ពលរដ្ឋនៅក្នុងឃុំចំនួន២នៅខេត្តព្រៃវែង បង្ហាញក្ដីបារម្ភពីបញ្ហាអសន្តិសុខដែលពួកគេអះអាងថា បណ្ដាលមកពីសកម្មភាពក្មេងទំនើង ចាប់តាំងពីចុងខែសីហាកន្លងមកនេះ។
កម្មករសំណង់ លោក សុង សំណាង អាយុ៤៥ឆ្នាំ រស់នៅក្នុងឃុំរក្សជ័យ ស្ថិតក្នុងស្រុកបាភ្នំ ប្រាប់វីអូឌីថា ចាប់តាំងពីចុងខែសីហាមក លោកសង្កេតឃើញមានករណីអសន្តិសុខច្រើនកើតឡើង ដែលក្នុងនោះមានករណីវាយកាប់ចាក់ ករណីសម្លាប់ ករណីគ្រឿនញៀន និងករណីរំលោភសម្លាប់។
ពលរដ្ឋរូបនេះបានឱ្យដឹងថា មានករណីសម្លាប់ប្រមាណ៤ករណីហើយដែលបានកើតឡើង ដែលករណីទាំងនោះមានទាំងការសម្លាប់ក្នុងឃុំនិងអ្នកក្រៅយកមកចោល។ ក្នុងនោះមានករណីមួយដែលត្រូវបានគេសម្លាប់ដោយសារជម្លោះរបស់ក្មេងទំនើង។
លោក សុង សំណាង ប្រាប់ថា៖ «ក្មេងជក់ថ្នាំហ្នឹង វ៉ៃគ្នាស្លាប់នៅឃុំធាយ! វ៉ៃពីរក្សជ័យទៅ ទៅស្លាប់នៅឃុំធាយ»។
បុរសម្នាក់ជាគ្រូបង្រៀនភាសាអង់គ្លេសនៃក្រុមគ្រិស្ដសាសនានៅឃុំរក្សជ័យ អាយុ២៩ឆ្នាំ បានប្រាប់វីអូឌីដោយសុំមិនបញ្ចេញឈ្មោះថា ការការពារពីសំណាក់អាជ្ញាធរហាក់មិនទាន់មានប្រសិទ្ធភាពគ្រប់ពេលទេ ដោយពេលខ្លះមានការចុះពិនិត្យ តែពេលខ្លះក៏មិនឃើញមានការចុះត្រួតពិនិត្យដែរ។
គ្រូបង្រៀនប្រាប់ថា៖ «តាមឃុំមានដែរ! មានការរឹតបន្តឹង តែពេលខ្លះវាដូចជាយូរៗទៅ វាមុនដំបូងធូរអ៊ីចឹងទៅ យូរៗទៅវាតឹងអ៊ីចឹងទៅ។ និយាយថាដូចទឹកឡើងទឹកស្រកអ៊ីចឹងហ្អាស […] ពេលណាមានទៅ បានរឹតបន្តឹងទៅ»។
លោកនិយាយថា ជនដៃដល់ដែលបានសម្លាប់មនុស្ស ត្រូវបានសមត្ថកិច្ចចាប់ខ្លួនអស់ហើយ តែជាក់ស្ដែងអ្នកដែលបង្កហេតុផ្សេងទៀត នៅមិនទាន់ចាប់បាននៅឡើយទេ។ លោកបន្តថា ហេតុការណ៍ទាំងនេះបានធូរស្បើយមួយកម្រិត បន្ទាប់ពីខាងអាជ្ញាធរខេត្តសហការជាមួយខាងអាជ្ញាធរតំបន់ចុះត្រួតពិនិត្យ។
ចំណែកអនុប្រធានភូមិជ្រួលថ្មី លោក ខៀវ សាខឿន ស្ថិតក្នុងឃុំរក្សជ័យ បានប្រាប់វីអូឌីថា លោកបានដាក់ប្រជាការពារក្នុងការការពារភូមិរបស់លោកជារៀងរាល់ថ្ងៃ ដើម្បីចៀសផុតពីសកម្មភាពអសន្តិសុខផ្សេងៗដែលនឹងកើតមាន។
លោក ខៀវ សាខឿន និយាយថា៖ «រាល់ថ្ងៃ ប្រជុំអាណត្តិហ្នឹង គឺយើងលើកឡើងឱ្យជួយអប់រំកូនចៅទាំងអស់គ្នា គ្មានអាណាដឹងជាងកូនយើងទេ»។
