អភិបាលខេត្តព្រះសីហនុ និងមន្ត្រីពាក់ព័ន្ធនៅល្ងាចនេះកំពុងជម្លៀសប្រជាពលរដ្ឋចំនួន២ភូមិ ស្ថិតនៅក្នុងស្រុកព្រៃនប់ ទៅរកទីតាំងមានសុវត្ថិភាព ដោយសារតែទីតាំងនោះកំពុងរងគ្រោះដោយសារជំនន់ភ្លៀង។
តាមសេចក្តីរាយការណ៍របស់ក្រសួងព័ត៌មានគឺគិតត្រឹមម៉ោង៤ល្ងាចថ្ងៃសុក្រនេះ កម្លាំងកងរាជ អាវុធហត្ថខេត្តព្រះសីហនុ សហការនឹងកម្លាំងមូលដ្ឋានកងរាជអាវុធហត្ថស្រុកព្រៃនប់ បានចុះជួយសង្រ្គោះប្រជាពលរដ្ឋនៅក្នុងភូមិចំនួន២ ដែលទទួលរងផលប៉ះពាល់ដោយសារជំនន់ទឹកភ្លៀង ទៅរកទីទួលមានសុវត្ថិភាព។
ភូមិចំនួន២នោះ គឺភូមិបន្ទាយប្រិយ៍ ឃុំអណ្តូងថ្ម និងភូមិចុងអូរ ឃុំសំរ៉រុង ស្រុកព្រៃនប់ ខេត្តព្រះសីហនុ ចំនួន ២១គ្រួសារ ស្មើនឹង ៨១នាក់ ក្នុងនោះស្រី ចំនួន ៤២នាក់ ក្មេង ចំនួន ២៥នាក់៕
