យ៉ាងហោចណាស់ក្មេងស្រីអាយុជាងមួយខួបម្នាក់បានស្លាប់ ដោយសារជំនន់ទឹកភ្លៀងនៅក្នុងស្រុកព្រៃនប់ កាលពីថ្ងៃ១៨ ខែកញ្ញាម្សិលមិញនេះ ខណៈប្រជាពលរដ្ឋជិត២០០០នាក់ត្រូវជម្លៀសទៅរកទីតាំងមានសុវត្ថិភាព។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ប្រាប់វីអូឌីនៅថ្ងៃនេះថា តាមរបាយការណ៍បឋម ជំនន់ទឹកភ្លៀងនៅស្រុកព្រៃនប់ បណ្តាលប៉ះពាល់ឃុំចំនួន៤ ហើយលិចផ្ទះប្រជាពលរដ្ឋចំនួន៤៧២គ្រួសារ និងមនុស្សសរុប១៩៨៨នាក់។ លោកបន្តថា ជំនន់ទឹកភ្លៀងនេះ បានសម្លាប់ក្មេងស្រីអាយុ១ខូបកន្លះផងដែរ។
ឃុំដែលប៉ះពាល់នោះរួមមាន ឃុំព្រៃនប់ ឃុំទួលទទឹង ឃុំអណ្តូងថ្ម និងឃុំសំរ៉ុង ស្ថិតនៅស្រុកព្រៃនប់ ខេត្តព្រះសីហនុ។
ដោយឡែក ឃុំសាមគ្គី ស្ថិតនៅស្រុកព្រៃនប់ ទឹកលិចផ្លូវលំអភិវឌ្ឍន៍បឹងរាំង ព្រែកក្រាញ់ ចំនួន៤កន្លែងប្រវែងជាង៥០០ម៉ែត្រ កម្ពស់ទឹកប្រហែល៧០សង់ទីម៉ែត្រ ហើយម៉ូតូមិនអាចធ្វើចរាចរណ៍បាននោះទេ។
អ្នកនាំពាក្យរូបនោះបញ្ជាក់ថា បច្ចុប្បន្ននេះ អភិបាលខេត្តលោក គួច ចំរើន បានសហការជាមួយគណៈបញ្ជាការឯកភាពរដ្ឋបាលខេត្តបញ្ជូនកម្លាំង៣ រួមមាន កម្លាំងស្នងការដ្ឋាននគរបាលខេត្ត កម្លាំងបញ្ជាការដ្ឋានកងរាជអាវុធហត្ថខេត្ត និងកម្លាំងប្រតិបត្តិការសឹករងខេត្តព្រះសីហនុចុះជួយសង្គ្រោះ និងអន្តរាគមន៍នៅតាមគោលដៅទទួលប្រជាពលរដ្ឋរងគ្រោះនៅតាមឃុំនីមួយៗ។
ចំណែក ចំនួនប្រជាពលរដ្ឋដែលត្រូវសមត្ថកិច្ចជួយសង្គ្រោះបានចំនួនប៉ុន្មាននាក់ គិតត្រឹមថ្ងៃទី១៩ ខែកញ្ញា វេលាម៉ោង១២ថ្ងៃត្រង់នេះ អ្នកនាំពាក្យសាលាខេត្តព្រះសីហនុ លោក ឃាង ភារម្យ អះអាងថា សមត្ថកិច្ចកំពុងស្រង់ស្ថិតិ ហើយថានឹងជំរាបជូននៅពេលក្រោយ៕
