រដ្ឋាភិបាលកម្ពុជា ប្តេជ្ញាចូលរួមជាមួយបណ្តាប្រទេសក្នុងតំបន់អាស៊ាន ទប់ស្កាត់និងបង្ក្រាបបទឧក្រិដ្ឋឆ្លងដែនជាមួយគ្នា ដើម្បីសន្តិភាពនៅក្នុងតំបន់។
កាលពីថ្ងៃទី២៤ ខែកញ្ញា ប្រធានក្រុមការងារមន្ត្រីជាន់ខ្ពស់ក្រសួងមហាផ្ទៃ ទទួលការងារប្រឆាំងឧក្រិដ្ឋកម្មឆ្លងដែនក្នុងក្របខណ្ឌអាស៊ាន (SOMTC-Leader) និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ លោក មៀច សុផាន់ណា បានដឹកនាំមន្ត្រីជំនាញជាន់ខ្ពស់ពាក់ព័ន្ធ ចូលរួមកិច្ចប្រជុំឧក្រិដ្ឋកម្មឆ្លងដែនលើកទី២០ តាមរយៈប្រព័ន្ធវីដេអូដែលរៀបចំដោយប្រទេសហ្វីលីពីន ។
គណៈកម្មាធិការប្រយុទ្ធប្រឆាំងផលិតផលក្លែងក្លាយ បានឱ្យដឹងក្នុងទំព័រហ្វេសប៊ុកកាលពីថ្ងៃម្សិលមិញថា កិច្ចប្រជុំនេះបានលើកឡើងនូវប្រធានបទផ្សេងៗ រួមមាន ភេវរកម្ម ការជួញដូរមនុស្ស ការជួញដូរអាវុធ ការលាងសម្អាតប្រាក់ អំពើប្លន់តាមសមុទ្រ ឧក្រិដ្ឋកម្មសេដ្ឋកិច្ចអន្តរជាតិ បទល្មេីសផលិតផលក្លែងក្លាយ បទល្មើសបច្ចេកវិទ្យា ការជួញដូរគ្រឿងញៀន ការជួញដូរសត្វព្រៃនិងឈើខុសច្បាប់ជាដើម។
លោក មៀច សុផាន់ណា បានលេីកទ្បេីងក្នុងកិច្ចប្រជុំនោះថា ការគំរាមកំហែងពីសកម្មភាពឧក្រិដ្ឋកម្មឆ្លងដែនមានលក្ខណៈស្មុគស្មាញ ហើយក៏គ្មានប្រទេសណាអាចដោះស្រាយការគំរាមកំហែងបែបនេះដោយម្នាក់ឯងបានឡើយ គឺតម្រូវឱ្យមានសកម្មភាពរួមគ្នាពីបណ្តាប្រទេសនានានិងការពង្រឹងកិច្ចសហប្រតិបត្តិការនៅថ្នាក់តំបន់។
លោកបានបន្ថែមថា៖ «យេីងប្តេជ្ញាពង្រឹងសមត្ថភាពសមូហភាព តាមរយៈវគ្គបណ្តុះបណ្តាល សិក្ខាសាលាថ្នាក់តំបន់ និងខិតខំលើកកម្ពស់ និងសម្របសម្រួលកិច្ចសហប្រតិបត្តិការក្នុងតំបន់របស់យើងឱ្យកាន់តែមានប្រសិទ្ធភាព ដោយបានបង្កើតឡើងនូវបទដ្ឋានគតិយុត្តិដើម្បីដោះស្រាយនូវរាល់បញ្ហាប្រឈមទាំងនេះ»។
បើតាមការឱ្យដឹងពីគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្នុងកិច្ចប្រជុំស្តីពីឧក្រិដ្ឋកម្មឆ្លងដែនលើកទី២០នេះ ប្រទេសសមាជិកអាស៊ានទាំងអស់បានប្តេជ្ញាចិត្តខ្ពស់ក្នុងការទប់ស្កាត់និងបង្ក្រាបបទឧក្រិដ្ឋឆ្លងដែនជាមួយគ្នា ដើម្បីសន្តិភាពនៅក្នុងតំបន់៕