ប្រទេសមីយ៉ាន់ម៉ា គ្រោងនឹងដំណើរការបោះឆ្នោតរបស់ខ្លួននៅក្នុងខែវិច្ឆិកា ទៅតាមការគ្រោងទុក បើទោះបីជាក្រុមបក្សប្រឆាំងបានអំពាវនាវឱ្យមានការពន្យារពេលការបោះឆ្នោតនេះ ដោយសារវិបត្តិជំងឺកូវីដ១៩ក៏ដោយ។
សារព័ត៌មាន CNA បានរាយការណ៍កាលពីថ្ងៃចន្ទម្សិលមិញថា ប្រទេសនេះមានករណីឆ្លងវីរុសកូវីដ១៩ ចំនួន៦៧១ករណី កាលពីថ្ងៃទី២០ ខែកញ្ញា ដែលជាអត្រាឆ្លងប្រចាំថ្ងៃខ្ពស់បំផុតដែលមិនធ្លាប់មាន ខណៈនៅថ្ងៃចន្ទបានរកឃើញករណីអ្នកឆ្លងថ្មីចំនួន២៦៤នាក់និងស្លាប់២នាក់ ដែលធ្វើឱ្យចំនួនអ្នកឆ្លងសរុបកើនដល់ជាង៥៥០០ករណីនិងស្លាប់ជាង៩០នាក់។
ទោះជាយ៉ាងណា ក្រុមអ្នកវិភាគនិយាយថា ការបោះឆ្នោតនៅថ្ងៃទី៨ ខែវិច្ឆិកាខាងមុន ជាការសាកល្បងនៃវិសាលភាពនៃកំណែទម្រង់ប្រជាធិបតេយ្យរបស់មីយ៉ាន់ម៉ា។
សារព័ត៌មាននេះបានបន្តថា គណបក្សនយោបាយនានាបានបញ្ចប់យុទ្ធនាការឃោសនាបោះឆ្នោតនៅរដ្ឋធានីយ៉ាងហ្គោន (Yangon) កាលពីថ្ងៃចន្ទ បន្ទាប់ពីអាជ្ញាធរបានដាក់ចេញនូវវិធានការតឹងរ៉ឹងនៅទូទាំងទីក្រុង ដោយបង្ខំឱ្យប្រជាជនភាគច្រើនធ្វើការពីផ្ទះ ដើម្បីទប់ស្កាត់ការរាលដាលនៃការឆ្លងជំងឺកូវីដ១៩។
តែយ៉ាងណា មន្ត្រីជាន់ខ្ពស់នៃគណៈកម្មាធិការជាតិរៀបចំការបោះឆ្នោតមីយ៉ាន់ម៉ា លោក Myint Naing ប្រាប់អ្នកយកព័ត៌មានកាលពីចុងសប្តាហ៍ថា ការបោះឆ្នោតនឹងដំណើរការទៅមុខ។
លោកបានថ្លែងថា៖ «យើងមិនមានផែនការពន្យារពេលការបោះឆ្នោតដោយហេតុផលនៃជំងឺកូវីដ១៩នោះទេ»។
លោក Myint Naing ត្រូវបានសារព័ត៌មាន CNA បានស្រង់ប្រសាសន៍បន្តទៀតថា អាជ្ញាធរមីយ៉ាន់ម៉ា នឹងបង្កើនចំនួនមណ្ឌលបោះឆ្នោតពី៤០០០០ទៅ ៥០០០០កន្លែង ដើម្បីចៀសវាងកុំឱ្យមានមនុស្សប្រមូលផ្តុំច្រើន ហើយមន្ត្រីបម្រើការនៅមណ្ឌលបោះឆ្នោតនីមួយៗ តម្រូវឱ្យពាក់ឧបករណ៍ការពារ និងអ្នកបោះឆ្នោតនឹងត្រូវប្រាប់ឱ្យលាងដៃ។
លោកនិយាយថា៖ «យើងបានរៀបចំរួចជាស្រេចហើយ ដូច្នេះមិនមានអ្វីដែលត្រូវព្រួយបារម្ភទេ»។
លោក Monywa Aung Shin មន្ត្រីជាន់ខ្ពស់មកពីគណបក្សសម្ព័ន្ធជាតិដើម្បីប្រជាធិបតេយ្យ បានប្រាប់ទីភ្នាក់ងារសារព័ត៌មានរ៉យទ័រថា លោកជឿថា ការបោះឆ្នោតនេះនឹងមិនមានអ្វីខុសប្លែកទៅនឹងការបោះឆ្នោតមុនពេលមានជំងឺរាតត្បាតនេះទេ។
លោកនិយាយថា៖ «វាល្អជាងការដែលយើងហ៊ានប្រឈមជាមួយគ្រោះថ្នាក់»។
កាលពីសប្តាហ៍មុន គណបក្សចំនួន២៤បានផ្ញើលិខិតមួយទៅគណៈកម្មាធិការជាតិរៀបចំការបោះឆ្នោត ដោយជំរុញឱ្យពិចារណាឡើងវិញលើកាលបរិច្ឆេទការបោះឆ្នោតនេះ។
Nandar Hla Myint អ្នកនាំពាក្យគណបក្សសាមគ្គីភាព និងការអភិវឌ្ឍន៍ បានប្រាប់ទីភ្នាក់ងារសារព័ត៌មានរ៉យទ័រថា គណបក្សប្រឆាំងមួយនេះបានស្នើឱ្យមានការពន្យារពេលការបោះឆ្នោត។
លោកថា៖ «ក្នុងនាមជាគណបក្សដែលយកចិត្តទុកដាក់លើផលប្រយោជន៍របស់ប្រជាជន យើងបានស្នើឱ្យគណៈកម្មាធិការជាតិពិចារណាផ្លាស់ប្តូរកាលបរិច្ឆេទ[ការបោះឆ្នោត]»។
អ្នកវិភាគនយោបាយ លោក Yan Myo Thein បាននិយាយថា គណបក្សនយោបាយនានា កំពុងផ្លាស់ប្តូរយុទ្ធនាការរបស់ពួកគេ ដោយប្រើប្រាស់បណ្តាញសង្គមវិញ ដោយសារតែការរាតត្បាតនៃជំងឺកូវីដ១៩ ប៉ុន្តែពួកគេត្រូវការពេលវេលាបន្ថែមទៀតដើម្បីរៀបចំ។
លោកនិយាយថា៖ «អ្នកបោះឆ្នោតជាច្រើនគឺនៅតំបន់ដាច់ស្រយាល ហើយវាពិបាកដឹង ថាតើពួកគេមានការយល់ដឹងកម្រិតណាពីការប្រើប្រាស់បណ្តាញសង្គម ដើម្បីទទួលបានព័ត៌មានពីយុទ្ធនាការឃោសនាបោះឆ្នោតតាមអនឡាញនេះ»៕