តំណាងរដ្ឋាភិបាលអូស្ត្រាលីប្រចាំនៅកម្ពុជា បានបង្ហាញក្ដីបារម្ភរបស់ខ្លួនចំពោះការចាប់ខ្លួនមនុស្សជាច្រើននាក់នៅក្នុងរយៈពេលប៉ុន្មានសប្ដាហ៍ថ្មីៗនេះ។
សរសេរនៅលើ Twitter របស់ខ្លួនកាលពីថ្ងៃម្សិលមិញនេះ ឯកអគ្គរដ្ឋទូតអូស្ត្រាលីប្រចាំនៅកម្ពុជា លោក Pablo Kang បានរៀបរាប់ថា លោកបានជួបពិភាក្សាជាមួយរដ្ឋមន្ត្រីក្រសួងយុត្តិធម៌ លោក កើត រិទ្ធ កាលពីថ្ងៃអង្គារកន្លងមកនេះ។
ក្រៅពីជជែកពីទំនាក់ទំនងទ្វេភាគីរវាងប្រទេសទាំងពីរ តំណាងអូស្ត្រាលីរូបនេះបានរៀបរាប់ថា លោកបានលើកឡើងពីក្ដីបារម្ភជុំវិញការចាប់ខ្លួនក្រុមសកម្មជននាពេលថ្មីៗនេះ។
លោក Pablo Kang បានសរសេរថា៖ «បានជួបពិភាក្សាជាមួយលោក កើត រិទ្ធ រដ្ឋមន្ត្រីក្រសួងយុត្តិធម៌ ដោយបានលើកឡើងនូវក្តីបារម្ភរបស់ពួកយើងអំពីការចាប់ខ្លួនសកម្មជនមួយចំនួននាពេលថ្មីៗនេះ»។
ក្នុងសារឆ្លើយតបនៅលើទំព័រហ្វេសប៊ុករបស់លោក អ្នកនាំពាក្យក្រសួងយុត្តិធម៌ លោក គឹម សន្តិភាព បានអះអាងថា ការចាប់ខ្លួនក្រុមសកម្មជនពីសំណាក់សមត្ថកិច្ចនាពេលថ្មីៗនេះ គឺស្របទៅតាមច្បាប់របស់កម្ពុជា ហើយលោកចាត់ទុកការតវ៉ាដោយសន្តិវិធីរបស់ក្រុមសកម្មជនទាំងនោះថា គឺជាការដាក់សម្ពាធទៅលើស្ថាប័នតុលាការ ដែលលោកហៅថា «ពុំមែនជាវិធីស្របច្បាប់»ឡើយ។
លោក គឹម សន្តិភាព រៀបរាប់ថា៖ «ការចាប់ខ្លួនបុគ្គលណាមួយដោយអាជ្ញាធរមានសមត្ថកិច្ច គឺធ្វើទ្បើងដោយអនុលោមតាមច្បាប់នៃព្រះរាជាណាចក្រកម្ពុជា។ សិទ្ធិសេរីភាពបុគ្គលត្រូវយកមកអនុវត្តក្នុងក្របខណ្ឌច្បាប់ ហើយការអនុវត្តសិទ្ធិហួសព្រំដែន ប៉ះពាល់ដល់សិទ្ធិអ្នកដទៃ ឬបំពានលើច្បាប់ ត្រូវប្រឈមនឹងការទទួលខុសត្រូវចំពោះមុខច្បាប់ ហើយនេះពុំមែនជាការអនុវត្តសិទ្ធិសេរីភាពរបស់បុគ្គលនោះទេ»។
លោក គឹម សន្តិភាព បានរៀបរាប់បន្តថា លោក កើត រិទ្ធ បានប្រាប់ទៅទូតអូស្ត្រាលីថា បញ្ហាព្រំដែនគឺជាបញ្ហាដ៏រសើបបំផុតរបស់កម្ពុជា ហើយការញុះញង់មួលបង្កាច់ការពិតលើបញ្ហាព្រំដែន ធ្លាប់បានធ្វើឱ្យកម្ពុជាធ្លាក់ចូលក្នុងភ្នក់ភ្លើងសង្គ្រាម ការបែកបាក់ជាតិ និងអស្ថិរភាពសង្គមអស់ជិតបីទសវត្ស។
លោក គឹម សន្តិភាព រៀបរាប់ថា៖ «ដូចនេះ សម្រាប់កម្ពុជា ការមួលបង្កាច់និងការបំភ័ន្តការពិតលើបញ្ហាព្រំដែនក្នុងចេតនាញុះញង់ឱ្យមានចលាចលសង្គម គឺជាអំពើខុសច្បាប់ បំផ្លាញសន្តិភាព និងស្ថិរភាពប្រទេស ហើយពុំមែនជាការអនុវត្តនៃសិទ្ធិសេរីភាពក្នុងការបញ្ចេញមតិនោះទ្បើយ»។
សកម្មជន សិល្បករ និងអ្នកការពារសិទ្ធិមនុស្សសរុប១៩នាក់ហើយត្រូវបានសមត្ថកិច្ចចាប់ខ្លួនចាប់តាំងពីចុងខែកក្កដាកន្លងមកនេះ ពាក់ព័ន្ធនឹងអ្វីដែលអង្គការការពារសិទ្ធិមនុស្សលីកាដូហៅថា ជាការអនុវត្តសិទ្ធិសេរីភាពសម្ដែងមតិដោយសន្តិវិធី។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត បានអះអាងថា ការតវ៉ារបស់ក្រុមយុវជនត្រូវបានធ្វើឡើងដោយសន្តិវិធី ដែលជាផ្នែកមួយនៃសិទ្ធិសេរីភាពមូលដ្ឋានរបស់ប្រជាពលរដ្ឋធានាដោយច្បាប់ជាតិនិងអន្តរជាតិ។
លោក អំ សំអាត ប្រាប់ថា៖ «យើងឃើញថា ក្រោយការចាប់ខ្លួនលោក រ៉ុង ឈុន និងយុវជនជាបន្តបន្ទាប់ វាប៉ះពាល់ការបញ្ចេញមតិនិងការជួបជុំ ឬការប្រមូលផ្តុំដោយសន្តិវិធី និងសេរីភាពជាមូលដ្ឋានរបស់ប្រជាពលរដ្ឋ។ ដូច្នេះហើយយើងឃើញហើយ ទាំងអង្គការសហប្រជាជាតិបានសម្តែងការព្រួយបារម្ភ»៕