អាជ្ញាធរខេត្តបាត់ដំបង បានឲ្យដឹងថា រមណីយដ្ឋានស្ថិតតាមខ្សែទឹកហូរនានានៅក្នុងស្រុកយ៉ាងហោចណាស់ចំនួន ៣នៅក្នុងខេត្តនេះ ត្រូវបានជូនដំណឹងឲ្យផ្អាកដំណើរការអាជីវកម្មជាបណ្ដោះអាសន្ន ខណៈមានក្ដីបារម្ភពីការហក់ឡើងយ៉ាងលឿននៃជំនន់ទឹកភ្លៀងនាពេលប៉ុន្មានថ្ងៃនេះ។
ក្នុងសេចក្តីជូនដំណឹងកាលពីថ្ងៃម្សិលមិញនេះ មន្ទីរទេសចរណ៍ខេត្តបាត់ដំបង បានសម្រេចណែនាំទៅម្ចាស់រមណីយដ្ឋាននានាស្ថិតនៅតាមជ្រោះជ្រលងភ្នំ ដងស្ទឹង និងបឹងបួរ ឲ្យផ្អាកដំណើរការអាជីវកម្មរបស់ពួកគេជាបណ្ដោះអាសន្នជាបន្ទាន់ចាប់ថ្ងៃម្សិលមិញនេះ។
បើតាមសេចក្ដីជូនដំណឹងដដែល អាជ្ញាធរខេត្តនេះបានសម្រេចបែបនេះ បន្ទាប់ពីប្រទេសកម្ពុជាទទួលរងភ្លៀងធ្លាក់ជាបន្តបន្ទាប់ក្នុងរយៈពេលប៉ុន្មានថ្ងៃចុងក្រោយនេះ ដោយសារតែឥទ្ធិពលនៃព្យុះនូល (Noul) ដែលមានប្រភពមកពីមហាសមុទ្រប៉ាស៊ីហ្វិក។
អនុប្រធានមន្ទីរទេសចរណ៍ខេត្តបាត់ដំបង លោក នូ ថា ប្រាប់ថា រមណីយដ្ឋានស្ថិតនៅតាមភូមិសាស្ត្រដែលប្រឈមមុខនឹងជំនន់ទឹកភ្លៀងហក់ឡើងភ្លាមៗ ត្រូវបានជូនដំណឹងឲ្យផ្អាកអាជីវកម្មរបស់ពួកគេហើយ រហូតដល់មានការជូនដំណឹងជាថ្មី។
លោក នូ ថា ប្រាប់ថា៖ «យើងថា ចាំមើលសភាពការណ៍ពីខាងលើមកថា ទឹកពីខាងលើមក វាលែងជន់ហើយ យើងនឹងឱ្យដំណើរការវិញ។ ខាងធនធានទឹក គេព្យាករថា ត្រឹមថ្ងៃ២២។ អ៊ីចឹង យើងអាចត្រឹមថ្ងៃ២៣ ២៤អី បើថា មេឃស្រលះត្រឹមថ្ងៃ២២ហ្នឹងទៅ យើងអាចឱ្យគាត់ដំណើរកាឡើងវិញបាន»។
នាយករដ្ឋបាលសាលាខេត្តបាត់ដំបង លោក សឿម ប៊ុនរិទ្ធ បានឲ្យដឹងថា កម្ពស់ទឹកនៅតាមបណ្ដាស្ទឹងនានាក្នុងខេត្តបាត់ដំបង បានកើនឡើង ប៉ុន្តែ លោកថា មិនស្ថិតក្នុងកម្រិតប្រកាសអាសន្នដូចបណ្ដាខេត្តដទៃទៀតឡើយ។
មន្ត្រីរូបនេះ ឲ្យដឹងទៀតថា រមណីយដ្ឋាននានា ដែលជាកន្លែងលេងទឹកកម្សាន្តស្ថិតនៅតាមខ្សែទឹកហូរនៅក្នុងស្រុករតនមណ្ឌល រុក្ខគិរី និងសំឡូត ត្រូវបានជូនដំណឹងឲ្យផ្អាកជាបណ្ដោះអាសន្ន ដើម្បីបង្ការគ្រោះថ្នាក់ចៃដន្យណាមួយកើតចេញពីជំនន់ទឹកភ្លៀងហក់ឡើងភ្លាមៗ។
