មន្រ្តីជាន់ខ្ពស់ក្រសួងព័ត៌មាន និយាយថា សេចក្តីព្រាងច្បាប់ស្តីពីសិទ្ធិទទួលព័ត៌មាន មិនទាន់ត្រូវបានបញ្ជូនទៅទីស្តីការគណៈរដ្ឋមន្ត្រីនៅឡើយទេ ដោយរង់ចាំភ្លើងខៀវពីក្រសួងយុត្តិធម៌។
អ្នកនាំពាក្យក្រសួងព័ត៌មាន លោក មាស សុភ័ណ្ឌ ប្រាប់VODនៅថ្ងៃសុក្រនេះថា សេចក្តីព្រាងច្បាប់នេះ ក្រសួងព័ត៌មានបានបញ្ចប់កិច្ចពិភាក្សាជាមួយក្រសួងយុត្តិធម៌ហើយ តែក្រសួងនៅរង់ចាំការឆ្លើយតបពីក្រសួងយុត្តិធម៌ ពាក់ព័ន្ធទោសប្បញ្ញត្តិដែលមានចែងក្នុងសេចក្តីព្រាងច្បាប់ស្តីពីសិទ្ធិទទួលព័ត៌មាននេះ។
លោក មាស សុភ័ណ្ឌ ប្រាប់ថា៖ «អ៊ីចឹង ក្រោយពីយើងទទួលបាននូវការឆ្លើយតបជាផ្លូវការរបស់ក្រសួងយុត្តិធម៌ចំពោះទោសប្បញ្ញត្តិរួចហើយ ក្រសួងព័ត៌មាននឹងរៀបចំឯកសារពាក់ព័ន្ធទៅនឹងសេចក្តីព្រាងច្បាប់នេះ ដាក់ជូនទៅទីស្តីការគណៈរដ្ឋមន្ត្រីឱ្យបានឆាប់បំផុត»។
អ្នកនាំពាក្យរូបនេះនិយាយទៀតថា ជាការប្តេជ្ញាចិត្តរបស់ក្រសួង ក៏ដូចជារដ្ឋាភិបាល ចង់ឱ្យសេចក្តីព្រាងច្បាប់នេះអនុម័តនៅចុងឆ្នាំ២០២០នេះ។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានប្រាប់ថា ក្រុមការងារកំពុងត្រួតពិនិត្យទៅលើកិច្ចការនេះ។
លោក ជិន ម៉ាលីន ប្រាប់ថា៖ «ក្រុមការងារក្រសួងយុត្តិធម៌និងក្រសួងព័ត៌មាន កំពុងពិនិត្យមើលពីទោសប្បញ្ញត្តិ និងកំពុងធ្វើការជជែកគ្នា ពិភាក្សាគ្នា។ អ៊ីចឹង នៅពេលមានកិច្ចព្រមព្រៀងគ្នា ក្រសួងនឹងបញ្ជូនបន្ត»។
នៅថ្ងៃនេះដែរ សហភាពសហព័ន្ធអ្នកសារព័ត៌មានកម្ពុជា និយាយក្នុងសេចក្តីថ្លែងអបអរសាទរទិវាអន្តរជាតិស្តីពី «សិទ្ធិទទួលបានព័ត៌មាន» ដែលនឹងចូលមកដល់នៅថ្ងៃទី២៨ ខែកញ្ញាថា ខ្លួនមានក្តីសង្ឃឹមថា ច្បាប់នេះនឹងក្លាយជាមធ្យោបាយបន្ថែមពង្រឹងនូវផ្នត់គំនិតនិងវប្បធម៌ប្រជាធិបតេយ្យ និងការចូលរួមពីសំណាក់ប្រជាពលរដ្ឋជាមួយរដ្ឋាភិបាលក្នុងសកម្មភាពអភិវឌ្ឍន៍ប្រទេសជាតិលើគ្រប់វិស័យ។
ប្រធានសហភាពសហព័ន្ធអ្នកសារព័ត៌មាន លោក ហ៊ុយ វណ្ណៈ ដែលមានតំណែងជារដ្ឋលេខាធិការក្រសួងមហាផ្ទៃផងនោះ ឱ្យដឹងបន្ថែមថា ប្រជាធិបតេយ្យគឺជាការចូលរួមរិះគន់បែបស្ថាបនា លោកថា នៅពេលកម្ពុជាមានច្បាប់នេះ បញ្ហាសង្គមវានឹងត្រូវកាត់បន្ថយ។
