អគ្គនាយកដ្ឋានពន្ធដារ ប្រកាសពន្យារពេលបង់ពន្ធលើអចលនទ្រព្យទូទាំងប្រទេស រហូតដល់ចុងខែតុលា ឆ្នាំ២០២០ ដោយសារការប្រកាសបង់ពន្ធមានភាពយឺតយ៉ាវ។
សេចក្តីជូនដំណឹងរបស់អគ្គនាយកដ្ឋានពន្ធដារ កាលពីថ្ងៃ២៥ ខែកញ្ញានេះបានឲ្យដឹងថា រហូតមកដល់ពេលនេះ មានម្ចាស់អចលនទ្រព្យជាច្រើនបានមកប្រកាសបង់ពន្ធសម្រាប់ឆ្នាំ២០២០។ ប៉ុន្តែនៅមានម្ចាស់អចលនទ្រព្យមួយចំនួនទៀតមិនទាន់បានមកបង់ពន្ធនៅឡើយ។
តាមច្បាប់ និងបទបញ្ញត្តិជាធរមាន អ្នកជាប់បង់ពន្ធអចលនទ្រព្យ ត្រូវមានកាតព្វកិច្ចប្រកាសបង់ពន្ធនេះយ៉ាងយឺតបំផុតត្រឹមថ្ងៃ៣០ ខែកញ្ញា នៃឆ្នាំជាប់ពន្ធនីមួយៗ បើផុតរយៈពេលនេះ អ្នកបង់ពន្ធត្រូវទទួលរងទណ្ឌកម្មស្របតាមច្បាប់ស្តីពីសារពើពន្ធជាធរមាន។
ប៉ុន្តែអគ្គនាយកដ្ឋានពន្ធដារ សម្រេចពន្យាពេលកាលបរិច្ឆេទផុតកំណត់ប្រកាសបង់ពន្ធអចលនទ្រព្យសំរាប់ឆ្នាំ២០២០ខាងលើ រហូតដល់ ថ្ងៃ៣១ ខែតុលា ឆ្នាំ២០២០ ដោយរួចផុតពីទោសទណ្ឌ ដោយសារការប្រកាសបង់ពន្ធយឺតយ៉ាវ៕
