អភិបាលខេត្តកណ្តាល បានឲ្យដឹងថា កម្ពុជាកំពុងតែពិនិត្យលើនីតិវិធី ដើម្បីទាមទារឲ្យភាគីវៀតណាមរុះរើសំណង់រឹង ដែលសង់នៅតាមខ្សែបន្ទាត់ព្រំដែនចំនួន៦ទីតាំង។
អភិបាលខេត្តកណ្តាលលោក លោក គង់ សោភ័ណ្ឌ ប្រាប់វីអូឌីនៅថ្ងៃ១២ ខែកញ្ញានេះថា យោធាវៀតណាមបានសង់តង់ថ្មីជាសំណង់រឹង នៅតាមខ្សែបន្ទាត់ព្រំដែនជាប់កម្ពុជា ស្ថិតនៅក្នុងស្រុកលើកដែក ខត្តកណ្តាល ចំនួន៦ទីតាំង ដែលជាតំបន់មិនទាន់ឯកភាពគ្នា។ ករណីនេះ លោកថា ក្រុមការងារជំនាញកំពុងធ្វើការងារនេះតាមនីតិវិធីច្បាប់ ដើម្បីទាមទារឲ្យវៀតណាមរុះរើតង់ចេញពីតំបន់មិនទាន់ឯកភាពគ្នា។
សំណង់ដែលវៀតណាមសង់នោះ ធ្វើពីឈើសសរថ្ម កម្ពស់៣ម៉ែត្រ ទំហំ៥ម៉ែត្រគុណនឹង៤ម៉ែត្រ ដំបូលប្រក់ស័ង្កសី ដោយឃ្លាតពីខ្សែបន្ទាត់ព្រំដែនរវាងកម្ពុជា-វៀតណាមដែលមិនទាន់ឯកភាពគ្នា ចម្ងាយប្រមាណ១២០ម៉ែត្រ ខណៈកន្លងមក មានកិច្ចព្រមព្រៀងគ្នាថា ការសាងសង់សំណង់រឹងណាមួយតាមបន្ទាត់ព្រំដែនគោកចាប់ពី១៥០ម៉ែត្រទៅ ត្រូវមានការឯកភាពគ្នា។
បើពិនិត្យលើស្ថានភាពដែលយោធាវៀតណាមបោះតង់ចំនួន២៥៦កន្លែងតាំងពីដើមឆ្នាំ២០២០ នៅក្បែរព្រំដែន ដែលផ្ទុយពីកិច្ចព្រមព្រៀងរវាងប្រទេសទាំងពីរ គឺភាគីកម្ពុជាក៏បានធ្វើកិច្ចការងារនេះជាបន្តបន្ទាប់ រួមទាំងការធ្វើកំណត់ទូត កោះហៅឯកអគ្គរដ្ឋទូតវៀតណាមឱ្យបំភ្លឺ និងការចុះទៅទីតាំងយោធាវៀតណាមដោយផ្ទាល់ ដើម្បីឱ្យវៀតណាមរុះរើតង់ និងសំណង់រឹងទាំងនោះចេញ។ ប៉ុន្តែជាលទ្ធផល វៀតណាមមិនបានរើចេញទេ ហើយថែមទាំងដូរពីតង់ទៅជាការសាងសង់សំណង់រឹងថែមទៀត។
គិតមកត្រឹមដើមខែកញ្ញានេះ សំណង់រឹងរបស់វៀតណាមសាងសង់ជាបន្តបន្ទាប់ កើនដល់៦កន្លែងហើយ៕
