នាយកដ្ឋាននគរបាល បង្ការពន្លត់អគ្គិភ័យ និងសង្គ្រោះ បានឲ្យដឹងថា ភ្លើងឆេះផ្សារសំរោងយ៉ោង ស្ថិតនៅស្រុកបាទី ខេត្តតាកែវ ខាតបង់សរុបជាទឹកប្រាក់អស់ប្រហែល៨លានដុល្លារអាមេរិក។
គេហទំព័រហ្វេសប៊ុកនាយកដ្ឋាននគរបាល បង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាន នគរបាល បានបង្ហាញរបាយការណ៍ កាលពីថ្ងៃទី១៨ ខែកញ្ញា ឆ្នាំ២០២០នេះថា អគ្គិភ័យឆេះផ្សារសំរោងយ៉ោងស្ថិតនៅភូមិស្មៅខ្ញី ឃុំត្រពាំងសាប ស្រុកបាទី ខេត្តតាកែវ បានឆេះតូបលក់ដូរអស់ចំនួន២៣០តូប ក្នុងចំណោម២៨៣តូប ដែលសរុបជាទឹកប្រាក់អស់ប្រហែល៨លានដុល្លារអាមេរិក (៨ ០០០ ០០០ដុល្លារ)។
ប៉ុន្តែគេហទំព័រហ្វេសប៊ុកនេះ មិនបានបញ្ជាក់ពីមូលហេតុដែលនាំឲ្យភ្លើងឆេះផ្សារនោះនៅឡើយ បើគិតត្រឹមថ្ងៃទី២០ ខែកញ្ញានេះ។
អគ្គិសភ័យឆាបឆេះផ្សារសំរោងយ៉ោង កាលពីថ្ងៃ១៧ កញ្ញា វេលាម៉ោង ១៨និង៥៥នាទី។ អំឡុងពេលឆាបឆេះ សមត្ថកិច្ច បានប្រើប្រាស់រថយន្តពន្លត់អគ្គិភ័យ ចំនួន២៧គ្រឿង ប្រើប្រាស់ទឹកអស់ចំនួន៩២រថយន្ត ទើបពន្លត់ភ្លើងរលត់ទាំងស្រុង នៅវេលាម៉ោង ១និង៣០នាទី រំលងអធ្រាត្រឈានចូលថ្ងៃទី១៨ខែកញ្ញា៕
