ធនាគារអភិវឌ្ឍន៍អាស៊ី ផ្តល់កម្ចីជាង២៩លានដុល្លារដល់រដ្ឋាភិបាលកម្ពុជា ដើម្បីគាំទ្រការធ្វើឱ្យប្រសើរឡើងនូវការផ្តល់សេវាសាធារណៈ តាមរយៈកំណែទម្រង់សំខាន់ៗក្នុងការគ្រប់គ្រងហិរញ្ញវត្ថុសាធារណៈនិងវិមជ្ឈការ ជាពិសេសនៅតាមតំបន់ជនបទដែលភាគច្រើនមានពលរដ្ឋក្រីក្ររស់នៅ។
សេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី ហៅកាត់ ADB ចេញផ្សាយកាលពីថ្ងៃទី២២ ខែកញ្ញា ថា ការអនុម័តហិរញ្ញប្បទានជាង២៩លានដុល្លារនេះ ជាកម្មវិធីទី២នៃការអភិវឌ្ឍផ្នែកសេវានិងការគ្រប់គ្រងវិស័យហិរញ្ញវត្ថុសាធារណៈដែលបានធ្វើវិមជ្ឈការ។
ADB បានបន្តថា ប្រាក់កម្ចីនោះ ត្រូវបានបែងចែកជាពីរផ្នែក ក្នុងនោះប្រាក់កម្ចីផ្តោតលើគោលនយោបាយចំនួន២០លានដុល្លារ សម្រាប់គាំទ្រដល់វិធីសាស្រ្តក្នុងការពង្រឹងផែនការនិងការគ្រប់គ្រងសារពើពន្ធនៃរដ្ឋបាលមូលដ្ឋាន ក៏ដូចជារដ្ឋបាលសាធារណៈ និងប្រាក់កម្ចីអនុវត្តន៍គម្រោងចំនួន៩,៣៥លានដុល្លារ សម្រាប់ជួយកសាងសាលារដ្ឋបាលមូលដ្ឋានជាតិ ដែលជាមជ្ឈមណ្ឌលបណ្តុះបណ្តាលសម្រាប់មន្រ្តីរាជរដ្ឋាភិបាលក្នុងតំបន់។
ដោយឡែក រដ្ឋាភិបាលបានផ្តល់ហិរញ្ញប្បទាននូវទឹកប្រាក់ចំនួន១,៧លានដុល្លារដល់គម្រោងនេះផងដែរ។
អ្នកជំនាញជាន់ខ្ពស់ផ្នែកគ្រប់គ្រងវិស័យសាធារណៈរបស់ធនាគារអភិវឌ្ឍន៍អាស៊ី លោកស្រី Jhelum Thomas លើកឡើងថា គម្រោងនេះមានគោលបំណងជួយដល់រដ្ឋបាលមូលដ្ឋាននៅទូទាំងប្រទេសកម្ពុជា ក្នុងការផ្តល់នូវសេវាសាធារណៈមូលដ្ឋានប្រកបដោយនិរន្តរភាពនិងប្រសិទ្ធភាព ហើយក៏ជាការបង្រួមគម្លាតតំបន់ជនបទនិងទីប្រជុំជនផងដែរ។
លោកស្រី Jhelum Thomas ៖ «គម្រោងនេះចាំបាច់ណាស់ ខណៈដែលជំងឺរាតត្បាតកូវីដ១៩ ធ្វើឱ្យប្រជាពលរដ្ឋមួយចំនួនបានផ្លាស់ទីពីទីក្រុងទៅជនបទ។ ប្រការនេះនឹងនាំដល់សម្ពាធបន្ថែមដល់រដ្ឋបាលមូលដ្ឋានក្នុងការផ្តល់ជំនួយសង្គមនិងសេវាកម្មចាំបាច់ ដូចជា ផ្លូវថ្នល់ ការផ្គត់ផ្គង់ទឹក និងអនាម័យ ដើម្បីគាំទ្រដល់ការរីកចម្រើនប្រកបដោយបរិយាប័ន្ននិងសមធម៌»។
ADB ថា ចាប់ពីឆ្នាំ១៩៩៩ ដល់ឆ្នាំ២០១៩ ការកាត់បន្ថយភាពក្រីក្រក្នុងឆ្នាំ២០១៤ មកនៅត្រឹម ១៣,៥ ហើយនៅក្នុងឆ្នាំ២០០៧ មានចំនួន៤៧,៨% ប៉ុន្តែទោះជាយ៉ាងណាក៏ដោយ ពលរដ្ឋកម្ពុជាជាង៧០%រកចំណូលបានតិចជាង៣ដុល្លារនៅក្នុងមួយថ្ងៃ ខណៈការទទួលបានសេវាមូលដ្ឋានក៏មិនទាន់មានភាពស្មើគ្នាផងដែរ។
ក្រៅពីរកចំណូលបានតិចហើយ គ្រួសារក្រីក្រនិងងាយរងគ្រោះទាំងនោះ កំពុងប្រឈម ហានិភ័យធ្ងន់ធ្ងរ ខណៈដែលមានជំងឺរាតត្បាតកូវីដ១៩ ដែលករណីនេះបាននាំឱ្យមានការធ្លាក់ចុះនៃវិស័យសំខាន់ៗក្នុងសេដ្ឋកិច្ចកម្ពុជានិងការលំបាកនៃជីវភាពរស់នៅ។
កាលពីថ្ងៃទី១១ ខែកញ្ញា ឆ្នាំ២០២០ ADB ក៏បានផ្តល់កម្ចីជាង១២៧លានដុល្លារដល់កម្ពុជា សម្រាប់កសាងបណ្តាញបញ្ជូននិងអនុស្ថានីយអគ្គិសនី នៅរាជធានីភ្នំពេញនិងខេត្តចំនួន៣ទៀតនៅកម្ពុជា ឱ្យទទួលបានការផ្គត់ផ្គង់អគ្គិសនីប្រកបដោយស្ថិរភាពនិងអាចទុកចិត្តបាន៕
