លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានក្រើនរំលឹកដល់ប្រជាពលរដ្ឋទាំងអស់ ប្រុងប្រយ័ត្នចំពោះគ្រោះអគ្គិភ័យ ដែលអាចបណ្តាលមកពីការអុជទៀន ធូប ក្នុងពិធីកាន់បិណ្ឌ និងភ្ជុំបិណ្ឌនេះ។
លោកនាយករដ្ឋមន្ត្រី ហ៊ុន សែន បានលើកឡើងក្នុងហ្វេសហ៊ុករបស់លោកថា ថ្ងៃនេះជាថ្ងៃកាន់បិណ្ឌទី១៤ និងថ្ងៃស្អែកជាថ្ងៃបុណ្យភ្ជុំធំ ដែលករណីនេះ លោកអំពាវនាវដល់ប្រជាពលរដ្ឋមានការប្រុងប្រយ័ត្នខ្ពស់ចំពោះអគ្គិភ័យ ដែលអាចបណ្តាលមកពីការដុតធូប ទៀន នៅតាមទីកន្លែងសក្ការៈបូជាផ្សេងៗ។
លោកក៏បានបន្តណែនាំដល់អាជ្ញាធរនៅតាមបណ្តាខេត្តនានា ជួយសម្រួលចរាចរណ៍ និងសណ្តាប់ធ្នាប់សាធារណៈឱ្យបានល្អ ដើម្បីបង្កភាពកាន់តែងាយស្រួលដល់ប្រជាពលរដ្ឋ និងអ្នកទេសចរបានចូលរួមប្រារព្ធពិធីបុណ្យភ្ជុំបិណ្ឌ។
ជាមួយគ្នានេះដែរ លោកនាយករដ្ឋមន្ត្រី ក៏បានអំពាវនាវដល់ប្រជាពលរដ្ឋ បន្តយកចិត្តទុកដាក់ការពារខ្លួនពីការចម្លងជំងឺកូវីដ១៩ ដោយការរក្សាអនាម័យខ្លួនប្រាណ និងការបន្តពាក់ម៉ាស់ការពារ ជាពិសេសក្នុងពិធីបុណ្យដែលមានមនុស្សចូលរួមច្រើន។
ការក្រើនរំលឹករបស់លោកនាយករដ្ឋមន្ត្រី បានធ្វើឡើងស្របពេលដែលមានករណីគ្រោះអគ្គិភ័យមួយបានកើតឡើង លើសាលាឆាន់មួយ នៅវត្តក្រាំងស្លា ស្ថិតក្នុងភូមិវល្លិយាវ ឃុំរោងដំរី ស្រុកបាភ្នំ ខេត្តព្រៃវែង កាលពីម៉ោងប្រមាណ ៣:៣០នាទីទាបភ្លឺ ថ្ងៃទី១៦ ខែកញ្ញានេះ។
នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ បានឱ្យដឹងក្នុងទំព័រហ្វេសហ៊ុកថា ករណីអគ្គិភ័យឆេះសាលាឆាន់នេះ បង្កដោយសារភ្លើងទាន បណ្តាលឱ្យឆេះធុងសម្រាប់ដាក់លុយពិសាខបូជា ចំនួន ០៤ធុង អង្ករចំនួន ១០តៅ និងសម្ភារៈមួយចំនួនទៀត ដោយពុំបង្កឱ្យមានមនុស្សរងគ្រោះក្នុងហេតុការណ៍នេះទេ៕
