អាជ្ញាធរខេត្តតាកែវ បានឃាត់ខ្លួនក្រុមយុវជនមួយក្រុមដែលបាននាំគ្នាចុះទៅស្រុកបាទីផ្សព្វផ្សាយពីកិច្ចព្រមព្រៀងសន្តិភាពទីក្រុងប៉ារីស ដោយពុំមានការជូនដំណឹងជាមុន។
អធិការស្រុកបាទី លោក ឆាយ កែវមុន្នី ប្រាប់វីអូឌីនៅថ្ងៃនេះថា សមត្ថកិច្ចបានឃាត់ខ្លួនយុវជនទាំងនោះទៅសួរនាំនៅអធិការដ្ឋាននគរបាលស្រុក ពីគោលបំណងរបស់ពួកគេដែលចុះទៅផ្សព្វផ្សាយពីកិច្ចព្រមព្រៀងសន្តិភាពទីក្រុងប៉ារីសនេះ។
លោកថា៖ «កំពុងនិយាយលេងជាមួយគាត់ សួរនាំគោលការណ៍ដែលគាត់មកនេះ ធ្វើអីៗ ខ្ញុំត្រូវសួរនាំចង់ដឹងថា គាត់មកហ្នឹងធ្វើអីតែប៉ុណ្ណឹងទេ»។
តែយ៉ាងណា អធិការស្រុករូបនេះសុំមិនអត្ថាធិប្បាយលម្អិតថា តើមានយុវជនប៉ុន្មាននាក់ដែលត្រូវបានឃាត់ខ្លួនទៅសាកសួរនោះទេ ហើយគិតមកដល់ម៉ោងជាង៤រសៀលនេះ យុវជនទាំងនោះកំពុងស្ថិតនៅក្រោមការសាកសួររបស់សមត្ថកិច្ចនៅឡើយ។
តាមប្រភពពីអ្នកសារព័ត៌មានពលរដ្ឋ ឱ្យដឹងថា យុវជនដែលត្រូវសមត្ថកិច្ចស្រុកបាទីសួរនាំនោះ មានឈ្មោះ ស្រ៊ុន ស្រ៊ន ជាយុវជនម្នាក់ដែលសកម្មក្នុងការផ្សព្វផ្សាយពីច្បាប់នានានិងកិច្ចព្រមព្រៀងទីក្រុងប៉ារីស នៅលើបណ្តាញសង្គមហ្វេសប៊ុក។ យុវជនរូបនេះបានធ្វើដំណើរជាមួយសមាជិកផ្សេងទៀតទៅកាន់ស្រុកបាទី ខេត្តតាកែវ នៅថ្ងៃពុធនេះ ដើម្បីធ្វើការផ្សព្វផ្សាយពីកិច្ចព្រមព្រៀងសន្តិភាពទីក្រុងប៉ារីស។
បើតាមរបាយការណ៍របស់អង្គការលីកាដូ ចេញផ្សាយកាលពីថ្ងៃទី២២ ខែកញ្ញានេះ ថា អ្នកការពារសិទ្ធិមនុស្ស សកម្មជន និងសិល្បករចំនួន១៩នាក់ហើយ ត្រូវបានឃុំខ្លួននៅក្នុងពន្ធនាគារ ចាប់តាំងពីខែកក្កដាមក ដោយសារការប្រើប្រាស់សិទ្ធិសេរីភាពក្នុងការបញ្ចេញមតិនិងជួបជុំគ្នាដោយសន្តិវិធីដែលមានចែងក្នុងរដ្ឋធម្មនុញ្ញ។
អង្គការនេះបន្តថា ការធ្វើទុក្ខបុកម្នេញជាបន្តបន្ទាប់ទៅលើអ្នកទាំងនោះ បានចាប់ផ្តើមបន្ទាប់ពីការចាប់ខ្លួនលោក រ៉ុង ឈុន ប្រធានសហជីពនិងជាសមាជិកក្រុមប្រឹក្សាឃ្លាំមើលកម្ពុជា។
អង្គការលីកាដូ បន្ថែមថា អ្នកទាំង១៩នាក់នោះ កំពុងប្រឈមនឹងការជាប់ពន្ធនាគាររហូតដល់២ឆ្នាំ ប្រសិនបើរកឃើញថាមានទោស៕
