធ្វើដំណើរពីប្រទេសឥណ្ឌូនេស៊ីឆ្លងកាត់ម៉ាឡេស៊ីមុននឹងមកដល់កម្ពុជា នៅថ្ងៃទី៣០ ខែកក្កដាកន្លងមកនេះ។
បុរសឥណ្ឌូនេស៊ីរូបនេះ ស្នាក់នៅភូមិ២ សង្កាត់មិត្តភាព ក្នុងខេត្តព្រះសីហនុ ត្រូវបានធ្វើតេស្តនិងរកឃើញឆ្លងវីរុសកូរ៉ូណាមួយថ្ងៃក្រោយពីវិលត្រឡប់មកដល់កម្ពុជា។
មនុស្សដល់ទៅ២៧៤នាក់ ត្រូវបានធ្វើតេស្តនិងរកឃើញឆ្លងវីរុសកូរ៉ូណានៅទូទាំងប្រទេស ប៉ុន្តែក្រសួងសុខាភិបាលបានប្រកាសថា ពួកគេបានជាសះស្បើយទាំងស្រុងនិងត្រូវបានអនុញ្ញាតឱ្យចាកចេញពីមន្ទីរពេទ្យហើយ។
ក្រសួងសុខាភិបាលបានប្រកាសពីការរកមិនឃើញករណីឆ្លងថ្មីអស់រយៈពេល១១ថ្ងៃមកហើយ ចាប់តាំងពីថ្ងៃទី៣១ ខែសីហា ជាថ្ងៃដែលកម្ពុជារកឃើញករណីឆ្លងចុងក្រោយគេ។
អ្នកឆ្លងវីរុសកូរ៉ូណាទាំងអស់ ត្រូវបានព្យាបាលជាសះស្បើយអស់ម្ដងរួចមកហើយកាលពីថ្ងៃទី១៥ ខែឧសភា នៅពេលស្ត្រីកម្ពុជាម្នាក់ វ័យ៣៦ឆ្នាំ ត្រូវបានព្យាបាលជាសះស្បើយចុងក្រោយគេ៕
