ប្រជាជនមួយចំនួននៃទីក្រុងយ៉ាំងហ្គោន ដែលជាទីក្រុងធំបំផុតរបស់មីយ៉ាន់ម៉ា បានប្រើបំណែកឈើនិងដែកថែបដើម្បីធ្វើជារបាំងនៅជុំវិញសង្កាត់របស់ពួកគេកាលពីល្ងាចថ្ងៃសុក្រសប្ដាហ៍មុន ដើម្បីការពារខ្លួនរបស់ពួកគេពីការឆ្លងនៃជំងឺកូវីដ១៩ ខណៈប្រទេសនេះកំពុងទទួលរងនូវការឆ្លងរីករាលដាល។
ប្រទេសនៅតំបន់អាស៊ីអាគ្នេយ៍មួយនេះ បានរាយការណ៍ថា មានករណីឆ្លងវីរុសកូរ៉ូណាសរុបចំនួន២,៦២៥ករណី ក្នុងនោះមានអ្នកស្លាប់ចំនួន១៥នាក់។ ចំនួននៃការឆ្លងបានកើនឡើងបួនដងចាប់តាំងពីពាក់កណ្តាលខែសីហា នៅពេលដែលវីរុសនេះបានរាតត្បាតនៅភាគខាងលិចរដ្ឋរ៉ាក់ឃីន បន្ទាប់ពីគ្មានករណីជំងឺឆ្លងក្នុងស្រុកប៉ុន្មានសប្តាហ៍មក។
ភាគច្រើននៃករណីថ្មីៗនេះ បានកើតឡើងនៅក្នុងទីក្រុងយ៉ាំងហ្គោនដែលជារដ្ឋធានីពាណិជ្ជកម្មនិងជាទីក្រុងធំបំផុតរបស់ប្រទេសភូមា។ អ្នកស្រុកបានចាប់ផ្តើមដាក់របាំងបិទផ្លូវបណ្តោះអាសន្ន ដើម្បីបញ្ឈប់ប្រជាជនចេញចូលស្រុករបស់ពួកគេដោយសេរី។
កាលពីសប្តាហ៍មុន មន្រ្តីអាជ្ញាធរបានចេញបទបញ្ជាឱ្យប្រជាជនទាំងអស់ធ្វើការស្នាក់នៅក្នុងផ្ទះរបស់ខ្លួន ហើយក្រុមហ៊ុនអាកាសចរណ៍និងឡានក្រុង បានផ្អាកសេវាកម្មរបស់ខ្លួនក្នុងនិងក្រៅទីក្រុង។
លោក អ៊ួង ចាវមិន (Aung Zaw Min) ប្រធានសង្កាត់មួយក្នុងសង្កាត់ Kyimyidaing ដែលកំពុងយាមរបាំងមួយក្នុងចំណោមរបាំងទាំងនោះ បាននិយាយថា អ្នកស្រុកមិនបានយកចិត្តទុកដាក់ក្នុងការការពារវីរុសនេះឱ្យបានល្អទេ បន្ទាប់ពីមានអត្រាឆ្លងទាបកាលពីមុន។
លោក អ៊ួង ចាវមិន បាននិយាយថា៖ «ឥលូវនេះយើងត្រូវតែដឹងថា យើងមិនអាចមើលស្រាលចំពោះការឆ្លងមេរោគដ៏ធំដែលបង្កឡើងដោយរដ្ឋ Sittwe»។
លោកសំដៅដល់រដ្ឋធានីរ៉ាក់ឃីនដែលជាកន្លែងដែលមេរោគឆ្លងត្រូវបានរកឃើញនាពេលថ្មីៗនេះ។
របាំងទាំងអស់នោះត្រូវបានសាងសង់ឡើងដោយគ្មានការអនុញ្ញាតពីអាជ្ញាធរមូលដ្ឋានឡើយ ដោយបច្ចុប្បន្នរបាំងធំៗមួយចំនួនត្រូវបានបញ្ជាឱ្យរុះរើចេញវិញ ខណៈរបាំងមួយចំនួនទៀតត្រូវបានរក្សាទុកដដែលកាលពីថ្ងៃសៅរ៍កន្លងមកនេះ។
អ្នកប្រើប្រាស់បណ្តាញសង្គមមួយចំនួន បានសើចចំអកការដាក់របាំងការពារនេះ ដោយលេងសើចថា អ្នកស្រុកដែលរស់នៅទីនោះបានប្រែក្លាយសង្កាត់ទីក្រុងរបស់ខ្លួនទៅជា «សាធារណរដ្ឋតូច»។
លោក លូ ចាវអ៊ូ (Luo Zaw Oo) បាននិយាយដោយឈរនៅលើផ្លូវមួយដែលត្រូវបានបិទកាលពីថ្ងៃសៅរ៍ថា៖ «វាដូចជាច្រកព្រំដែនរវាងកូរ៉េខាងត្បូងនិងកូរ៉េខាងជើង។ របាំងទាំងនេះដូចជាមិនមានភាពចាំបាច់ទេ»។
ក្រសួងសុខាភិបាលភូមាបាននិយាយថា ក្នុងចំណោមអ្នកឆ្លងថ្មី១៨០ករណីដែលត្រូវបានរាយការណ៍កាលពីថ្ងៃសៅរ៍កន្លងមកនេះ អ្នកឆ្លងវីរុសកូរ៉ូណា១២៤ករណីត្រូវបានរកឃើញនៅទីក្រុងយ៉ាំងហ្គោន៕
