អ្នកនាំពាក្យការិយាល័យអន្តោប្រវេសន៍ថៃ លោក ប៉ាក ប៉ាពុង សៃអ៊ូបុល (Pak Pakpong Sai-ubol) បានព្រមានថា ជនបរទេសដែលរស់នៅក្នុងប្រទេសថៃជាង ១៥ម៉ឺននាក់ ចាំបាច់ត្រូវទៅបន្តទិដ្ឋាការ ឬវិសាររបស់ខ្លួនឡើងវិញនៅថ្ងៃទី២៦ ខែកញ្ញា បើមិនដូច្នេះទេ នឹងប្រឈមមុខនឹងការចោទប្រកាន់ពីបទស្នាក់នៅហួសកំណត់។
តាមប្រភពសារព័ត៌មាន Bangkok Post នៅថ្ងៃចន្ទនេះ លោក ប៉ាក ប៉ាពុង សៃអ៊ូបុល បាននិយាយថា៖ «ការស្នាក់នៅហួសរយៈពេលនៃទិដ្ឋាការទេសចរណ៍ គឺត្រូវផ្តន្ទាទោសដាក់ពន្ធនាគារ និងការផាកពិន័យនៅក្រោមច្បាប់អន្តោប្រវេសន៍»។
យោងតាមច្បាប់នេះ ជនណាដែលបានរស់នៅក្នុងប្រទេសថៃហួសទិដ្ឋាការរបស់ខ្លួនពី ៩០ថ្ងៃនោះ នឹងត្រូវបានហាមឃាត់មិនឱ្យចូលប្រទេសវិញក្នុងរយៈពេលមួយឆ្នាំ ហើយប្រសិនបើរស់នៅលើសពីរយៈពេល ១០ឆ្នាំនោះ ពួកគេនឹងត្រូវកត់ចូលបញ្ជីខ្មៅ ហើយនឹងមិនអនុញ្ញត្តិឱ្យចូលប្រទេសនេះរហូតអស់មួយជីវិត។
ភ្ញៀវទេសចរបរទេសជាច្រើន បានជាប់គាំងនៅក្នុងប្រទេសថៃនៅពេលមានការរាតត្បាតនៃជំងឺកូវីដ១៩នៅចុងខែមីនាមក ដែលបានបង្ខំឱ្យជើងហោះហើរអន្តរជាតិត្រូវបានផ្អាក និងព្រំដែនត្រូវបានបិទ ដើម្បីទប់ស្កាត់នូវការឆ្លងនៃវីរុស។
ភ្ញៀវទេសចរទាំងអស់ ត្រូវបានផ្តល់ការពន្យល់ណែនាំពីរបៀបដែលពួកគេអាចស្នាក់នៅក្នុងប្រទេសនេះបាន បើទោះជាទិដ្ឋាការរបស់ពួកគេបានផុតកំណត់ក៏ដោយ ប៉ុន្តែ រយៈពេលនៃការអនុគ្រោះនោះ ក៏នឹងបញ្ចប់នៅថ្ងៃសៅរ៍ខាងមុខនេះផងដែរ។
នៅពេលភ្ញៀវទេសចរខកខានមិនបានបន្តទិដ្ឋាការរបស់ខ្លួនតាមពេលកំណត់នោះ ពួកគេនឹងត្រូវពិន័យជាលុយទៅតាមចំនួនថ្ងៃ ហើយអាជ្ញាធរថៃនឹងតាមស្រាវជ្រាវរកភ្ញៀវបរទេសទៅតាមអាសយដ្ឋានដែលមានក្នុងប្រព័ន្ធរក្សាទុកទិន្នន័យ។
កាសែតបាងកក ប៉ុស្តិ៍ បានឱ្យដឹងថា លោក Volodymyr Fedorovych ដែលត្រូវជាម្ចាស់ក្រុមហ៊ុនទូកទេសចរណ៍សញ្ជាតិអ៊ុយក្រែន បាននិយាយថា ទូករបស់គាត់ត្រូវបានផ្អាកដំណើរការតាំងពីខែមីនា ហើយគាត់បានសម្រេចរំសាយបុគ្គលិកក្នុងស្រុកពីរនាក់កាលពីខែមេសា។
លោក Fedorovych បាននិយាយថា លោកបានធ្វើការនៅប្រទេសថៃអស់រយៈពេលជាង ៥ឆ្នាំហើយ គាត់ទទួលបានទិដ្ឋាការបន្តជារៀងរាល់ឆ្នាំ ដោយឡែកនាពេលថ្មីៗនេះ ទិដ្ឋាការរបស់លោកបានផុតកំណត់នៅកាលពីខែមេសាមកម្លេះ ប៉ុន្តែ រដ្ឋាភិបាលបានផ្តល់ការពន្យារទិដ្ឋាការឱ្យលោកដោយស្វ័យប្រវត្តិ។
ទោះយ៉ាងណា លោក Fedorovych បាននិយាយថា ការិយាល័យអន្តោប្រវេសន៍ខេត្តភូកេត កាលពីថ្ងៃទី ៦ ខែសីហាកន្លងទៅ បានបដិសេធមិនបន្តទិដ្ឋាការនោះឡើយ ដោយសារតែមុខជំនួញរបស់លោកមិនបានជួលបុគ្គលិកក្នុងស្រុក៕