អ្នកលក់បន្លែនៅឃុំធាយ អ្នកស្រី តេង សោភ័ណ្ឌ អាយុ៤៧ឆ្នាំ ប្រាប់វីអូឌីថា ក្នុងឃុំអ្នកស្រីក៏មានករណីអសន្តិសុខកើតឡើងច្រើនដែរ តែបញ្ហាដែលកំពុងប្រឈមខ្លាំងនោះគឺបញ្ហាគ្រឿងញៀន។
អ្នកស្រី សោភ័ណ្ឌ និយាយថា៖ «អ៊ូយ! ករណីហ្នឹងច្រើនណាស់អូនអើយ! បងកំពុងបារម្ភខ្លាំងមែនទែនលើការញៀនថ្នាំ ញៀនអ៊ីចឹងអ្ហា៎!»។
មេឃុំរក្សជ័យ លោក ហុង សុផល បានឱ្យដឹងថា ខាងមន្រ្តីអាជ្ញាធរកំពុងប្រជុំនិងតាមដានករណីអសន្តិសុខផ្សេងៗដែរ ជាពិសេសករណីគ្រឿងញៀន។
លោក ហុង សុផល ប្រាប់ថា៖ «ប៉ូលិសកំពុងតែធ្វើការមិនដែលខាន រាល់ថ្ងៃ! មិនមែនទើបដឹងទេ វាមានការប្រើប្រាស់ហ្នឹង។ អ្នកណាដែលប្រើប្រាស់ យើងចេះតែ! តាមផ្លូវច្បាប់ យើងចាប់តែរហូតដែរហ្នឹង»។
លោកបន្ថែមថា កាលពីអំឡុងពិធីភ្ជុំបិណ្ឌ លោកបានដាក់ពង្រាយប្រជាការពារនិងប៉ូលិសដើម្បីការពារប្រជាពលរដ្ឋនៅតាមវត្តអារាម ហើយជាលទ្ធផលគឺមិនមានបញ្ហាអ្វីកើតឡើងទេ។
លោកបញ្ជាក់ថា បើករណីអសន្តិសុខកើនឡើងបន្តទៀត លោកនឹងនៅតែបន្តដាក់ប្រជាការពារភូមិ ផ្សព្វផ្សាយសុវត្ថិភាពភូមិឃុំ ព្រមទាំងបុស្ដិ៍នគរបាលក្នុងការរកមុខជនសង្ស័យដើម្បីយកមកសាកសួរនិងបន្តតាមនីតិវិធីច្បាប់។
អ្នកស្រី សោភ័ណ្ឌ ស្នើសុំដល់អាជ្ញាធរក្នុងការរឹតបន្តឹងលើគ្រប់ករណីអសន្តិសុខ ដើម្បីទប់ស្កាត់ភាពចលាចលក្នុងឃុំ ព្រមទាំងការពារក្មេងៗពីទង្វើអសន្តិសុខទាំងឡាយ។
អធិការដ្ឋាននគរបាលស្រុកបាភ្នំ លោក មុំ សារុំ បានប្រាប់វីអូឌីថា តាំងពីចុងខែសីហាមក លោកទទួលបានព័ត៌មាន អ្នកស្លាប់ចំនួន៣នាក់ ដែលមានស្លាប់ដោយសាររំលោភសម្លាប់ម្នាក់ ក្មេងទំនើងវាយគ្នាលើម៉ូតូស្លាប់ម្នាក់ និងសពគ្មានអត្តសញ្ញាណម្នាក់ដែលអណ្ដែតតាមទឹកទន្លេមក។
ចំពោះករណីគ្រឿងញៀន លោកថា មានករណីគ្រឿងញៀនច្រើនតែអំឡុងពេលភ្ជុំបិណ្ឌទេ ហើយខាងអាជ្ញាធរក៏បានចុះបង្ក្រាបភ្លាមៗដែរ។
លោក មុំ សារុំ ប្រាប់ថា៖ «ហើយដល់ពេលហ្នឹង ខ្ញុំក៏ធ្វើការបង្ក្រាប២លើក! ២លើកហ្នឹង គឺខ្ញុំចាប់បានអ្នកចែកចាយហ្នឹងចំនួន៣នាក់ ប៉ុន្តែម្នាក់នៅខាងមេសាង ហើយម្នាក់នៅខាងស្វាយអន្ទរ-ទឹកថ្លា»៕