លោក ហ៊ុយ វណ្ណៈ លើកឡើងថា៖ «អ៊ីចឹងហើយបានជាយើងធ្វើពីប្រជាធិបតេយ្យចូលរួម ឱ្យតែមានការចូលរួម មានការថ្លឹងថ្លែង មានការពិចារណា ខ្ញុំជឿថា វាមិនបញ្ហាទេ ប្រទេសណាក៏ដោយវាត្រូវការច្បាប់ជាគោលក្នុងការតម្រង់ទិស ទាំងសីលធម៌ ទាំងសុចរិតភាពទាំងសណ្តាប់ធ្លាប់សង្គម ទាំងតម្លាភាពសង្គម ព្រោះច្បាប់វាជាម៉ែត្រវាស់តម្រង់ទិសមនុស្សទាំងអស់គ្នា»។
នាយកប្រតិបត្តិសម្ព័ន្ធព័ត៌មានកម្ពុជា (ខេមបូចា) លោក ណុប វី និយាយថា ការពន្លឿនអនុម័តច្បាប់នេះ ជាផ្នែកចាំបាច់មួយក្នុងការជំរុញឱ្យប្រជាពលរដ្ឋបានចូលរួមក្នុងការអភិវឌ្ឍលើគ្រប់វិស័យក្នុងសង្គម ខណៈស្ថានភាពបច្ចុប្បន្ន ការអភិវឌ្ឍខ្លះខ្វះខាតនូវការចូលរួមប្រកបដោយប្រសិទ្ធភាព ធ្វើឱ្យការអភិវឌ្ឍនោះប៉ះពាល់ដល់ជីវភាពរស់នៅរបស់ប្រជាពលរដ្ឋ។
មួយវិញទៀត លោកថា ភាពចាំបាច់នៃច្បាប់ក៏គួរមានស្តង់ដារគ្រប់គ្រាន់បំពាក់កាតព្វកិច្ចដល់មន្ត្រីក្នុងការផ្តល់ព័ត៌មានទៅតាមសំណើសុំរបស់ព្រជាពលរដ្ឋផងដែរ ទើបជំរុញដល់ការចូលរួមគ្រប់ជំហាននៃការអភិវឌ្ឍ។
លោក ណុប វី និយាយថា៖ «អ៊ីចឹងជារួម ខ្ញុំយល់យើញថា ច្បាប់វាមានភាពចាំបាច់ណាស់ ហើយជំរុញឱ្យប្រជាពលរដ្ឋគាត់ចូលរួមនៅក្នុងសង្គមមួយដែលមានការចូលរួមយ៉ាងសកម្មរបស់ប្រជាពលរដ្ឋ ហើយប្រជាពលរដ្ឋគាត់អាចចូលរួមគ្រប់ស្ថានភាពឬមួយគ្រប់ជំហាននៃការអភិវឌ្ឍនៅក្នុងសង្គម»។
ក្នុងសេចក្ដីជូនដំណឹងពីគម្រោងធ្វើសន្និសីទនៅចំថ្ងៃប្រារព្ធទិវាអន្តរជាតិស្តីពី«សិទ្ធិទទួលបានព័ត៌មាន»នៅសប្តាហ៍ក្រោយ វិទ្យាស្ថានតស៊ូមតិ និងគោលនយោបាយ និងក្រុមសង្គមស៊ីវិលពាក់ព័ន្ធ និយាយថា សិទ្ធិទទួលព័ត៌មានគឺជាសិទ្ធិមូលដ្ឋានដែលត្រូវបានធានាដោយសន្ធិសញ្ញាសំខាន់ដែលប្រទេសកម្ពុជាបានចូលរួមជារដ្ឋភាគី។
សេចក្ដីព្រាងច្បាប់ស្ដីពីសិទ្ធិទទួលបានព័ត៌មាន ត្រូវបានផ្ដួចផ្ដើមនិងឆ្លងកាត់ការពិភាក្សាពិគ្រោះយោបល់អស់រយៈពេល១៥ឆ្នាំមកហើយ។
ក្រុមសង្គមស៊ីវិលលើកឡើងថា បច្ចុប្បន្ន កម្ពុជានៅតែមិនទាន់មានច្បាប់ប្បញ្ញត្តិសម្រាប់ការស្នើសុំព័ត៌មានសាធារណៈនៅឡើយ ដែលជាមូលហេតុធ្វើឱ្យមន្ត្រីរដ្ឋាភិបាលអាចបដិសេធនូវការផ្តល់ព័ត៌មានសាធារណៈបាន។
មួយវិញទៀត លិខិតនេះក៏បានបញ្ជាក់ផងដែរថា សេចក្តីព្រាងច្បាប់របស់កម្ពុជាបច្ចុប្បន្ននៅមានភាពខ្វះខាត ពិសេសការកំណត់ឱ្យបានច្បាស់អំពីនិយមន័យព័ត៌មានសម្ងាត់ ការចែងអំពីការផ្តល់ការការពារពិតប្រាកដដល់អ្នកបញ្ចេញព័ត៌មាន ឬការបែងចែកអំពីទណ្ឌកម្មចំពោះមន្ត្រីដែលរំលោភបំពានច្បាប់នោះ៕
