ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋដែលរស់នៅតាមតំបន់ជាប់ផ្លូវទឹកនិងជាប់ជួរភ្នំ រួមនឹងតំបន់មាត់សមុទ្រ មានការប្រុងប្រយ័ត្នខ្ពស់ចំពោះបាតុភូតធម្មជាតិដែលអាចបង្កជាជំនន់ទឹកភ្លៀងនិងសមុទ្រមានរលកខ្ពស់។
សេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី១៥ ខែកញ្ញានេះ បានឱ្យដឹងថា តាមការព្យាករអាកាសធាតុ ចាប់ពីថ្ងៃទី១៦ ដល់ថ្ងៃទី២២ ខែកញ្ញា សម្ពាធទាបមួយនឹងវិវត្តទៅជាកូនព្យុះ ឆ្លងកាត់ប្រទេសហ្វីលីពីន និងបន្តដំណើរទៅឈូងសមុទ្រគុងកឹង រួចចូលប្រទេសវៀតណាមភាគកណ្តាល។
ក្រសួងបន្តថា ស្ថានភាពបែបនេះ នឹងធ្វើឱ្យកម្ពុជាមានភ្លៀងធ្លាក់រាយប៉ាយពីតិចទៅច្រើននៅតាមបណ្តាខេត្តតំបន់វាលទំនាបកណ្តាល តំបន់ភ្នំដងរែកនិងខ្ពង់រាបឦសាន និងតំបន់មាត់សមុទ្រ។
ករណីនេះ ក្រសួងក៏បានអំពាវនាវដល់ប្រជាពលរដ្ឋនៅតំបន់ជាប់ផ្លូវទឹកនិងជាប់ជួរភ្នំ មានការប្រុងប្រយ័ត្នចំពោះជំនន់ទឹកភ្លៀង ខណៈអ្នកដំណើរនិងអ្នកនេសាទសមុទ្រ ត្រូវប្រុងប្រយ័ត្នភ្លៀងខ្យល់និងរលកសមុទ្រដែលអាចមានកម្ពស់ខ្ពស់ចាប់ពីថ្ងៃទី១៨ ដល់ថ្ងៃទី២១ ខែកញ្ញា៕