អាជ្ញាធរខេត្តពោធិ៍សាត់ បានជូនដំណឹងទៅដល់ប្រជាពលរដ្ឋ និងអាជ្ញាធរមូលដ្ឋាន ឲ្យប្រុងប្រយ័ត្នចំពោះគ្រោះថ្នាក់ផ្សេងៗ ខណៈដងស្ទឹងនានានៅក្នុងខេត្តនេះកំពុងទទួលរងទឹកជំនន់។មន្ទីរធនធានទឹក និងឧតុនិយម បានប្រាប់ប្រជាពលរដ្ឋ និងអាជ្ញាធរមូលដ្ឋានឲ្យប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ផ្សេងៗ និងត្រៀមស្វែងរកទីទួលសុវត្ថិភាពសម្រាប់ជម្លៀសប្រជាពលរដ្ឋ។
ស្ថាប័នមួយនេះ ប្រកាសថា ទឹកជំនន់នៅតាមដងស្ទឹងពោធិ៍សាត់ បានហក់ឡើងយ៉ាងជាបន្តបន្ទាប់ ក្រោយពីតំបន់ជួរភ្នំក្រវ៉ាញទទួលរងភ្លៀងធ្លាក់ប៉ុន្មានថ្ងៃជាប់ៗគ្នាដោយសារតែឥទ្ធិពលនៃព្យុះនូល (NOUL)។
ព្យុះនូលបានកើតចេញពីសមុទ្រប៉ាស៊ីហ្វិក ហើយបានបោកបក់កាត់ប្រទេសហ្វីលីពីនកាលពីថ្ងៃទី១៦ ខែកញ្ញា មុននឹងធ្វើដំណើរមកដល់ភាគកណ្ដាលប្រទេសវៀតណាម និងតំបន់អាងទន្លេមេគង្គក្នុងប្រទេសថៃ និងឡាវកាលពីថ្ងៃសុក្រសប្ដាហ៍មុន៕