សមាគមរោងចក្រកាត់ដេរនៅកម្ពុជា បានដាក់ពាក្យបណ្តឹងប្រឆាំងនឹងសហភាពអឺរ៉ុបដោយទាមទារឱ្យតំណាងក្រុមប្រទេសបញ្ជាទិញមួយនេះផ្តល់ប្រព័ន្ធអនុគ្រោះពន្ធពាណិជ្ជកម្មដល់កម្ពុជាឡើងវិញ។
យោងតាមព្រឹត្តិបត្រព័ត៌មានផ្លូវការរបស់សហភាពអឺរ៉ុបចេញផ្សាយនៅថ្ងៃទី៣១ ខែសីហា សមាគមរោងចក្រកាត់ដេរនៅកម្ពុជា បានប្តឹងសហភាពអឺរ៉ុបទៅតុលាការយុត្តិធម៌របស់តំបន់នេះកាលពីថ្ងៃទី១៦ ខែកក្កដា ដើម្បីជំរុញឱ្យលុបចោលការសម្រេចដកផ្នែកខ្លះនៃប្រព័ន្ធអនុគ្រោះពន្ធ «សព្វមុខទំនិញលើកលែងតែអាវុធ» ឬហៅកាត់ EBA ពាក់ព័ន្ធនឹងការរំលោភសិទ្ធិមនុស្សនៅកម្ពុជា។
តាមប្រភពដដែល សមាគមចោទថា ការសម្រេចរបស់ EU រំលោភលើគោលការណ៍សមាមាត្រនិងតម្រូវការនៃភាពស្ថិតស្ថេររវាងគោលនយោបាយនិងសកម្មភាពរបស់សហភាពអឺរ៉ុប។
ប្រភពដដែលបន្ថែមថា សហភាពអឺរ៉ុបមិនបានវាយតម្លៃត្រឹមត្រូវចំពោះការដកហូតជាបណ្តោះអាសន្ននូវការលើកលែងពន្ធគយសម្រាប់ផលិតផលសម្លៀកបំពាក់ ស្បែកជើង និងផលិតផលទំនិញធ្វើដំណើរ ហើយថា ការសម្រេចនេះក៏មិនបានផ្តល់ហេតុផលគ្រប់គ្រាន់ដែរ។
សហភាពអឺរ៉ុបបានចាប់ផ្តើមដកភាពអនុគ្រោះពន្ធពាណិជ្ជកម្មសម្រាប់កម្ពុជាចំនួន២០ភាគរយជាបណ្តោះអាសន្នចាប់ពីថ្ងៃទី១២ ខែសីហា បន្ទាប់ពីខ្លួនបានដំណើរការពិនិត្យរយៈពេល១៨ខែ រាប់ចាប់ពីថ្ងៃប្រកាសនៅខែកុម្ភៈ ឆ្នាំ២០១៩ ក្រោយខ្លួនរកឃើញមានការរំលោភសិទ្ធិមនុស្សជាប្រព័ន្ធនិងមានលក្ខណៈធ្ងន់ធ្ងរនៅកម្ពុជា៕