គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា គិតត្រឹមថ្ងៃចន្ទម្សិលមិញ ឥទ្ធិពលព្យុះទី១១ ឈ្មោះ នូល បានបង្កផលប៉ះពាល់ទៅលើខេត្តចំនួន៩ ដែលបណ្តាលឱ្យមានមនុស្ស១១នាក់បានស្លាប់និង៣នាក់ទៀតរងរបួស។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា ខេត្តចំនួន៦ រួមមាន ខេត្តប៉ៃលិន ឧត្តរមានជ័យ ពោធិ៍សាត់ កោះកុង សៀមរាប និងខេត្តព្រះសីហនុ បានរងផលប៉ះពាល់ដោយទឹកជំនន់ និងខេត្តបាត់ដំបង កំពត និងកែប រងផលប៉ះពាល់ដោយខ្យល់កន្ត្រាក់និងរន្ទះបាញ់ ក្រោមឥទ្ធិពលនៃព្យុះនូល។
របាយការណ៍បន្តថា មានមនុស្ស៣នាក់បានស្លាប់ដោយសារទឹកជំនន់ នៅខេត្តកោះកុង ខេត្តព្រះសីហនុ និងខេត្តប៉ៃលិន ខណៈមនុស្ស៨នាក់ទៀតបានស្លាប់និង៣នាក់ទៀតរងរបួសដោយសារករណីរន្ទះបាញ់ នៅខេត្តបាត់ដំបង។
គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងបន្តថា ជំនន់ទឹកភ្លៀងក៏បានបណ្តាលឱ្យផ្ទះពលរដ្ឋជាង២០០០ខ្នងលិចលង់ និងមានពលរដ្ឋជាង៣១០០គ្រួសាររងផលប៉ះពាល់ ខណៈពលរដ្ឋជាង៦០០គ្រួសារទៀត ត្រូវបានជម្លៀសទៅកាន់ទីទួលសុវត្ថិភាព។ ក្រៅពីនោះ ផលដំណាំនិងហេដ្ឋារចនាសម្ព័ន្ធផ្លូវថ្នល់ ស្ពាន សាលារៀនមួយចំនួន ក៏បានរងនូវផលប៉ះពាល់ផងដែរ។
ដោយឡែក ផលប៉ះពាល់ដោយសារខ្យល់កន្ត្រាក់វិញ ក៏បង្កឱ្យខូចខាតផ្ទះសម្បែងរបស់ប្រជាពលរដ្ឋជិត៤០ខ្នងផងដែរ។
នៅថ្ងៃអង្គារនេះដែរ ក្រសួងធនធានទឹក និងឧតុនិយម ក៏បានអំពាវនាវដល់ប្រជាពលរដ្ឋទាំងអស់ ជាពិសេសពលរដ្ឋដែលរស់នៅតាមបណ្តាខេត្តនៅតំបន់ទំនាបកណ្តាល ឱ្យមានការប្រុងប្រយ័ត្នខ្ពស់ចំពោះបាតុភូតផ្គរ រន្ទះ និងខ្យល់កន្ត្រាក់ ខណៈដែលកម្ពុជានៅបន្តទទួលរងឥទ្ធិពលសម្ពាធទាប។
ក្រសួងបន្ថែមថា ប្រជាពលរដ្ឋនៅតំបន់មាត់សមុទ្រ អ្នកនេសាទ និងអ្នកដំណើរសមុទ្រ ក៏ត្រូវមានការប្រុងប្រយ័ត្នចំពោះភ្លៀងខ្យល់បក់បោកខ្លាំងនិងរលកសមុទ្រខ្ពស់ៗ ចាប់ពីថ្ងៃទី២៤ ដល់ថ្ងៃទី២៧ ខែកញ្ញា៕
