យ៉ាងហោចណាស់ ប្រជាពលរដ្ឋ១៨០គ្រួសារនៅក្នុងខេត្តពោធិ៍សាត់ ត្រូវបានជម្លៀសទៅកាន់ទីទួលសុវត្ថិភាព ហើយផលដំណាំជាង៦០០ហិកតា ត្រូវលិចលង់នៅក្នុងទឹកជំនន់ដែលបណ្ដាលមកពីភ្លៀងធ្លាក់ប៉ុន្មានថ្ងៃជាប់គ្នានៅក្នុងខេត្តនេះ។
របាយការណ៍របស់រដ្ឋបាលខេត្តពោធិ៍សាត់ បង្ហាញថា ផ្ទះសម្បែងប្រជាពលរដ្ឋ១ ៦៣៥គ្រួសារនៅក្រុងពោធិ៍សាត់ ស្រុកវាលវែង ស្រុកភ្នំក្រវាញ និងស្រុកកណ្ដៀង ត្រូវទឹកជន់លិចបន្ទាប់ពីទទួលរងទឹកភ្លៀងធ្លាក់២ថ្ងៃជាប់ៗគ្នា ដែលបង្កឱ្យកម្ពស់ទឹកស្ទឹងពោធិ៍សាត់ហក់ឡើងដល់កម្រិតប្រកាសអាសន្ន។
បើតាមរបាយការណ៍ ប្រជាពលរដ្ឋ១៨០គ្រួសារ ស្ថិតនៅក្នុងស្រុកភ្នំក្រវាញ ភាគខាងត្បូងក្រុងពោធិ៍សាត់ ត្រូវបានអាជ្ញាធរជម្លៀសទៅកាន់ទីទួលសុវត្ថិភាព ខណៈទឹកជំនន់ហក់ឡើងលឿននៅស្ទឹងពោធិ៍សាត់ បានជន់លិចផលដំណាំប្រជាពលរដ្ឋ៦០១ហិកតានៅក្នុងឃុំ-សង្កាត់ចំនួន១៩។
ទន្ទឹមគ្នានេះ ទឹកជំនន់ក៏បានបំផ្លាញស្ពានចំនួន៤និងផ្លូវចំនួន២០ខ្សែ នៅក្នុងក្រុងនិងស្រុកចំនួន៤របស់ខេត្តនេះ ប៉ុន្តែគ្មានតួលេខគ្រោះថ្នាក់ដល់អាយុជីវិតមនុស្សបានកើតឡើងនោះឡើយ។
ប្រធានមន្ទីរធនធានទឹក និងឧតុនិយមខេត្តពោធិ៍សាត់ លោក កែវ វ័យ បានប្រាប់បន្ថែមថា កម្ពស់ទឹកស្ទឹងពោធិ៍សាត់នៅស្រុកភ្នំក្រវាញ បានថមថយបណ្ដើរៗហើយបន្ទាប់ពីទឹកភ្លៀងឈប់ធ្លាក់ចាប់តាំងពីថ្ងៃអាទិត្យចុងសប្ដាហ៍កន្លងមកនេះ។
កម្ពុជាបានទទួលរងទឹកភ្លៀងធ្លាក់កម្រិតពីមធ្យមទៅច្រើននៅតំបន់ជាច្រើននៅទូទាំងប្រទេសចន្លោះពីថ្ងៃទី១៨ ដល់ថ្ងៃទី២០ ខែកញ្ញា ដោយសារតែឥទ្ធិពលនៃព្យុះនូលដែលបានបោកបក់មកពីមហាសមុទ្រប៉ាស៊ីហ្វិកឆ្លងកាត់ប្រទេសហ្វីលីពីន និងគ្រប់ដណ្ដប់មកលើថៃ ឡាវ និងវៀតណាមផងដែរ៕