លោក សឿម ប៊ុនរិទ្ធ ប្រាប់ថា៖ «[អភិបាលខេត្ត]លោកបានណែនាំទៅមន្ទីរទេសចរណ៍ ត្រូវតែផ្អាកសិន ព្រោះយើងមិនទុកចិត្តទេ ព្រោះអាកាសធាតុខាងលើហ្នឹង យើងឃើញអ៊ីចឹងមែន តែបើភ្លៀងធ្លាក់មក ទឹកវាឡើងលឿន។ ភូមិសាស្ត្រព្រៃភ្នំ យើងឃើញអត់ភ្លៀងៗអ៊ីចឹងទេ ប៉ុន្តែ ហ៊ានតែភ្លៀងងងឹតបន្តិច ទឹកពេញស្ទឹងភ្លាមឥឡូវហើយ»។
ប៉ុន្តែ លោក ប៊ុនរិទ្ធ បញ្ជាក់ថា រមណីយដ្ឋានទេសចរណ៍ដទៃទៀត ដែលមិនស្ថិតក្នុងភូមិសាស្ត្រជ្រោះជ្រលងភ្នំ ដងស្ទឹង និងបឹងបួរ នៅតែអាចបើកដំណើរការអាជីវកម្មរបស់ពួកគេដដែល។
បើតាមក្រសួងធនធានទឹក និងឧតុនិយម ប្រទេសកម្ពុជាត្រូវទទួលរងភ្លៀងធ្លាក់ក្នុងកម្រិតមធ្យមទៅច្រើននៅចន្លោះថ្ងៃទី១៨ ដល់ថ្ងៃទី២០ ខែកញ្ញា ដែលជាឥទ្ធិពលនៃព្យុះនូលមានប្រភពមកពីសមុទ្រប៉ាស៊ីហ្វិក។
ប្រធានមន្ទីរធនធានទឹក និងឧតុនិយមខេត្តបាត់ដំបង លោក ឡុង ផល្គុន បានឲ្យដឹងថា ខេត្តនេះមិនប្រឈមមុខនឹងទឹកជំនន់ដូចបណ្ដាខេត្តដទៃទៀតនោះឡើយ។
ប្រធានសហគមន៍ទេសចរណ៍អូរជាំ លោក គឹម សុង បានឲ្យដឹងថា រមណីយដ្ឋានរបស់លោកដែលស្ថិតក្នុងស្រុកសំឡូត បានសម្រេចផ្អាកជាបណ្ដោះអាសន្នទៅតាមសេចក្ដីណែនាំរបស់រដ្ឋបាលខេត្ត ប៉ុន្តែ លោកថា អាកាសធាតុ បានល្អប្រសើរវិញហើយចាប់តាំងពីថ្ងៃម្សិលមិញនេះ។
លោក គឹម សុង រំពឹងថា រមណីយដ្ឋានរបស់នឹងបើកដំណើរការឡើងវិញនៅចុងសប្ដាហ៍នេះ ក្រោយពីសង្កេតឃើញស្ថានភាពអាកាសកាន់តែល្អប្រសើរឡើងវិញនោះ។
របាយការណ៍មន្ទីរទេសចរណ៍ខេត្តបាត់ដំបងនៅដើមឆ្នាំនេះ បង្ហាញថា ខេត្តនេះមានគោលដៅទេសចរណ៍សរុប ៥២កន្លែងនៅទូទាំងខេត្ត ក្នុងនោះមានរមណីយដ្ឋានទេសចរណ៍ធម្មជាតិដល់ទៅ ១៧កន្លែង ហើយខេត្តនេះទាក់ទាញបានភ្ញៀវទេសចរសរុបជាង ៦៨ម៉ឺននាក់កាលពីឆ្នាំ២០១៩កន្លងមក ក្នុងនោះមានភ្ញៀវបរទេសជាង ១០ម៉ឺននាក់ផងដែរ៕