នាយករដ្ឋមន្រ្តីថៃបានលើកឡើងថា ផែនការអភិវឌ្ឍន៍សេដ្ឋកិច្ចនិងសង្គមរបស់ប្រទេសថៃ ក្នុងរយៈពេល២ឆ្នាំខាងមុខ គួរតែផ្តោតជាចម្បងលើការអភិវឌ្ឍសេដ្ឋកិច្ចសហគមន៍ បង្កើនភាពប្រកួតប្រជែង ការលើកកម្ពស់ធនធានមនុស្ស និងការអភិវឌ្ឍហេដ្ឋារចនាសម្ព័ន្ធ។
សារព័ត៌មានបាងកកប៉ុស្តិ៍ បានស្រង់ប្រសាសន៍លោកនាយករដ្ឋមន្រ្តី Prayut Chan-o-cha នៅក្នុងកិច្ចប្រជុំប្រចាំឆ្នាំរបស់ក្រុមប្រឹក្សាជាតិអភិវឌ្ឍន៍សេដ្ឋកិច្ចនិងសង្គម (NESDC) កាលពីថ្ងៃចន្ទថា ផែនការយុទ្ធសាស្ត្រជាតិរយៈពេល២០ឆ្នាំរបស់ប្រទេស ចាំបាច់ត្រូវបានធ្វើវិសោធនកម្ម ដោយផ្តោតការយកចិត្តទុកដាក់បន្ថែមទៀត ទៅលើការស្តារនិតិសម្បទាសង្គមនិងសេដ្ឋកិច្ច ដែលត្រូវបានចុះអន់ថយដោយសារជំងឺរាតត្បាតកូវីដ១៩។
លោកថា៖ «នៅចន្លោះឆ្នាំ២០២១និង២០២២ NESDC ត្រូវផ្ដោតលើគម្រោងអភិវឌ្ឍន៍ទាំង៤នេះ រាជរដ្ឋាភិបាលបានត្រៀមថវិកា៤០០ពាន់លានបាតរួចហើយ ដើម្បីគាំទ្រដល់កិច្ចខិតខំប្រឹងប្រែងទាំងនោះ ដែលជាផ្នែកមួយដើម្បីស្តារសេដ្ឋកិច្ចប្រទេសឡើងវិញពីវិបត្តិជំងឺកូវីដ១៩»។
លោក Thosaporn Sirisamphand អគ្គលេខាធិការ NESDC បានឱ្យដឹងថា ក្រុមប្រឹក្សានេះ គ្រោងនឹងអនុម័តថវិកា៩២ពាន់លានបាតនៃថវិកា៤០០ពាន់លានបាតរបស់រដ្ឋ សម្រាប់ការស្តារសេដ្ឋកិច្ចនិងសង្គមឡើងវិញនៅក្នុងខែនេះ។ លោកបន្តថា រដ្ឋាភិបាលគ្រោងនឹងត្រៀមថវិកាចំនួន១០០ពាន់លានបាតទៀត ក្រោមការអនុវត្តផែនការដូចគ្នានេះនៅក្នុងត្រីមាសទី៤ចុងឆ្នាំនេះ និង២០០ពាន់លានបាត នៅត្រីមាសទី១និងទី២នៅដើមឆ្នាំក្រោយ។
លោកបានបន្ថែមថា រដ្ឋាភិបាលក៏សន្យាដាក់ចេញនូវវិធានការបន្ថែមទៀត ដើម្បីទប់ស្កាត់ការកើនឡើងភាពអត់ការងារធ្វើ និងបន្ធូរបន្ថយផលប៉ះពាល់នៃការរាតត្បាតជំងឺកូវីដ១៩ទៅលើអ្នកដែលមានប្រាក់ចំណូលទាបផងដែរ។
បើតាមលោក Thosaporn អត្រាអ្នកគ្មានការងារក្នុងប្រទេសនេះ ត្រូវបានគេប៉ាន់ប្រមាណថា មានប្រមាណ២%នៃកម្លាំងពលកម្មសរុបនៅឆ្នាំនេះ ដែលមានចំនួនប្រហែល៧៥០ ០០០នាក់៕