សមត្ថកិច្ចរាជធានីភ្នំពេញ បានឃាត់ខ្លួនមនុស្ស៤នាក់ដើម្បីយកទៅធ្វើការសាកសួរ បន្ទាប់ពីចុះបង្ក្រាបទីតាំងផលិតឡេក្លែងក្លាយមួយកន្លែង ស្ថិតនៅមុខវិទ្យាល័យទួលអំពិល ភូមិបុរីកម្មករ សង្កាត់ជើងឯក ខណ្ឌដង្កោ។
គេហទំព័រអគ្គស្នងការដ្ឋាននគរបាលជាតិ ចុះផ្សាយកាលពីថ្ងៃអាទិត្យ ឱ្យដឹងថា សមត្ថកិច្ចចម្រុះ ដោយមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ បានចុះបង្ក្រាបទីតាំងផលិតឡេក្លែងក្លាយមួយកន្លែងកាលពីម្សិលមិញ ដោយឃាត់ខ្លួនមនុស្សចំនួន៤នាក់ដើម្បីសាកសួរ ខណៈម្ចាស់ទីតាំងឈ្មោះ វីង ជីហេង បានរត់គេចខ្លួនមុនសមត្ថកិច្ចចុះបង្ក្រាប។
អគ្គស្នងការដ្ឋានបន្តថា សមត្ថកិច្ចបានបិទទីតាំងនោះជាបណ្តោះអាសន្ន ដើម្បីរង់ចាំបន្តនីតិវិធី។
វីអូឌី មិនអាចសុំការបញ្ជាក់បន្ថែមពីស្នងការរងនៃស្នងការដ្ឋាននគរបាលរាជធានីភ្នំពេញ លោក ពិត បញ្ញា បានទេ ដោយទូរសព្ទចូលគ្មានអ្នកទទួល។
ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀច សុផាន់ណា មានប្រសាសន៍នៅថ្ងៃចន្ទនេះថា លោកមិនទាន់ទទួលបានរបាយការណ៍លម្អិតពីសមត្ថកិច្ចដែលចុះបង្ក្រាបករណីនេះនៅឡើយ។
លោកថា៖ «គេកំពុងសាកសួរព័ត៌មានដំណើរការតាមនីតិវិធីច្បាប់ឱ្យគ្រប់គ្រាន់សិន ប្រមូលសំណុំរឿង ប្រមូលភស្តុតាងសិន ខ្ញុំមិនទាន់ដឹងដែរ [បុរស៤នាក់] ខ្ញុំមិនទាន់ទទួលបានព័ត៌មានចុងក្រោយទេ ព្រោះគេកំពុងដំណើរការស៊ើបអង្កេត។ អ៊ីចឹងខ្ញុំក៏មិនទាន់ដឹងដែរ ទាល់តែរបាយការណ៍គេធ្វើចប់សព្វគ្រប់ បានគេបញ្ជូនមកឱ្យខ្ញុំថាត្រូវធ្វើម៉េច បញ្ជូនទៅតុលាការឬរបៀបម៉េច»។
បើតាមរបាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានឱ្យដឹងថា ក្នុងឆ្នាំ២០១៨ សមត្ថកិច្ចបានរឹបអូសទំនិញក្លែងក្លាយហើយដុតបំផ្លាញចោលបន្តបន្ទាប់ដែលមានជាង២០០តោន ខណៈនៅដើមឆ្នាំ២០១៩នេះ សមត្ថកិច្ចក៏បានចុះបង្រ្កាបបានទំនិញក្លែងក្លាយរាប់រយតោនផងដែរ៕