គណៈកម្មាធិការជាតិសុវត្ថិភាពចរាចរណ៍ផ្លូវគោក អំពាវនាវដល់ប្រជាពលរដ្ឋទាំងអស់ បង្កើនការប្រុងប្រយ័ត្ននិងរក្សាសុវត្ថិភាពក្នុងការធ្វើចរាចរណ៍អំឡុងបុណ្យភ្ជុំបិណ្ឌ។
សេចក្តីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក នៅថ្ងៃអង្គារនេះ បានលើកឡើងថា ពិធីបុណ្យកាន់បិណ្ឌ ភ្ជុំបិណ្ឌ បាននិងកំពុងតែប្រព្រឹត្តទៅចាប់ពីថ្ងៃទី៣ ដល់ថ្ងៃទី១៨ ខែកញ្ញា ដែលអំឡុងពេលនេះ ប្រជាពលរដ្ឋអាចនឹងមានសកម្មភាពធ្វើចរាចរណ៍ទៅកាន់ទីវត្តអារាម ស្រុកកំណើត និងកន្លែងកម្សាន្តនានាយ៉ាងមមាញឹក ហើយក៏អាចមានកំណើនគ្រោះថ្នាក់ចរាចរណ៍ផងដែរ។
ស្របពេលនេះ គណៈកម្មាធិការជាតិ បានអំពាវនាវដល់ប្រជាពលរដ្ឋទាំងអស់ យកចិត្តទុកដាក់រក្សាសុវត្ថិភាពក្នុងការធ្វើចរាចរណ៍ ដើម្បីចូលរួមបង្ការនិងទប់ស្កាត់គ្រោះថ្នាក់ចរាចរណ៍ផ្លូវគោក។ គណៈកម្មាធិការជាតិ ក៏បានណែនាំដល់រថយន្តដឹកអ្នកដំណើរឬរថយន្តដឹកទំនិញ កុំផ្ទុកមនុស្សឬទំនិញលើសច្បាប់កំណត់ ជាពិសេសរថយន្តដឹកអ្នកដំណើរ មិនត្រូវផ្ទុកមនុស្សនៅលើដំបូលនិងកុំដំឡើងថ្លៃសំបុត្រធ្វើដំណើរ។
គណៈកម្មាធិការជាតិ បន្តណែនាំដល់អ្នកបើកបរយានយន្តនិងអ្នករួមដំណើរទាំងអស់ ត្រូវគោរពច្បាប់ស្តីពីចរាចរណ៍ផ្លូវគោក ដូចជា ត្រូវពាក់ខ្សែក្រវាត់សុវត្ថិភាព ពាក់មួកសុវត្ថិភាព ត្រួតពិនិត្យលក្ខណៈបច្ចេកទេសយានជំនិះរបស់ខ្លួនមុនពេលធ្វើចរាចរណ៍ និងមិនត្រូវបើកបរក្នុងស្ថានភាពស្រវឹងឬសារធាតុញៀនជាដើម។
គណៈកម្មាធិការជាតិ បានបញ្ជាក់ថា៖ «នៅពេលបើកបរត្រូវប្រកាន់ខ្ជាប់នូវសុជីវធម៌ សីលធម៌ និងការយោគយល់អធ្យាស្រ័យទៅវិញទៅមក ដើម្បីទប់ស្កាត់គ្រោះថ្នាក់ឬសម្រួលស្ថានភាពកកស្ទះចរាចរណ៍»។
បើតាមសេចក្តីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ ក្នុងរយៈពេល៨ខែឆ្នាំនេះ ប្រៀបធៀបនឹងរយៈពេលដូចគ្នាកាលពីឆ្នាំមុន ករណីគ្រោះថ្នាក់ចរាចរណ៍មានការថយចុះចំនួន៦៦៧លើក ស្មើ២៤ភាគរយ អ្នកស្លាប់ថយចុះចំនួន២១៥នាក់ ស្មើ១៦ភាគរយ និងអ្នករបួសថយចុះចំនួន១០១០នាក់ ស្មើ២៤ភាគរយ៕
