មន្ត្រីជាន់ខ្ពស់នៃអគ្គស្នងការដ្ឋាននគរបាលជាតិ បានជំរុញដល់កម្លាំងនាយកដ្ឋាននគរបាលការពារទាំងអស់ ពង្រឹងការការពារសន្តិសុខតាមបណ្តាអង្គទូតនានានិងគោលដៅសំខាន់ៗផ្សេងទៀត បើទោះជាប្រទេសកម្ពុជាពុំមានអំពើភេរវកម្មនិងជម្លោះប្រដាប់អាវុធ។
យោងតាមគេហទំព័រអគ្គស្នងការដ្ឋាននគរបាលជាតិ បានស្រង់ប្រសាសន៍របស់អគ្គស្នងការរងនគរបាលជាតិ លោក ឆាយ គឹមខឿន មកចុះផ្សាយកាលពីថ្ងៃម្សិលមិញថា បើទោះជាបច្ចុប្បន្ន ប្រទេសកម្ពុជា កំពុងមានសន្តិភាពនិងការអភិវឌ្ឍជាបន្តបន្ទាប់ ប៉ុន្តែក្នុងនាមជានគរបាលការពារ ត្រូវតែមានការប្រុងប្រយ័ត្នជានិច្ចនិងត្រូវកែលម្អរាល់ភាពចន្លោះប្រហោងនាពេលកន្លងមក។
ជាមួយគ្នានោះដែរ លោកក៏បានជំរុញដល់កម្លាំងនាយកដ្ឋាននគរបាលការពារ ត្រូវបង្កើនការប្រុងប្រយ័ត្នបន្ថែមទៀត លើការពង្រឹងសន្តិសុខតាមបណ្តាគោលដៅនយោបាយ ការទូត វប្បធម៌ និងសេដ្ឋកិច្ច ជាពិសេសស្ថាប័នកំពូលៗរបស់ជាតិដែលជាគោលដៅស្នូល បើទោះបីជាកម្ពុជាពុំមានអំពើភេរវកម្មនិងជម្លោះប្រដាប់អាវុធក៏ដោយនោះ។
លោក ឆាយ គឹមខឿន ត្រូវបានស្រង់ប្រសាសន៍បន្ថែមថា៖ «គ្រប់អង្គទូតទាំងអស់ត្រូវបានទទួលកិច្ចការពារសុវត្ថិភាព ពិសេសស្ថានទូតនៃប្រទេសមហាអំណាចធំៗ សុទ្ធតែជាគោលដៅស្នូលដែលមិនអាចធ្វេសប្រហែសបានទ្បេីយ»។
លោកបានគូសបញ្ជាក់បន្ថែមថា៖ «បញ្ហាសំខាន់នោះគឺ ត្រូវខិតខំធានាឱ្យបាននូវសុវត្ថិភាពទាំងស្រុងនៅតាមគោលដៅ ដេីម្បីរក្សាកិត្តិយសនគរបាលជាតិនិងលេីកស្ទួយកិត្យានុភាពជាតិ។ មួយវិញទៀត ត្រូវតែត្រៀមខ្លួនជានិច្ចដេីម្បីជួយអន្តរាគមន៍ដោះស្រាយសភាពការណ៍នានាដែលអាចកេីតទ្បេីងជាយថាហេតុ»។
ការថ្លែងរបស់លោកឧត្តមសេនីយ៍ឯក ឆាយ គឹមខឿន បានធ្វើឡើងនៅក្នុងពិធីសំណេះសំណាលជាមួយកងកម្លាំងនៃនាយកដ្ឋាននគរបាលការពារ កាលពីថ្ងៃម្សិលមិញ៕
