ប្រទេសវៀតណាម តម្រូវឱ្យជនបរទេសដែលចូលមកប្រទេសខ្លួនតាមជើងហោះហើរពាណិជ្ជកម្ម ត្រូវបង់ប្រាក់ប្រហែល១，៤៦៨លានដុង (៦៣ដុល្លារ) សម្រាប់ការធ្វើតេស្តកូវីដ១៩ ចំនួន២លើក ហើយចុះឈ្មោះព័ត៌មានទំនាក់ទំនងនិងការធ្វើចត្តាឡីស័កផងដែរ។
វៀតណាមបានអនុញ្ញាតឱ្យជើងហោះហើរពាណិជ្ជកម្មចាប់ផ្តើមចរាចរឡើងវិញកាលពីពាក់កណ្តាលខែកញ្ញាចំពោះប្រទេសមួយចំនួន ហើយជនបរទេសតម្រូវឱ្យធ្វើចត្តាឡីស័ក១៤ថ្ងៃ និងត្រូវបានធ្វើតេស្តកូវីដ១៩ចំនួនពីរដង ដោយប្រើការផ្លាស់ប្តូរវេនបញ្ច្រាសជាក់ស្តែង ហើយតម្លៃធ្វើតេស្តម្តង៧៣៤ ០០០ដុង (៣១,៥៣ដុល្លារ)។ នេះបើតាមការប្រកាសរបស់ក្រសួងសុខាភិបាលវៀតណាម កាលពីថ្ងៃចន្ទម្សិលមិញ។
សូមជម្រាបថា អ្នកដំណើរដែលមកដល់ប្រទេសវៀតណាមភ្លាម ត្រូវចំណាយបន្ថែមចំនួន២៣៨ ០០០ ដុង (១០,២២ដុល្លារ) សម្រាប់ការប្រើឧបករណ៍តេស្តរហ័ស ដើម្បីបញ្ជាក់ពីស្ថានភាពបណ្តោះអាសន្នកូវីដ១៩។ ចំនួននេះ រដ្ឋាភិបាលវៀតណាមអនុវត្តចំពោះប្រជាជនទាំងអស់ដែលមកពីបរទេស រួមទាំងពលរដ្ឋវៀតណាមផងដែរ។
យោងតាមសារព័ត៌មានក្នុងស្រុកវៀតណាម VN EXPRESS បាននិយាយថា អ្នកដំណើរទាំងអស់ មុនពេលធ្វើដំណើរ ត្រូវបង្ហាញលិខិតឆ្លងដែន ទិដ្ឋាការចូល និងវិញ្ញាបនបត្របញ្ជាក់ថាពួកគេបានធ្វើតេស្តរកមេរោគកូវីដ១៩ រួចរាល់ដោយប្រើវិធីសាស្ត្រ RT-PCR ក្នុងរយៈពេលបីថ្ងៃ។ វិញ្ញាបនបត្រនេះត្រូវតែមានការបញ្ជាក់ពីភ្នាក់ងារការទូតវៀតណាមប្រចាំប្រទេសកំណើតខ្លួន។ អ្នកដែលធ្វើតេស្តរកមេរោគឃើញថាឆ្លងវីរុសកូរ៉ូណា នឹងត្រូវបានបញ្ជូនទៅមណ្ឌលព្យាបាលដើម្បីព្យាបាល។
ជនបរទេសដែលត្រូវបានអនុញ្ញាតនៅពេលនេះ គឺអ្នកដែលមានលិខិតឆ្លងដែនការទូតនិងផ្លូវការ អ្នកជំនាញ អ្នកគ្រប់គ្រងកម្មករជំនាញខ្ពស់ អ្នកវិនិយោគ សមាជិកគ្រួសាររបស់ពួកគេ និស្សិតអន្តរជាតិ និងសមាជិកគ្រួសាររបស់ពលរដ្ឋវៀតណាម។
សូមជម្រាបថា ប្រទេសវៀតណាមបានផ្អាករាល់ជើងហោះហើរអន្តរជាតិទាំងអស់នៅថ្ងៃទី២៥ ខែមីនា។
រហូតមកដល់ពេលនេះ ប្រទេសវៀតណាមបានរកឃើញអ្នកឆ្លងកូវីដ១៩ទូទាំងប្រទេស ចំនួន១ ០៦៨ករណី ក្នុងនោះ អ្នកជំងឺកំពុងសម្រាកព្យាបាលចំនួន៨៣ករណី។ ចំនួនអ្នកស្លាប់ដោយសារកូវីដ១៩ មានចំនួន៣៥នាក់។ មិនមានការឆ្លងវីរុសលក្ខណៈសហគមន៍នៅក្នុងប្រទេសនេះ អស់រយៈពេលជាងពីរសប្តាហ៍មកហើយ។
វៀតណាមជាប្រទេសមួយក្នុងចំណោមប្រទេសផ្សេងៗទៀតនៅក្នុងតំបន់និងពិភពលោក ដែលបានប្រកាសថា ខ្លួនរកឃើញវ៉ាក់សាំងប្រឆាំងមេរោគកូវីដ១៩។ វ៉ាក់សាំងនេះកំពុងដំណើរការពិសោធន៍ មុនឈានដល់ការប្រើប្រាស់លើមនុស្សជាផ្លូវការ៕
