មន្ត្រីរដ្ឋបាលខេត្តព្រះសីហនុ ឱ្យដឹងថា ក្នុងខែសីហា មានជនជាតិចិនប្រមាណជាង៥០០០នាក់ ដែលបានហោះហើរទៅកាន់ខេត្តព្រះសីហនុ ដើម្បីធ្វើជំនួញ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ មានប្រសាសន៍នៅថ្ងៃចន្ទនេះថា ការចេញចូលរបស់អ្នកជំនួញចិនមកកាន់កម្ពុជា ជាពិសេសនៅខេត្តព្រះសីហនុនេះ ជាសញ្ញាវិជ្ជមានសម្រាប់កំណើនសេដ្ឋកិច្ចក្នុងខេត្តអំឡុងពេលពិភពលោកជួបវិបត្តិជំងឺកូវីដ១៩។
លោកបានថ្លែងថា៖ «យ៉ាងហោចណាស់ គាត់ចូលមកក៏បីជើង [ជើងហោះហើរក្នុងមួយសប្តាហ៍] វាជាសញ្ញាវិជ្ជមានមួយដែរ ដែលពួកគេចេញចូលមករកស៊ីនៅ [ខេត្តយើង] ហើយពួកគេមកបន្តការរកស៊ីឬធ្វើកិច្ចការរបស់ខ្លួន»។
ទោះជាយ៉ាងណា លោក ឃាង ភារម្យ បានលើកឡើងដែរថា ស្របពេលដែលមានកំណើនជនបរទេសមកកាន់ខេត្តនេះ បទល្មើសក៏មានការកើនឡើងផងដែរ ប៉ុន្តែអាជ្ញាធរខេត្តបានខិតខំក្នុងការទប់ស្កាត់និងបង្ក្រាបបានជាបន្តបន្ទាប់។
លោកបានបញ្ជាក់ថា៖ «មានការកើនឡើងឬថយចុះទៅតាមស្ថានភាពកំណើននៃជនបរទេស ដូចជា អ្នករកស៊ីមួយចំនួនដែលចេញចូលៗ។ បទល្មើសមួយចំនួនគឺប្រព្រឹត្តដោយជនបរទេស ហើយសមត្ថកិច្ចក្រោមថ្នាក់ដឹកនាំបញ្ជាការឯកភាពខេត្ត ក៏យើងបង្ក្រាបបានជាបន្តបន្ទាប់ អ៊ីចឹងបានដាក់ផែនការក្នុងការការពារសន្តិសុខសណ្តាប់ធ្នាប់ជូនប្រជាជន។ យើងឃើញហើយថ្មីៗមានបទល្មើសច្រើន តែយើងគ្រប់គ្រងបាន»៕