ក្រសួងសុខាភិបាល ណែនាំដល់អាជ្ញាធររាជធានី-ខេត្ត ពង្រឹងវិធានការសុខាភិបាល ទប់ស្កាត់ការចម្លងជំងឺផ្តាសាយធំនិងវីរុសផ្សេងៗ ជាពិសេសក្នុងអំឡុងពេលបុណ្យកាន់បិណ្ឌនិងភ្ជុំបិណ្ឌ។
ក្នុងលិខិតរបស់រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ផ្ញើទៅអភិបាលរាជធានី-ខេត្តទាំងអស់ កាលពីថ្ងៃទី១៤ ខែកញ្ញា បានលើកឡើងថា កន្លងមក មានការចម្លងជំងឺផ្តាសាយធំនៅតាមវត្តអារាម ដូចជា នៅខេត្តតាកែវ ត្បូងឃ្មុំ និងខេត្តបាត់ដំបង ដែលមានព្រះសង្ឃជាច្រើនអង្គ មានអាពាធដោយមានរោគសញ្ញាក្តៅព្រះកាយលើសពី៣៧,៥អង្សា ក្អក និងហៀរសំបោរជាដើម។
ករណីនេះ លោករដ្ឋមន្ត្រី បានក្រើនរំឭកជាថ្មីប្រគេនដល់ព្រះសង្ឃ គណៈកម្មការវត្ត និងប្រជាពលរដ្ឋទាំងអស់ ត្រូវយកចិត្តទុកដាក់ពង្រឹងវិធានការអនាម័យ ដើម្បីការពារព្រះកាយ ការពារខ្លួន និងក្រុមគ្រួសារ ពីការចម្លងវីរុសកូវីដ១៩ ការចម្លងគ្រុនផ្តាសាយធំ និងការចម្លងជំងឺផ្សេងៗទៀត។
ក្នុងលិខិតលោករដ្ឋមន្ត្រី ម៉ម ប៊ុនហេង បានណែនាំនូវវិធានការសាមញ្ញៗមួយចំនួន ដើម្បីការពារការចម្លងជំងឺផ្តាសាយធំនិងវីរុសផ្សេងៗ ដូចជា រក្សាអនាម័យដៃស្អាតជានិច្ច និងអនាម័យចំណីអាហារ ពាក់ម៉ាស់ក្នុងករណីចាំបាច់ ជាពិសេសពេលចូលទៅកាន់វត្តអារាមដែលមានមនុស្សច្រើន និងរក្សាគម្លាតសុវត្ថិភាព។
លោកបានគូសបញ្ជាក់ថា៖ «ព្រះសង្ឃអាពាធឬបុគ្គលឈឺ មានរោគសញ្ញាផ្តាសាយឬមិនស្រួលខ្លួន ត្រូវសម្រាកនៅក្នុងកុដិឬនៅក្នុងទីកន្លែងដាច់ដោយឡែក ដោយមិនត្រូវចូលរួមក្នុងពិធីជួបជុំក្នុងសាលាឆាន់ឬទទួលទេយ្យវត្ថុនៅក្នុងទីកន្លែងណាមួយនៃវត្តអារាម ដែលអាចបង្កឱ្យមានការចម្លងបន្តគ្នាពីមនុស្សម្នាក់ទៅមនុស្សម្នាក់ទៀត»។
ស្របពេលគ្នានេះដែរ នៅខេត្តបន្ទាយមានជ័យ ក៏មានករណីព្រះសង្ឃជាង២០អង្គ គង់នៅវត្តបឹងប្រស់ ឃុំភ្នំតូច ស្រុកអង្គរបុរី មានអាពាធ ដោយមានរោគសញ្ញាគ្រុនក្តៅ ឈឺក្បាល វិលមុខ និងពិបាកដកដង្ហើម ចាប់តាំងពីថ្ងៃទី១៣ ខែកញ្ញា ផងដែរ។
អភិបាលខេត្តបន្ទាយមានជ័យ លោក អ៊ុំ រាត្រី មានប្រសាសន៍នៅថ្ងៃអង្គារនេះថា តាមការពិនិត្យរបស់ក្រុមគ្រូពេទ្យ ព្រះសង្ឃទាំងនោះមានអាពាធគ្រុនផ្តាសាយធម្មតាប៉ុណ្ណោះ។
តែយ៉ាងណា លោកបញ្ជាក់ថា អាជ្ញាធរខេត្តនឹងបន្តអនុវត្តតាមការណែនាំរបស់ក្រសួង ក្នុងការចូលរួមទប់ស្កាត់ការចម្លងជំងឺផ្តាសាយធំនិងជំងឺឆ្លងផ្សេងទៀត។
លោកថា៖ «យើងបានរៀបចំហើយ យើងចុះទៅផ្សព្វផ្សាយអប់រំណែនាំពួកគាត់ហើយ ផ្តល់មុង អាល់កុល មានជែល មានសាប៊ូ ហើយក៏ថ្នាំបាញ់ [សម្លាប់មេរោគ] ជូនគាត់ហើយ»។
ចំណែកអនុប្រធានមន្ទីរសុខាភិបាលខេត្តបាត់ដំបង លោក អ៊ុក វិទ្យា មានប្រសាសន៍នៅថ្ងៃអង្គារនេះថា ព្រះសង្ឃទាំង៤៦អង្គដែលមានអាពាធដោយមានរោគសញ្ញាក្តៅព្រះកាយលើសពី៣៧,៥អង្សា ក្អក និងហៀរសំបោរនោះ មានភាពធូរស្រាលឡើងវិញ ហើយបើតាមលទ្ធផលវិភាគពីមន្ទីរពិសោធន៍បង្ហាញថា ជាជំងឺផ្តាសាយធំ មិនមែនជាករណីឆ្លងជំងឺកូវីដ១៩នោះទេ។
លោកបន្តថា តាមរយៈការណែនាំរបស់ក្រសួងនេះ អាជ្ញាធរខេត្តនឹងពង្រឹងវិធានការសុខាភិបាលបន្ថែមទៀត ដើម្បីចូលរួមទប់ស្កាត់ការចម្លងជំងឺផ្តាសាយធំនិងជំងឺផ្សេងៗ។
លោកបានថ្លែងថា៖ «យើងអនុវត្តអ្វីក៏ដោយគឺតាមការណែនាំរបស់ក្រសួង ត្រូវរក្សាគម្លាត ប្រកាន់ខ្ជាប់នូវអនាម័យ លាងដៃនឹងសាប៊ូនិងទឹក ព្រោះយើងដឹងថា ជំងឺផ្តាសាយមានការចម្លងលឿនណាស់»។
កាលពីដើមខែកញ្ញានេះ អ្នកជាប់ឃុំចំនួន១៤៧នាក់នៅក្នុងពន្ធនាគារខេត្តព្រះវិហារ មានអាការក្តៅខ្លួនខ្លាំង ក្អក និងហៀរសំបោរផងដែរ ហើយករណីនេះ ត្រូវបានមន្ត្រីសុខាភិបាលបញ្ជាក់ថា ពួកគេឆ្លងជំងឺគ្រុនផ្តាសាយធំ (Influenza A)៕
