ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋទាំងអស់ បន្តបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិ ផ្គរ រន្ទះ និងភ្លៀងខ្យល់ ខណៈដែលកម្ពុជារងនូវប្រព័ន្ធសម្ពាធទាប។
សេចក្តីជូនដំណឹងរបស់ក្រសួងធនធានទឹក និងឧតុនិយម នៅព្រឹកថ្ងៃអង្គារ ទី២២ ខែកញ្ញា បានឱ្យដឹងថា ប្រព័ន្ធសម្ពាធទាបដែលអូសបន្លាយឆ្លងកាត់ភាគខាងជើងប្រទេសកម្ពុជា នៅថ្ងៃទី២៣ ខែកញ្ញា នឹងធ្វើឱ្យស្ថានភាពអាកាសធាតុនៅបណ្តាខេត្តតាមតំបន់ទំនាបកណ្តាលនិង តំបន់មាត់សមុទ្រ អាចមានភ្លៀងធ្លាក់ក្នុងកម្រិតពីមធ្យមទៅច្រើន។
ក្រសួងបន្តថា ដោយឡែក បណ្តាខេត្តនៅតាមតំបន់ជួរភ្នំដងរែកនិងខ្ពង់រាបឦសាន អាចមានភ្លៀងធ្លាក់ក្នុងកម្រិតពីមធ្យមទៅបង្គួរ។
ករណីនេះ ក្រសួងបានអំពាវនាវដល់ប្រជាពលរដ្ឋទាំងអស់ ជាពិសេសពលរដ្ឋដែលរស់នៅតាមបណ្តាខេត្តនៅតំបន់ទំនាបកណ្តាល ឱ្យមានការប្រុងប្រយ័ត្នខ្ពស់ចំពោះបាតុភូតផ្គរ រន្ទះ និងខ្យល់កន្ត្រាក់។
ក្រសួងបន្ថែមថា៖ «ប្រជាពលរដ្ឋនៅតំបន់មាត់សមុទ្រ អ្នកនេសាទ និងអ្នកដំណើរសមុទ្រ ត្រូវប្រុងប្រយ័ត្នចំពោះភ្លៀងខ្យល់បក់បោកខ្លាំងនិងរលកសមុទ្រខ្ពស់ៗ ចាប់ពីថ្ងៃទី២៤ ដល់ថ្ងៃទី២៧ ខែកញ្ញា»។
គួរបញ្ជាក់ថា កាលពីសប្តាហ៍មុន ប្រទេសកម្ពុជាបានរងនូវឥទ្ធិពលព្យុះទី១១ ឈ្មោះថា នូល (NOUL) បានធ្វើឱ្យមានភ្លៀងធ្លាក់ច្រើននៅតំបន់ខ្លះ បង្កជាជំនន់ទឹកភ្លៀងហើយជន់លិចនៅក្នុងក្រុងស្រុកចំនួន១០ នៃខេត្តចំនួន៥ រួមមាន ខេត្តព្រះសីហនុ ពោធិ៍សាត់ ឧត្តរមានជ័យ កោះកុង និងប៉ៃលិន។
ឥទ្ធិពលព្យុះនេះក៏បានធ្វើឱ្យមនុស្សចំនួន១១នាក់បានស្លាប់ដោយសាររន្ទះបាញ់ និងជំនន់ទឹកភ្លៀង ខណៈផ្ទះជិត២ពាន់ខ្នងបានលិចលង់។ ក្រៅពីនោះ ក៏មានប្រជាពលរដ្ឋជាង៤០០នាក់ បានជម្លៀសចេញពីភូមិដោយសារឥទ្ធិពលនៃព្យុះនេះផងដែរ៕
