ក្រសួងការងារ និងបណ្តុះបណ្តាលវិជ្ជាជីវៈ អនុញ្ញាតឱ្យគ្រឹះស្ថានអប់រំ បណ្តុះបណ្តាលបច្ចេកទេស និងវិជ្ជាជីវៈ បើកដំណើរការឡើងវិញ ចាប់ពីដើមសប្តាហ៍ក្រោយទៅ ប៉ុន្តែត្រូវគោរពតាមវិធានការសុខាភិបាល។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃចន្ទនេះ បានលើកឡើងថា សាលាបណ្តុះបណ្តាលវិជ្ជាជីវៈដែលស្ថិតក្រោមឱវាទរបស់ក្រសួង ត្រូវបានអនុញ្ញាតឱ្យបើកដំណើរការឡើងវិញ ចាប់ពីថ្ងៃទី២១ ខែកញ្ញា។
សេចក្តីជូនដំណឹងបន្តថា ចំពោះការបើកដំណើរការឡើងវិញ សាលាបណ្តុះបណ្តាលវិជ្ជាជីវៈទាំងអស់ ត្រូវគោរពឱ្យបានខ្ជាប់ខ្ជួននូវវិធានការសុខាភិបាល ដើម្បីធានាបាននូវសុវត្ថិភាពនិងប្រសិទ្ធភាព ជាពិសេសត្រូវពង្រឹងវិធានការការពារ ទប់ស្កាត់ និងឆ្លើយតបការរីករាលដាលជំងឺកូវីដ១៩របស់ក្រសួងសុខាភិបាល។
សេចក្តីជូនដំណឹងរបស់ក្រសួង ក៏បានលើកទឹកចិត្តឱ្យបុគ្គលិក មន្ត្រីរាជការ គ្រូ សិក្ខាកាម និងសិស្សនិស្សិត និងអ្នកពាក់ព័ន្ធ យកទឹកស្អាតមកពីផ្ទះសម្រាប់ទទួលទានផ្ទាល់ខ្លួននិងវិធានការអនាម័យមួយចំនួនទៀតផងដែរ។
បើតាមការឱ្យដឹងពីក្រសួងក្នុងការបើកឡើងវិញនេះ គ្រឹះស្ថានសិក្សាតម្រូវឱ្យមានការបោសសម្អាតថែរក្សាអនាម័យឱ្យបានត្រឹមត្រូវ រៀបចំកៅអីអង្គុយឱ្យមានគម្លាតយ៉ាងតិច១,៥ម៉ែត្រ និងបាញ់ថ្នាំសម្លាប់មេរោគក្នុងគ្រឹះស្ថានផងដែរ៕
