ក្រុមប្រឹក្សាអភិវឌ្ឍន៍កម្ពុជា ប្រតិកម្មតបទៅនឹងការដាក់ទណ្ឌកម្មរបស់អាមេរិកទៅលើក្រុមហ៊ុនចិន Union Development Group (UDG) ដែលកំពុងវិនិយោគលើគម្រោងដ៏ធំមួយនៅកម្ពុជា ដោយហៅការចោទប្រកាន់នេះថា មិនឆ្លុះបញ្ចាំងពីការពិតលើគម្រោងអភិវឌ្ឍន៍។
ក្រុមហ៊ុន UGD ដែលកំពុងវិនិយោគលើគម្រោងអភិវឌ្ឍន៍រមណីយដ្ឋានទេសចរណ៍តារាសាគរ ស្ថិតក្នុងស្រុកបុទុមសាគរ និងស្រុកគិរីសាគរ ខេត្តកោះកុង ត្រូវបានក្រសួងរតនាគារអាមេរិកសម្រេចដាក់ទណ្ឌកម្មកាលពីថ្ងៃអង្គារសប្ដាហ៍មុន។
រដ្ឋាភិបាលអាមេរិកបានសម្រេចបែបនេះ ដោយលើកឡើងថា ក្រុមហ៊ុនចិនមួយនេះកំពុងរំលោភបំពានសិទ្ធិមនុស្ស និងបញ្ហាមិនប្រក្រតីមួយចំនួនទៀត។
ក្នុងសេចក្ដីថ្លែងការណ៍កាលពីថ្ងៃម្សិលមិញនេះ ក្រុមប្រឹក្សាអភិវឌ្ឍន៍កម្ពុជា (CDC) និយាយថា ការចោទប្រកាន់ថា ក្រុមហ៊ុន UDG ជាកម្មសិទ្ធរបស់រដ្ឋាភិបាលចិន ដែលភាគហ៊ុនទាំងអស់កាន់កាប់ដោយក្រុមហ៊ុន Tianjin Union Development Group Co.,Ltd គឺជាព័ត៌មានមិនពិត។
ស្ថាប័នមួយនេះ អះអាងថា អ្វីដែលរដ្ឋាភិបាលលើកឡើង គឺខុសពីឯកសារចុះបញ្ចីជាមួយក្រសួងពាណិជ្ជកម្មកម្ពុជា ដែលបញ្ជាក់ថា ក្រុមហ៊ុន UDG គឺជាក្រុមហ៊ុនឯកជន ដែលត្រូវបានបង្កើតឡើងកាលពីឆ្នាំ១៩៩៥ និងមានជំនាញខាងវិនិយោគអចលទ្រព្យ។
ក្រុមប្រឹក្សាអភិវឌ្ឍន៍កម្ពុជា និយាយទៀតថា ក្រុមហ៊ុន UDG មិនទទួលបានដីសម្បទានសេដ្ឋកិច្ចពីកម្ពុជានោះឡើយ ប៉ុន្តែ បានជួលដីទំហំជាង ១ម៉ឺនហិកតាពីរដ្ឋាភិបាលកម្ពុជា ដែល CDC អះអាងថា ទំហំនេះមិនស្ថិតក្រោមច្បាប់ណាមួយរបស់កម្ពុជានោះឡើយ។
ក្រុមបឹក្សាអភិវឌ្ឍន៍កម្ពុជា ក៏បានច្រានចោលផងដែរនូវការចោទប្រកាន់ថា គម្រោងអភិវឌ្ឍន៍របស់ក្រុមហ៊ុន UDG បានរំលោភបំពានលើដីធ្លីប្រជាពលរដ្ឋ ប៉ះពាល់ដល់បរិស្ថាន និងការចោទថា គម្រោងនឹងត្រូវប្រើប្រាស់ធ្វើជាមូលដ្ឋានយោធា។
ក្រុមហ៊ុនចិន UDG ទទួលបានដីសម្បទានពីរដ្ឋាភិបាលកម្ពុជាទំហំ ៣៦ ០០០ហិកតា នៅខេត្តកោះកុងកាលពីឆ្នាំ២០០៨ សម្រាប់កិច្ចសន្យាជួលរយៈពេល ៩៩ឆ្នាំ ដើម្បីអភិវឌ្ឍជាមណ្ឌលកម្សាន្តទេសចរណ៍ធម្មជាតិ ដោយវិនិយោគទឹកប្រាក់ ៣.៨ពាន់លានដុល្លារ៕
