សមត្ថកិច្ចខេត្តតាកែវ នៅថ្ងៃពុធនេះ បានឃាត់ខ្លួនយុវជនចំនួន៧នាក់ជិត១០ម៉ោង ដើម្បីសួរនាំ ក្រោយពីពួកគេចុះទៅផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីស នៅស្រុកបាទី ដោយពុំមានការជូនដំណឹងជាមុន។
អធិការស្រុកបាទី លោក ឆាយ កែវមុន្នី ប្រាប់វីអូឌីនៅល្ងាចនេះថា សមត្ថកិច្ចបានឃាត់ខ្លួនយុវជនទាំងនោះ កាលពីម៉ោងជាង៨ព្រឹក និងបានដោះលែងវិញនៅម៉ោងជិត៥ល្ងាច បន្ទាប់ពួកគេយល់ព្រមធ្វើកិច្ចសន្យាបញ្ឈប់សកម្មភាពនេះ។ លោកបានបញ្ជាក់ពីមូលហេតុថា ការឃាត់ខ្លួនសួរនាំនេះដើម្បីរក្សាសន្តិសុខតែប៉ុណ្ណោះ។
លោកថា៖ «លើកក្រោយ បើគាត់មក សុំប្រាប់អាជ្ញាធរយើងឱ្យបានដឹងផង យើងគ្រាន់ចង់ដឹងគោលបំណងគាត់មកធ្វើអី ព្រោះយើងនៅមូលដ្ឋាន យើងអត់ដឹងគាត់ធ្វើអីម៉េចកើត ក្នុងនាមយើងរក្សាសន្តិសុខសណ្ដាប់ធ្នាប់ជូនពលរដ្ឋយើង»។
លោក ស្រ៊ុន ស្រ៊ន ជាយុវជនម្នាក់ក្នុងចំណោម៧នាក់ដែលសកម្មក្នុងការផ្សព្វផ្សាយពីកិច្ចព្រមព្រៀងទីក្រុងប៉ារីស បានប្រាប់វីអូឌីក្រោយការដោះលែងថា ក្នុងពេលសួរនាំនោះ សមត្ថកិច្ចបានសួររកអ្នកនៅពីក្រោយសកម្មភាពរបស់ពួកគាត់ ពាក់ព័ន្ធនឹងការចុះផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីសនេះ។
លោកថា៖ «អាជ្ញាធរ គាត់សួរពួកខ្ញុំថា មានអ្នកនៅពីក្រោយឬមានស្ថាប័នណាចាត់ចែងមក មានប្រាក់អីអ៊ីចឹង ខ្ញុំឆ្លើយថា អត់ទេ! ខ្ញុំជាពលរដ្ឋ និយាយច្បាប់មិនបានឬម៉េច។ [អាជ្ញាធរ] គាត់ថា និយាយច្បាប់បាន ប៉ុន្តែគាត់នៅតែអត់ជឿពួកខ្ញុំ»។
លោក ស្រ៊ុន ស្រ៊ន បានបន្ថែមថា៖ «ខ្ញុំនិយាយ [រឿងកិច្ចព្រមព្រៀងទីក្រុងប៉ារីស] ក្នុងនាមខ្ញុំជាពលរដ្ឋហ្នឹង ហេតុអីមិនបាន គេ [អាជ្ញាធរ] ចង់ឱ្យខ្ញុំបង្កើតជាស្ថាប័ន។ អ៊ីចឹងក្នុងនាមខ្ញុំជាពលរដ្ឋ ខ្ញុំត្រូវតែនិយាយ ប៉ុន្តែបើគាត់ [អាជ្ញាធរ] ឱ្យខ្ញុំផ្ដិតមេដៃហាមដើម្បីមិនឱ្យនិយាយ យើងមិនអាចធ្វើបាន គ្រាន់តែអ៊ីចឹងមានអីពិបាកធ្វើ»។
បើតាមរបាយការណ៍របស់អង្គការលីកាដូ ចេញផ្សាយកាលពីថ្ងៃទី២២ ខែកញ្ញានេះ ថា អ្នកការពារសិទ្ធិមនុស្ស សកម្មជន និងសិល្បករចំនួន១៩នាក់ហើយត្រូវបានឃុំខ្លួននៅក្នុងពន្ធនាគារ ចាប់តាំងពីខែកក្កដាមក ដោយសារការប្រើប្រាស់សិទ្ធិសេរីភាពក្នុងការបញ្ចេញមតិនិងជួបជុំគ្នាដោយសន្តិវិធីដែលមានចែងក្នុងរដ្ឋធម្មនុញ្ញ។
អង្គការនេះបន្តថា ការធ្វើទុក្ខបុកម្នេញជាបន្តបន្ទាប់ទៅលើអ្នកទាំងនោះ បានចាប់ផ្តើមបន្ទាប់ពីការចាប់ខ្លួនលោក រ៉ុង ឈុន ប្រធានសហជីពនិងជាសមាជិកក្រុមប្រឹក្សាឃ្លាំមើលកម្ពុជា។
អង្គការលីកាដូ បន្ថែមថា អ្នកទាំង១៩នាក់នោះកំពុងប្រឈមនឹងការជាប់ពន្ធនាគាររហូតដល់២ឆ្នាំ ប្រសិនបើរកឃើញថាមានទោស៕
