ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានអះអាងថា តំណាងស្ថានទូតធំៗប្រចាំកម្ពុជា បានសន្យាលើកយកក្ដីបារម្ភរបស់ក្រុមសង្គមស៊ីវិលមួយចំនួន ពាក់ព័ន្ធការចាប់ខ្លួនមនុស្សជាច្រើននាក់និងការរំលោភសិទ្ធមនុស្សនៅក្នុងរយៈពេលប៉ុន្មានសប្ដាហ៍ថ្មីៗនេះ ទៅជជែកជាមួយរដ្ឋាភិបាលកម្ពុជា។
អ្នកស្រី អ៊ុក ឆាយ៉ាវី អះអាងថា ការសន្យាបែបនេះត្រូវបានធ្វើឡើងអំឡុងជំនួបរយៈពេលពីរម៉ោងកាលពីថ្ងៃម្សិលមិញ រវាងមន្ត្រីស្ថានទូតចំនួន៨និងក្រុមអង្គការសង្គមស៊ីវិលចំនួន៣ នៅចំថ្ងៃដែលកម្ពុជាប្រារព្ធខួប២៧ឆ្នាំនៃការប្រកាសឱ្យប្រើប្រាស់រដ្ឋធម្មនុញ្ញកាលពីថ្ងៃទី២៤ ខែកញ្ញា ឆ្នាំ២០២០ និងចំពេលដែលសកម្មជន សិល្បករ និងអ្នកការពារសិទ្ធិមនុស្សសរុប១៩នាក់ ត្រូវបានសមត្ថកិច្ចចាប់ខ្លួនចាប់តាំងពីចុងខែកក្កដាកន្លងមកនេះ។
អ្នកស្រី អ៊ុក ឆាយ៉ាវី និយាយថា៖ «ទូតគេចាប់អារម្មណ៍ពីបញ្ហាទាំងអស់នេះ។ គេក៏បានមើលឃើញថា មួយរយៈកន្លងមកនេះ រំលោភសិទ្ធិមនុស្សកាន់តែធ្ងន់ធ្ងរ និងបិទសិទ្ធិសេរីភាពកាន់តែធ្ងន់ធ្ងរ។ គេថា នឹងទៅជជែកជាមួយរដ្ឋាភិបាលទាំងអស់ហ្នឹង។ យើងឃើញហើយ កន្លងមកមានការធ្វើទុក្ខបុកម្នេញ សូម្បីតែប្រពន្ធអ្នកជាប់ពន្ធនាគារ ត្រូវបានសន្តិសុខនៅខណ្ឌធ្វើបាប។ វាហាក់ដូចជាបែរទៅរករបប៣ឆ្នាំ៨ខែ»។
អ្នកស្រី ឆាយ៉ាវី បានបន្តថា៖ «យើងបញ្ជាក់ឱ្យទូតទាំងអស់ហ្នឹង ការរំលោភសិទ្ធិមនុស្សនៅកម្ពុជា មានសភាពកាន់តែធ្ងន់ធ្ងរទៅៗ។ យើងចង់ឱ្យអគ្គរដ្ឋទូតមួយចំនួន នៅជួយឃ្លាំមើលនិងធ្វើយ៉ាងណាឱ្យរដ្ឋាភិបាលធ្វើឱ្យស្ថានភាពនៃប្រទេសកម្ពុជាប្រសើរឡើងវិញ កុំឱ្យចេះតែធ្ងន់ទៅៗ ដែលធ្វើឱ្យប្រទេសខ្មែរមានការភ័យខ្លាចក្នុងការទាមទារនិងតវ៉ា»។
លោកស្រីបានគូសបញ្ជាក់ថា អង្គការសង្គមស៊ីវិលទាំងបីបានជួបឯកអគ្គរដ្ឋទូតទាំង៨ និងបានជជែកពីការងារ និងបានធ្វើរបាយការណ៍មួយចំនួនទាក់ទងសិទ្ធិមនុស្សនៅក្នុងប្រទេសកម្ពុជា និងពីការចាប់លោក រ៉ុង ឈុន ការប៉ងសម្លាប់លោកស្រី និងយុវជនដែលគ្រាន់តែទាមទារដោះលែងលោក រ៉ុង ឈុន ត្រូវបានចាប់ដាក់ពន្ធនាគារដោយអយុត្តិធម៌បំផុត។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានថ្លែងថា អង្គការសង្គមស៊ីវិលបានលើកឡើងពីការចាប់ខ្លួនមនុស្សជាច្រើននាក់ និងការរំលោភសិទ្ធិមនុស្សពីអាជ្ញាធរនាពេលថ្មីនេះ។
