ក្រសួងមហាផ្ទៃ ណែនាំបន្ថែមទៀតទៅស្ថាប័នរដ្ឋមួយចំនួនធ្វើការដោះស្រាយបញ្ហាសេសសល់នានាជូនប្រជាពលរដ្ឋឱ្យមានតម្លាភាពនិងយុត្តិធម៌ ស្របតាមគោលការណ៍របស់រដ្ឋាភិបាល។
ក្នុងសេចក្តីណែនាំរបស់ក្រសួងមហាផ្ទៃ ចុះថ្ងៃទី២៣ ខែកញ្ញា ឆ្នាំ២០២០ បានឱ្យដឹងថា កន្លងមក ក្រសួងបានទទួលយកការដោះស្រាយបណ្តឹង សំណើ សំណូមពរ មតិយោបល់ ការថ្នាំងថ្នាក់ ឬក្តីកង្វល់របស់ពលរដ្ឋ ដែលពាក់ព័ន្ធនឹងសមត្ថកិច្ចក្រសួងមហាផ្ទៃ តាមរយៈដាក់លិខិតចូលមកក្រសួងឬតាមហ្វេសប៊ុកលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ការស្រង់ព័ត៌មាន រួមទាំងតាមបណ្តាញសង្គមនានា ដើម្បីបញ្ជូនទៅអគ្គនាយកដ្ឋានជំនាញពាក់ព័ន្ធចំណុះក្រសួងឬរដ្ឋបាលរាជធានី-ខេត្ត និងស្នងការដ្ឋាននគរបាលរាជធានី-ខេត្ត ធ្វើការដោះស្រាយ។
តែយ៉ាងណា ក្រសួងបន្តជំរុញទៅអគ្គនាយកដ្ឋានពាក់ព័ន្ធទាំងនោះ ធ្វើការដោះស្រាយបញ្ហានានាដែលនៅសេសសល់ជូនពលរដ្ឋប្រកបដោយតម្លាភាពនិងយុត្តិធម៌ ស្របតាមគោលការណ៍របស់រដ្ឋាភិបាល។
សេចក្តីណែនាំនេះបញ្ជាក់ថា៖ «ការដោះស្រាយបញ្ហាខាងលើមួយចំនួនទទួលបានលទ្ធផលល្អប្រសើរនិងបានឆ្លើយតបទាន់ពេលជូនពលរដ្ឋ ប៉ុន្តែបញ្ហាមួយចំនួនទៀតមិនទាន់ទទួលបានផលនៅឡើយ។ ដូចនេះ គ្រប់អគ្គ.ជំនាញ ត្រូវដោះស្រាយរហូតទទួលបានលទ្ធផលចប់ ឱ្យបានត្រឹមត្រូវ យុត្តិធម៌»។
សេចក្តីណែនាំដដែល បញ្ជាក់ថា ស្ថាប័នរដ្ឋដែលពាក់ព័ន្ធដោះស្រាយបញ្ហាជូនពលរដ្ឋទាំងនោះរួមមាន អគ្គនាយកដ្ឋានចម្រុះចំណុះឱ្យក្រសួងមហាផ្ទៃ អភិបាលនៃគណៈអភិបាលរាជធានី-ខេត្ត និងស្នងការនៃស្នងការដ្ឋានរាជធានីភ្នំពេញ និងអង្គភាពពាក់ព័ន្ធផ្សេងៗទៀតជាដើម។
លោក ជា សុគន្ធា ប្រធានក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពរប្រជាពលរដ្ឋនៅក្នុងទំព័រហ្វេសប៊ុករបស់លោកឧបនាយករដ្ឋមន្ត្រី ស ខេង មានប្រសាសន៍បន្ថែមលើសេចក្តីណែនាំនេះថា បច្ចុប្បន្ន ក្រុមការងារបានដោះស្រាយបញ្ហាសាធារណៈជូនប្រជាពលរដ្ឋចប់សព្វគ្រប់ចំនួន៦៨ករណី រួមមាន ការធ្វើអត្តសញ្ញាណបណ្ណ សំបុត្រកំណើត និងសំបុត្រអាពាហ៍ពិពាហ៍ជាដើម។
លោកបន្តថា ចំពោះបញ្ហាដែលនៅសេសសល់មិនទាន់ដោះស្រាយ មានចំនួន១០៩ករណី ជាបញ្ហាវិវាទដីធ្លី ដោយក្រុមការងារបានបញ្ជូនបញ្ហាទាំងនោះទៅអាជ្ញាធរទូទាំង២៥រាជធានី-ខេត្ត ដោះស្រាយជូនពលរដ្ឋឱ្យបានឆាប់ផងដែរ។
លោកបានថ្លែងថា៖ «យើងមានក្រុមការងារយើងទាក់ទងដើម្បីជំរុញការងារហ្នឹង ហើយយើងមានសេចក្តីណែនាំរបស់ក្រសួង យើងនឹងខិតខំជំរុញទៅអង្គភាពពាក់ព័ន្ធ ដើម្បីពន្លឿនការដោះស្រាយជូនប្រជាពលរដ្ឋ ព្រោះយើងធ្វើការដើម្បីបម្រើប្រជាពលរដ្ឋ ដូច្នេះ បើប្រជាពលរដ្ឋមានសំណូមពរ យើងត្រូវបម្រើជូនប្រជាពលរដ្ឋ»។
