សហរដ្ឋអាមេរិក លើកឡើងថា ខ្លួនបានបង្កើនការគាំទ្រដល់ប្រទេសជាដៃគូក្នុងតំបន់ទន្លេមេគង្គ ក្នុងនោះមានទាំងកម្ពុជាផងដែរ ដើម្បីដោះស្រាយបញ្ហាប្រឈមបន្ទាន់ ខណៈប្រទេសក្នុងតំបន់នេះប្រឈមបញ្ហាមួយចំនួនរួមទាំងបញ្ហាទឹក។
លើគេហទំព័ររបស់ខ្លួន ស្ថានទូតអាមេរិកប្រចាំកម្ពុជា បានលើកឡើងកាលពីថ្ងៃអាទិត្យថា សហរដ្ឋអាមេរិកកំពុងបង្កើនការគាំទ្រដល់ប្រទេសកម្ពុជា ឡាវ ភូមា ថៃ និងវៀតណាម ដោយថា ប្រទេស៥នេះជាដៃគូរបស់ខ្លួននៅតំបន់ទន្លេមេគង្គ។
អាមេរិកថា៖ «យើងកំពុងធ្វើការសហការគ្នា ដើម្បីរកដំណោះស្រាយចំពោះបញ្ហាប្រឈមបន្ទាន់ តាមរយៈភាពជាដៃគូរវាងតំបន់ទន្លេមេគង្គនិងសហរដ្ឋអាមេរិក»។
ប៉ុន្តែស្ថានទូតអាមេរិកពុំបានលម្អិតអំពីបញ្ហាប្រឈមជាក់លាក់ដែលរដ្ឋាភិបាលអាមេរិកមើលឃើញកំពុងកើតឡើងនៅក្នុងតំបន់នេះទេ និងរបៀបដែលរដ្ឋាភិបាលអាមេរិកនឹងជួយដល់បណ្ដាប្រទេសនៅក្នុងតំបន់ទន្លេមេគង្គនោះឡើយ។
ទោះជាយ៉ាងណា ការធ្លាក់ចុះនៃកម្រិតទឹកទន្លេមេគង្គរយៈពេលពីរបីឆ្នាំចុងក្រោយនេះ គឺជាចំណោទរួមរបស់រដ្ឋាភិបាលបណ្ដាប្រទេសនៅតាមដងទន្លេមេគង្គ ក្នុងនោះរួមទាំងកម្ពុជាផងដែរ។
គណៈកម្មាធិការជាតិទន្លេមេគង្គកម្ពុជា (MRC) កាលពីខែមករាឆ្នាំនេះ បានចេញរបាយការណ៍ស្រាវជ្រាវមួយ លើកឡើងពីកង្វល់ជុំវិញការអភិវឌ្ឍធនធានទឹកនៃទន្លេមេគង្គ ដែលថា វាបានបង្កផលប៉ះពាល់ជាអវិជ្ជមានមកលើបរិស្ថាននិងសង្គម «ជាពិសេសផលប៉ះពាល់ឆ្លងដែន ដែលត្រូវគិតគូរដោះស្រាយឱ្យបានគ្រប់ជ្រុងជ្រោយ»។
ស្ថាប័នអន្តររដ្ឋាភិបាលមួយនេះ និយាយថា វារីអគ្គិសនីគឺជាបញ្ហាប្រឈមមួយនៅក្នុងចំណោមបញ្ហាប្រឈមដទៃទៀត ដូចជា បម្រែបម្រួលអាកាសធាតុ គ្រោះមហន្តរាយធម្មជាតិ កំណើនប្រជាជនជាដើម ខណៈបច្ចុប្បន្នចិនបានសាងសង់ទំបន់វារីអគ្គិសនីនេះចំនួន១១ដែលទំនប់ទាំងនោះកំពុងដំណើរការ។
មួយវិញទៀត ក្នុងកិច្ចប្រជុំកំពូលលើកទី៣មេគង្គ-ឡានឆាងតាមប្រព័ន្ធវីដេអូអនឡាញ កាលពីថ្ងៃទី២៤ ខែសីហា លោកនាយករដ្ឋមន្ត្រី ហ៊ុន សែន ថ្លែងថា ការស្រុះស្រួលគ្នារកដំណោះស្រាយទឹកទន្លេមេគង្គ ដែលលោកហៅថា «ទឹកឆ្លងដែន» គឺជាជោគជ័យដ៏សំខាន់បំផុតមួយទៀតនៃកិច្ចសហប្រតិបត្តិការមេគង្គ-ឡានឆាង។
ក្នុងកិច្ចប្រជុំនោះ នាយករដ្ឋមន្ត្រីចិន លោក លី ឃឹឈាង បង្ហាញការប្តេជ្ញាចិត្តថា៖ «ចិននឹងខិតខំបន្ថែមទៀតក្នុងការបញ្ចេញទឹកក្នុងរដូវប្រាំងដល់អ្នកនៅខាងក្រោមទន្លេមេគង្គ ដើម្បីដោះស្រាយបញ្ហារាំងស្ងួត ដោយយកវិស័យធនធានទឹកធ្វើជាយន្តការស្នូលសម្រាប់ពង្រឹងកិច្ចសហប្រតិបត្តិការជាមួយប្រទេសជាសមាជិក»៕
