រដ្ឋបាលខេត្តព្រះសីហនុបានបដិសេធការស្នើរបស់មន្ត្រីជាន់ខ្ពស់មួយរូបនៅក្រសួងមហាផ្ទៃក្នុងការកំណត់ព្រំដីទំហំ១២ហិកតានៅក្នុងស្រុកព្រៃនប់ ហើយណែនាំឱ្យមន្ត្រីរូបនោះបញ្ឈប់បន្ទាន់នូវសកម្មភាពទន្ទ្រានកាន់កាប់ដីសាធារណៈរបស់រដ្ឋ។
ក្នុងលិខិតរបស់រដ្ឋបាលខេត្តព្រះសីហនុ ចុះហត្ថលេខាដោយលោក គួច ចំរើន កាលពីខែកុម្ភះឆ្នាំ២០២០ ហើយទើបផ្សព្វផ្សាយនៅខែកញ្ញានេះ បានបញ្ជាក់ថា កាលពីខែសីហាឆ្នាំ២០១៩ លោក អេង គឹមហៃ បានស្នើទៅសាលាខេត្តដើម្បីកំណត់ព្រំ និងធ្វើរបងលើដីទំហំជាង១២ហិកតា នៅភូមិពូធឿង ឃុំបិតត្រាំង ស្រុកព្រៃនប់។
សំណើនេះ ត្រូវសាលាខេត្តបដិសេធ ហើយណែនាំឱ្យលោក អេង គឹមហៃ បញ្ឈប់ការទន្ទ្រានកាន់កាប់ដីសាធារណៈរបស់រដ្ឋ។
លិខិត៖«រដ្ឋបាលខេត្តព្រះសីហនុ សូមធ្វើការណែនាំលោក ត្រូវតែបញ្ឈប់សកម្មភាពទន្ទ្រានកាន់កាប់ដីសាធារណៈរបស់រដ្ឋដោយខុសច្បាប់ និងចាកចេញពីទីតាំង ព្រមតាំងទុកទីតាំងខាងលើនេះ ជូនខណ្ឌរដ្ឋបាលព្រៃឈើខេត្តព្រះសីហនុជាគ្រប់គ្រងបន្តចាប់ពីថ្ងៃជូនដំណឹង»។
លោក អេង គឹមហៃ ជាមន្ត្រីផ្កាយ៣កាន់តួនាទីជាអគ្គនាយករងភស្តុភានៃក្រសួងមហាផ្ទៃ។
សាលាខេត្តព្រះសីហនុបញ្ជាក់មូលហេតុដែលបដិសេធសំណើលោក អេង គឹមហៃ ព្រោះថាដីនៅតំបន់នោះដាក់ជាតំបន់គម្របផ្ទៃឈើត្រូវអភិរក្សតាំងពីឆ្នាំ២០០២៕