អ្នកស្រី ចក់ សុភាព ប្រាប់ថា៖ «ជាការប្រជុំដើម្បីជជែកអំពីស្ថានការណ៍បច្ចុប្បន្ននិងស្ថានការណ៍វិវត្តសិទ្ធិមនុស្ស ហើយក៏ស្របពេលនឹងការប្រារព្ធនូវទិវាប្រកាសរដ្ឋធម្មនុញ្ញផងដែរ។ ក្នុងជំនួបហ្នឹង យើងមានការជជែកអំពីស្ថានភាពសិទ្ធិមនុស្ស ជាពិសេសការវិវត្តថ្មីដែលមានការចាប់ខ្លួន ឬការបង្ក្រាបទៅលើការជួបជុំរបស់សហគមន៍និងយុវជន»។
លោកស្រីបានបន្ថែមថា៖ «យើងចង់បានលំហមួយដែលពលរដ្ឋលោកអាចអនុវត្តនូវសិទ្ធិសេរីភាពរបស់គាត់ ក្នុងការបញ្ចេញមតិ ការជួបជុំ និងការចងក្រងជាសមាគម ដោយសេរីនិងមិនមានការភ័យខ្លាច។ នេះគឺជាអ្វីដែលយើងចង់ឃើញសម្រាប់ប្រទេសកម្ពុជាយើង»។
សរសេរនៅលើ Twitter របស់ខ្លួនកាលពីថ្ងៃម្សិលមិញនេះ ឯកអគ្គរដ្ឋទូតអូស្ត្រាលីប្រចាំនៅកម្ពុជា លោក Pablo Kang បានរៀបរាប់ថា រូបលោកនិងអគ្គរដ្ឋទូតមួយចំនួនបានជួបពិភាក្សាជាមួយការិយាល័យឧត្តមស្នងការទទួលបន្ទុកសិទ្ធិមនុស្យ មជ្ឈមណ្ឌលសិទ្ធិមនុស្សកម្ពុជា អង្គការលីកាដូ សមាគមគ្រូបង្រៀនកម្ពុជាឯករាជ្យ នៅចំពេលកម្ពុជាប្រារព្ធខួប២៧ឆ្នាំនៃការប្រកាសឱ្យប្រើប្រាស់រដ្ឋធម្មនុញ្ញកម្ពុជា។
លោក Pablo Kang បានបញ្ជាក់ដូច្នេះថា៖ «ពិភាក្សាអំពីក្តីបារម្ភពីព្រឹត្តិការណ៍ពេលថ្មីៗ និងថា តើយើងអាចជួយឱ្យការអនុវត្តនូវគោលការណ៍រដ្ឋធម្មនុញ្ញបានប្រសើររបៀបម៉េចខ្លះ»។
អ្នកនាំពាក្យស្ថានទូតអូស្ត្រាលីប្រចាំកម្ពុជា បានប្រាប់តាមអ៊ីម៉ែលនៅថ្ងៃនេះថា លោក Pablo Kang បានចែករំលែកក្ដីបារម្ភជុំវិញការចាប់ខ្លួននិងការរារាំងការតវ៉ាដោយសន្តិវិធីនាពេលថ្មីៗនេះ ហើយលោកសង្ឃឹមថា រដ្ឋាភិបាលកម្ពុជា សង្គមស៊ីវិល និងស្ថានបេសកកម្មបរទេស អាចធ្វើការដើម្បីធានាថា ស្តង់ដារសិទ្ធិមនុស្សត្រូវបានរក្សាការពារ។
អង្គការសហប្រជាជាតិប្រចាំនៅកម្ពុជា ជំរុញឱ្យកម្ពុជាបន្តប្រកាន់ខ្ជាប់លទ្ធិប្រជាធិបតេយ្យសេរីពហុបក្ស និងគោរពសិទ្ធិមនុស្ស ស្របតាមធម្មនុញ្ញអង្គការសហប្រជាជាតិ និងសេចក្តីប្រកាសស្តីពីសិទ្ធិមនុស្សដែលកម្ពុជាបានទទួលស្គាល់៕