លោក សៀង ហេង អះអាងជាតំណាងប្រជាពលរដ្ឋដែលមានជម្លោះដីធ្លីនៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង បាននិយាយថា ពួកគាត់ជាង១០០នាក់ មានជម្លោះដីធ្លីជាមួយក្រុមហ៊ុន ខេឌីស៊ី (KDC) ជាង១០ឆ្នាំមកហើយ លើផ្ទៃដីជាង២០០ហិចតា។
លោកបន្តថា ពួកគេបាននាំគ្នាតវ៉ាដាក់ញត្តិនៅតាមស្ថាប័នរដ្ឋនានាពីភូមិរហូតដល់ខេត្តនិងថ្នាក់ជាតិ រួមទាំងតុលាការជាច្រើនឆ្នាំមកហើយ ប៉ុន្តែមកដល់ពេលនេះ មិនទាន់មានដំណោះស្រាយនៅឡើយ។
លោក សៀង ហេង បញ្ជាក់ថា ពលរដ្ឋក៏មានបំណងទៅរកកិច្ចអន្តរាគមន៍ពីក្រសួងមហាផ្ទៃផងដែរ ប៉ុន្តែលោកហាក់មិនមានជំនឿថា អាជ្ញាធរថ្នាក់ជាតិនឹងដោះស្រាយបញ្ហានេះជូនពួកគាត់ឱ្យមានប្រសិទ្ធភាពនោះទេ។
លោកថា៖ «យើងអត់សូវមានសង្ឃឹមក្នុងដំណោះស្រាយ មិនដឹងគណៈកម្មការធ្វើបានកម្រិតណា ព្រោះយើងឆ្លងកាត់ច្រើនក្នុងការប្តឹងទាមទារដោះស្រាយជម្លោះដីធ្លី វាច្រើនឆ្នាំ វាអត់មានដំណោះស្រាយណាល្អសម្រាប់ពលរដ្ឋ យើងរកតាមបណ្តឹងរដ្ឋបាល ច្រើនតែរុញទៅតុលាការដដែល»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា កន្លងមក អាជ្ញាធរដោះស្រាយបញ្ហាសេវាសាធារណៈនិងជម្លោះដីធ្លីជូនប្រជាពលរដ្ឋ ហាក់មានភាពលម្អៀងទៅរកអ្នកមានអំណាច ហើយអ្នករងគ្រោះជាប្រជាពលរដ្ឋទន់ខ្សោយ។
ទោះជាបែបនេះក្តី លោកផ្តល់ជាអនុសាសន៍ថា ដើម្បីដោះស្រាយបញ្ហាប្រឈមនានារបស់ប្រជាពលរដ្ឋទូទៅឱ្យមានប្រសិទ្ធភាពខ្ពស់ ក្រុមការងារឬអាជ្ញាធរត្រូវរកវិធីដោះស្រាយប្រកបដោយតម្លាភាព មិនប្រកាន់បក្ខពួក។
លោកផ្តល់ជាអនុសាសន៍ថា៖ «ដំណោះស្រាយមានតែការពង្រឹងប្រព័ន្ធយុត្តិធម៌ ហើយជំរុញមន្ត្រីជំនាញដែលមានសមត្ថកិច្ចដោះស្រាយបញ្ហានេះ ដោយឈរលើគោលការណ៍មួយដែលគេហៅថា គោលការណ៍ស្មើភាព បើអ្នកធំ អ្នកមានអំណាច អ្នកមានលុយធ្វើខុស គឺពួកគេត្រូវតែបដិសេធ ឬត្រូវមានអន្តរាគមន៍ជាមួយអ្នកខុស កុំឱ្យខុសហើយនៅតែត្រូវទៀត»។
កាលពីថ្ងៃទី១៥ ខែមិថុនា ឆ្នាំ២០២០ ក្រសួងមហាផ្ទៃបានសម្រេចបង្កើតក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពរប្រជាពលរដ្ឋ នៅក្នុងទំព័រហ្វេសប៊ុក (Facebook page) របស់រដ្ឋមន្ត្រីក្រសួងមហាផ្ទៃ លោក ស ខេង។ ក្រុមការងារនេះមានសមាសភាពសរុប១១រូប ក្នុងនោះ ប្រធានមួយរូប អនុប្រធាន៥រូប និងសមាជិក៥រូប។
ក្រសួងប្រៃសណីយ៍ និងទូរគមនាគមន៍កម្ពុជា ធ្លាប់បញ្ជាក់ថា គិតត្រឹមខែមិថុនា ឆ្នាំ២០១៩ កម្ពុជាមានអ្នកប្រើប្រាស់ទូរសព្ទដៃជាង២០លានស៊ីមកាត (២០ ៨៥៧ ៥៧៤) អ្នកប្រើប្រាស់អ៊ីនធឺណិតជាង១៥លាននាក់ (១៥ ៨៤៨ ៨៦៧)៕