រដ្ឋាភិបាលសម្រេចផ្អាករៀបចំពិធីបុណ្យសមុទ្រដែលគ្រោងធ្វើនៅចុងឆ្នាំនេះក្នុងខេត្តព្រះសីហនុ ទៅធ្វើនៅចុងឆ្នាំក្រោយវិញដើម្បីបង្ការការឆ្លងរាលដាលជំងឺកូវីដ១៩។
ក្រសួងទេសចរណ៍បានលើកឡើងក្នុងទំព័រហ្វេសប៊ុកនៅថ្ងៃទី២៥ ខែកញ្ញានេះថា កន្លងមក រាជរដ្ឋាភិបាលបានអនុញ្ញាតជាគោលការណ៍ឱ្យរៀបចំបុណ្យសមុទ្រលើកទី៩ ជុំទី៣ នៅតំបន់ឆ្នេរអូរត្រេះ ខេត្តព្រះសីហនុ នៅអំឡុងខែធ្នូ ឆ្នាំ២០២០។
ប៉ុន្តែក្រសួងថា ដោយសភាពការណ៍វិវត្តន៍នៃជំងឺកូវីដ១៩នៅប្រទេសខ្លះក្នុងតំបន់និងពិភពលោក នៅពុំទាន់បង្ហាញភាពធូរស្រាលនៅឡើយ និងស្របពេលដែលបណ្តាប្រទេសជាមិត្តដែលធ្លាប់បានចូលរួមពិធីបុណ្យសមុទ្រនៅកម្ពុជាកន្លងមក ពុំទាន់មានភាពច្បាស់លាស់ថាអាចមកចូលរួមបានផងនោះ ទើបរដ្ឋាភិបាលសម្រេចលើកពេលរៀបចំបុណ្យសមុទ្រនេះទៅឆ្នាំក្រោយវិញ។
បើតាមក្រសួងទេសចរណ៍ ជារៀងរាល់ឆ្នាំ បុណ្យសមុទ្រតែងតែធ្វើឡើងផ្លាស់ប្តូរវេនគ្នានៅតាមបណ្តាខេត្តទាំងបួនជាប់ឆ្នេរសមុទ្រ ហើយរៀបចំឡើងជាលក្ខណៈអន្តរជាតិ និងមានការចូលរួមពីអង្គការសមុទ្រអន្តរជាតិ ក៏ដូចជាប្រទេសមួយចំនួនពីតំបន់អាស៊ាននិងអាស៊ី ផ្លាស់ប្តូរវេននៅតាមបណ្តាខេត្តទាំងបួនដែលជាប់ឆ្នេរសមុទ្រនៅតាមបណ្តាខេត្តទាំងបួនជាប់ឆ្នេរសមុទ្រ។
គួរបញ្ជាក់ថា រាជរដ្ឋាភិបាលបានរៀបចំពិធីបុណ្យសមុទ្រលើកដំបូងនៅខេត្តព្រះសីហនុ កាលពីថ្ងៃទី៣១ ខែធ្នូ ឆ្នាំ២០១១ ដោយមានភ្ញៀវទេសចរជាតិនិងអន្តរជាតិចូលរួមប្រមាណ៦ម៉ឺននាក់ និងបានរៀបចំពិធីនេះជារៀងរាល់ឆ្នាំចាប់ពីពេលនោះមក។
ការសម្រេចប្រារព្ធពិធីបុណ្យសមុទ្រជារៀងរាល់ឆ្នាំរបស់រដ្ឋាភិបាល ធ្វើឡើងបន្ទាប់ពីកម្ពុជាបានទទួលវិញ្ញាបនបត្របញ្ជាក់ពីឆ្នេរខ្សាច់ស្អាតលំដាប់ពិភពលោកកាលពីថ្ងៃទី២៥ ខែឧសភា ឆ្នាំ២០១១ នៅប្រទេសសេណេហ្គាល់ ក្នុងមហាសន្និបាតលើកទី៧ របស់ក្លឹបឆ្នេរខ្សាច់ ដែលមានសមាជិក២៦ប្រទេស៕
