ក្រសួងទេសចរណ៍បង្ហាញរបាយការណ៍បឋមថា រយៈពេលបុណ្យភ្ជុំបិណ្ឌប្រពៃណីជាតិចំនួន៣ថ្ងៃ មានភ្ញៀវទេសចរណ៍ជាតិអន្តរជាតិ ដើរកំសាន្តនៅទូទាំងប្រទេសជាង១លាននាក់។
យោងតាមរបាយការណ៍បឋមរបស់ក្រសួងទេសចរណ៍ បានឲ្យដឹងនៅថ្ងៃ១៩ ខែកញ្ញានេះថា ក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ ចាប់ពីថ្ងៃទី១៦-១៨ ខែកញ្ញា ឆ្នាំ២០២០ មានភ្ញៀវទេសចរធ្វើដំណើរកម្សាន្ត នៅតាមគោលដៅទេសចរណ៍នានា ទូទាំង២៥រាជធានី-ខេត្ត ជាង១លាននាក់ ដោយក្នុងនោះភ្ញៀវជាតិមានចំនួន១ ១០៥ ៦១១ នាក់ និងភ្ញៀវអន្តរជាតិ មានចំនួន៦ ៧៩២នាក់។
អ្វីដែលគួរឲ្យកត់សំគាល់ ខេត្តដែលមានភ្ញៀវទេសចរទៅដើរកំសាន្តច្រើនជាងគេក្នុងចំណោម២៥រាជធានី-ខេត្ត គឺខេត្តបាត់ដំបងចំណាត់ថ្នាក់លេខ១ (មានភ្ញៀវចំនួន១៣៤៤៤០នាក់) និងខេត្តសៀមរាបចំណាត់ថ្នាក់លេខ២ (សរុបភ្ញៀវ ១២២៣៧០នាក់) ហើយខេត្តកំពតជាប់ចំណាត់ថ្នាក់លេខ៣ (ភ្ញៀវ៩៤៤៧៩នាក់)។
របាយការណ៍ដដែលបញ្ជាក់ថា បើទោះបីមានភ្លៀង ធ្លាក់ជាច្រើនកន្លែងក្នុងភូមិសាស្រ្តខេត្តមួយចំនួន ប៉ុន្តែគោលដៅទេសចរណ៍ភាគច្រើន នៅតែមានភ្ញៀវទេសចរ កម្សាន្តយ៉ាងច្រើនកុះករ។ ចំណែកការគ្រប់គ្រងសន្តិសុខ សណ្ដាប់ធ្នាប់ជាទូទៅមានភាពល្អប្រសើរ មិនមានបញ្ហា ឬការរំខានណាមួយកើតឡើងនោះទេ៕
